¹ Ano raya Roti Kati Baragih da gat'n nyabut ano Paskah agi riket. ² Imam-imam kapala ge' ahli-ahli Taurat najo cara yak ngamis Yesus, barang ayo'a buut tradap sok karah. Pangkhianatan Yudas ³ Laka dakoh, maruh ta Sitan ka sadat'n Yudas, da gat'n nyabut Iskariot. Ini' diu'ta salah satu umpat'n kadua balas murid. ⁴ Maka, anu ta Yudas lalu barunding nige imam-imam kapala ge' pangawal Bait Jabata tentang langkina ini' kaat'n nyarah Yesus ka ayo'a. ⁵ Ge', ayo'a aru sanang ge' sapakat yak mangkat'n'a uang. ⁶ Maka, Yudas satuju ge' mule najo kesempatan yak nyarah Yesus ka ayo'a pas kati ani sok karah. Hidangan Paskah ⁷ Laka dakoh, tiba ta ano raya Roti Kati Baragih , dakoh ta saat yak mempersembah anak domba Paskah. ⁸ Pas waktu dakoh, Yesus ngadu Petrus ge' Yohanes, wat'n'-A, "Anu ge' nyiap ta lah pangkuman Paskah yak ite uman." ⁹ Wat'n ayo'a ka Yesus, "Wak dume Akup'm ngate supaya kai nyiap'a?" ¹⁰ Naham Yesus ka ayo'a, "Jangkah imu' laka maruh ka kota, imu' aok badaput nige sok ayo-are da minsakng kendi; nganang ta ini' ka ramin da aok gat'n maruh'a, ¹¹ ge' muji'ta lah ka umpu ramin dakoh, 'Guru mansikat'n ka imu'; Wak dume ta ruang tamu tampat Iko' kaat'n uman Paskah samahu murid-murid-Ko'?' ¹² Maka, ini' aok nujo ka imu' nyabuah ruangan aihyo wak lantai samo, da parabotan'a laka siap. Nyiap ta lah pangkuman yak ite wak teet'n." ¹³ Lalu, Petrus samahu Yohanes anu ge' kaat'n samaan'a terjadi ulah da gat'n muji' Yesus ge' ayo'a pun nyiap pangkuman Paskah. Parjamuan Paskah ¹⁴ Jangkah laka tiba waktu'a, Yesus ge' ayo rasul unyung uman wak ngangkalilikng meja. ¹⁵ laka dakoh, Yesus nyansana ka ayo'a, "Iko' ngate sakali uman hidangan Paskah diah samahu imu', sabalum Iko' manderita. ¹⁶ Sabab Iko' nyansana ka imu', Iko' kati aok uman'a agi sampe hal diah gat'n nganganap ka sadat'n Kerajaan Jabata." ¹⁷ Lalu, Yesus nangkap ucung barisi anggur ge' ngucap syukur, laka dakoh, nyansana, "Nangkaplah ucung diah ge' bagi ta lah wak antara imu'. ¹⁸ Sabab, Iko' nyansana ka imu' kalo mule mati' Iko' kati aok nyucur anggur sampe Kerajaan Jabata utukng." ¹⁹ Laka dakoh, Yesus nangkap roti ge' ngucap syukur, Ini' mucuh-mucuh roti dakoh ge' mangkat'n'a ka ayo'a gae nyansana, "Roti diah diu'ta ungan-Ko' da gat'n mangkat'n ka imu'; bulah ta lah diah sabage paringatan ka Iko'." ²⁰ Ladiah uga, ngalaka uman, Yesus nangkap ucung anggur ge' nyansana, "Ucung da gat'n nuntokng bagimu' diah diu'ta Parjanjian bahu ka sadat'n daya-Ko'. Muji' tentang Sok da Nyarah Yesus ²¹ Tapi aok'a, milelah, barekng sok da aok nyarah Iko' ani samahu nige Iko' wak meja diah. ²² Sabab, Anak Talino aok anu nige cara ulah da laka gat'n natap, tapi calakalah sok da nyarah Ini'!" ²³ Murid-murid-A mansikat'n nyungan nige da lait'n tentang asi wak antara ayo'a da aok bulah. Jadilah Sok da Malayani ²⁴ Badaru uga terjadi wak antara ayo rasul tewntang asi ta wak antara ayo'a da gat'n nganggap paling aihyo. ²⁵ Tapi aok'a, Yesus nyansana ka