¹ Lakadakoh, iko' mile nyungan binatang buas mungkas umpatn sadatn laut, umpu' sapuluh tanuk ge' ijo' abak. wa satiap tanuka' kaatn nyabuah mahkota ge' wa satiap abaka' gatn nulis gaatn-gaatn hinaan. ² Binatang buas da iko' mile' dakoh mirip nige' macan tutul, kajaka' samu' kajak' baruang, de' babaka' samu' babak' singa. Naga dakoh mangkatn binatang buas dakoh buut, takhta, ge' kuasa da ahyo'. ³ Iko' mile' nyiteng umpatn abak-abaka' ulah aboh talih da bisa ngakibat kabis, tapi talih dakoh ngajadi ahwatn. samaan dunia kagum ge' nganangz binatang buas dakoh. ⁴ De', ayoa' nyambah naga dakoh karna laka mangkatn kakuatana' wa binatang buas dakoh; ge' ayoa' nyambah binatang buas dakoh nige' nyasana,"Asi da samu' binatang buas diah ge' asi ta da bisa baparang malawan ini'?" ⁵ Ge' wa ini' gatn mangkatn nyabuah babak' da saratn-saratn sumbong ge' manghujat, ge' kuasa yak umasa' salama 42 buratn. ⁶ Ini' muka babaka' kasadatn hujatan malawan Jabata, yak manghujat gaatn-A,' ge' dio-A, ge' ayoa' da madi' ka surga. ⁷ Ini' uga' gatn ngadu yak baparang ayo sok kudus ge' mangalah ayoa'; ge' wa ini' gatn mangkatn kuasa kasamo samaan suku, kaum, bahasa, ge' bangsa. ⁸ Samaan da madi' ka bumi ao' nyambaha, ai dakoh ta satiap sok da gaatna' kati' tatulis samanja dunia gatn umas kasadatn Kitab Kahidupan umpu' Anak Domba, da laka gatn ngamis. ⁹ Satiap sok da barajak bait ta ini dangah diah: ¹⁰ "Sa' nyungan sok pun gatn nantu sabage tawanan, ini' ao' ngajadi tawanan; sa' nyungan sok ngamis nige' pedang, nige' pedang ini' arus gatn ngamis." Binatang da mungkas umpatn Bumi ¹¹ Lalu, iko' mile' nyungan buas laitn mungkas umpatn sadatn bumi; ge' binatang dakoh umpu' dua tanuk samu' anak domba, tapi ini' nyasana ulah nyungan naga. ¹² Ini' manjalan samaan kuasa binatang buas da uru' dakoh ka hadapan-a', ge' umas bumi ge' ayoa' da madi' ka sadatna' nyambah binatang buas da uru', da talih paraha' laka gatn ngakahawat. ¹³ Ini'umas tande-tande ajaib da ahyo', bahkan ngadisah api umpatn rangit ka bumi, ka hadapan ayo sok. ¹⁴ Ge', ini' nyasat ayo sok da madi' ka bumi nige tande-tande ajaib da gatn izin bagia' yak gatn umas ka hadapan binatang buas da uru'. Ini' mujia' wa ayoa' da madi' wa bumi yak umas patung binatang buas da uru', da talih olek pedang, tatapi tetap idup dakoh. ¹⁵ Ini' gatn ngijin yak mangkatn singat wa patung binatang buas dakoh sehinga patung binatang buas dakoh bisa nyasana ge' da ngadu samaan sok da kati nyambah patung dakoh gatn ngamis. ¹⁶ Ge', ini' ngadu samaan sok, kaya ato miskin, budak ato sok merdeka, gatn mangkatn nyiteng tande wa barekng santao ato kaninga', ¹⁷ Sapaya kati' ani nyungan sok pun bisa mari' ato nyual kacuali ini' umpu' tande dakoh, lakoh ta gaatn binatang buas dakoh ato itongan gaatna'. ¹⁸ Hal diah palalu hikmat. katea' sok da bijaksana ngitong numor binatang buas dakoh karna numor dakoh ani ta numor nyungan sok talino; ge' numora' anan ratus anam puluh anam.