ayo'a, "Raja-raja bangsa da kati nganal Tuhan bakuasa ka samo rakyatr'a, ge' ayo-sok da bakuasa ka samo raja-raja dakoh gat'n nyabut 'Palindung Rakyat.' ²⁶ Tapi, imu' iya' ulah dakoh. Sabalik'a, da paling aihyo wak antara imu' arus batindak ulah da paling angot, ge' pamimpin arus jadi ulah palayan. ²⁷ Asi da labih aihyo, sok da unyung uman ato da malayani? Inya ta sok da unyung uman? Tapi, Iko' ani wak tauda-udamu' sabage sok da malayani. ²⁸ imu' diu'ta ayo-sok da tatap samahu-Ko' ka sadat'n pancobaan-pancobaanKo'. ²⁹ Barang dakoh, Iko' mangkat'n ka imu' nyabuah kerajaan, ulah da gat'n mangkat'n Bapa-Ko' ka Iko', supaya imu' kaat'n uman ge' nyucur nyameja nige-Ko' ka sadat'n Kerajaan-Ko'. Ge', imu' aok unyung wak samo taktha yak manghakimi kadua balas suku Israel." Petrus aok Nyangkal Yesus ³¹ "Simon, Simon, dangah ta Iko'. Sitan nuntut yak nayap imu' ulah gandum, ³² tapi Iko' laka badoa yak imu' supaya imanmu' iya' gugur. ge', ngalaka imu' batobat, kuat ta lah ayo-agemu." ³³ Tapi, Petrus nyansana ka Yesus, "Tuahn, iko' siap gat'n manjara bahkan kabis samahu-Mu'!" ³⁴ Naham Yesus ka ini', "Iko' nyansana ka imu', Petrus, ano diah siap jantan kati aok ngangku'a sebelum taru kali imu' nyangkal kalo imu' nganal Iko'." Basiap-siap ta ngadap da sulit ³⁵ Laka dakoh, Yesus mansikat'n ka ayo murid, "Jangkah Iko' ngutus imu' tanpa kantong, uang, tas, ato sandal, tarut'n jai da mu' kurang?" Ayo'a naham, "Kati." ³⁶ Wat'n-A ka ayo'a, "Tapi mati', asi pun da ani ba kantong uang ato tas da minsakng. Ge, asi da kati ani pedang te'a ni' nyual jubah'a ge' mari pedang. ³⁷ Sa' Iko' nyansana ka imu' kalo jai da gat'n ka sadat'n Kitab Suci diah arus gat'n ngangenap wak sadat'n Iko', 'Ini' aok taritong samahu ayo-sok baduse.' Sa', da gat'n nulis tentang Iko' sedang terjadi mati'." ³⁸ Lalu ayo'a nyansana, "Milelah Tuhan, wak teet'n ani dua ungan pedang." Ge', Yesus nyansana, ka ayo'a, "Dakoh cukup." Yesus Badoa wak Taman Getsemani ³⁹ Laka dakoh, Yesus mungkas ge' anu ulah ka Bukit Zaitun ulah da biasa gat'n bulah-A; ge' ayo-murid-A uga anu nganang Ini'. ⁴⁰ Jangkah Yesus sampe wak tampat dakoh, Ini' nyansana ka ayo'a, "Badoalah supaya imu' iya' maruh ka sadat'n pancobaan." ⁴¹ Laka dakoh, Yesus ngajauh adup umpat'n ayo'a kira-kira jauh nyakali nyangkahat'n batu, lalu balutut ge' badoa, ⁴² "Bapa, sa' Akup'm ituh, naaplah cawan diah umpat'n-Ko'. Tapi aok'a, iya'lah kainginan-Ko' da terjadi, malait'nkan kainginan-Mu'." ⁴³ Ngalaka dakoh, sok malaikat umpat'n saruga nampak umpat'n ka-Ini' ge' nguat-A. ⁴⁴ Ge', ka sadat'n panderitaan-A, Ini' badoa labih sungguh-sungguh agi; adas-A manjadi ulah titesan daya da nites ka tana. ⁴⁵ Jangkah Yesus salesai badoa, Ini' anu ka murid-murid-A ge' kaat'n ayo'a sedang buus barang basedih. ⁴⁶ Yesus nyansana ka ayo'a, "Nyai imu' buus? Umpat ge' badoalah supaya imu' iya' maruh ka sadat'n pancobaan." Yesus Gt'n Nangkap ⁴⁷ Jangkah Yesus masih nyansana, utuknglah rumbongan sok; ge' ini' da gat'n nyebut Yudas, salah satu umpat'n kadua balas murid dakoh, mimpin ayo'a. Lalu, Yudas ngariket Yesus yak nyium-A. ⁴⁸ Tapi aok'a, Yesus nyansana ka ini', "Yudas, asi ta imu' nyarah Anak Talino nie Ciuman?" ⁴⁹ Jangkah murid-murid da agut'n ngangkalilikng-A mile jai da aok terjadi, ayo'a nyansana, "Tuhan, arus ta kai nyarang nige pedang?" ⁵⁰ Laka dakoh, salah satu umpat'n ayo murid dakoh nyarang palayan Imam Agung hingga nabas rajak santao'a. ⁵¹ Tapi aok'a Yesus nyansana, "Laka, cukup!" Lalu, Yesus manjamah rajak palayan dakoh ge' nyembuh'a. ⁵² Laka dakoh, Yesus nyansana ka imam-imam kapala, kapala pangawal Bait Jabata, ge' pangama-pangama da utukng yak nangkap-A, "Nyai imu' samaan utukng nige pedang ge' pentungan seakan-akan hendak nangkap parampok? ⁵³ Jangkah Iko' samahumu' wak Bait Jabata satiap kano, imu' kati nangkap Iko'. Tapi, diahlah saat'a bagimu' ge' bagi kuasa kegelapan." Petrus Nyangkal Yesus ⁵⁴ Ngalaka nangkap-A, ayo-sok dakoh pun mabirek ge' minsakng Yesus ka ramin imam aihyo. Tapi aok'a, Petrus nganang ayo'a umpat'n jauh. ⁵⁵ Ge' ngalaka nutukng api wak tauda-uda kalangan ge' unyng samahu-mahu, Petrus uga unyung wak antara ayo'a. ⁵⁶ Tapi, sok palayan mahu da mile Petrus unyung wak riket parapian dakoh nyadihi' bahas Petrus lalu nyansana, "Sok diah uga samahu nige-Ini'." Tapi aok'a, Petrus nyangkal, wat'n'a, "Hei mahu, iko' kati nganal Ini'." ⁵⁸ Kati tuhi laka dakoh, sok da lait'n mile'a ge' nyansana, "Imu' uga termasuk salah satu umpat'n ayo'a!" Tapi Petrus nyansana, "Kati, iko' inya salah satu umpat'n ayo'a!" ⁵⁹ Kira-kira satu jam lakadakoh, sok da lait'n agi nyansana nige yakin, "Pasti sok diah uga samahu nige-Ini', sa' ini' uga sok Galilea." ⁶⁰ Tapi aok'a, Petrus nyansana, "Iko' kati pane jai da imu' nyansana ijah!" Saat dakoh uga, salagi Petrus masih nyansana, ngangku'alah siap jantan. Lalu, bapalinglah Yesus ge' mandang Petrus. Ge', Petrus taringat aok perkataan Yesus, kalo Ini' nyansana ka ini', "Sebelum siap jantan nganku'a ano diah, imu' laka nyangkal Iko' sabanyak taru kali." ⁶² Laka dakoh Petrus anu ka sato ge' munse nige aru sedih. panjaga Manganiaya Yesus ⁶³ Ayo-sok da nahan Yesus mule ngijek ge' mukol-A. ⁶⁴ Ayo'a nutup matu-A ge' nyansana, "Banubuatlah! Asi da mukol Akup?" ⁶⁵ Ayo'a uga muji' karah hal lait'n da nantang-A nige manghina-A. Yesus wak Hadapan pamimpin Yahudi ⁶⁶ Pas jakap ano'a, pangama-pangama pamimpin Yahudi, imam-imam kapala, serta ahli-ahli Taurat bakumpul ge' minsakng Yesus ka Mahkamah Agama ayo'a. ⁶⁷ Ayo'a nyansana, "Sa' Akup'm diu'ta Mesias, muji'ta lah ka kai'." Tapi Yesus nyansana ka ayo'a, "Sa' Iko' mangkat'n pane ka imu', imu' kati aok pacaya ka-Iko'. ⁶⁸ Ge' sa' Iko' mansikat'n ka imu', imu' kati aok naham. ⁶⁹ Tapi aok'a, mule mati' Anak Talino aopk unyung wak suut'n santao Jabata da Mahakuasa." ⁷⁰ Ayo'a samaan nyansana, "kalo ladakoh, jai ta Akup'm Anak Jabata?" Yesus naham ayo'a, "imu'lah da muji' kalo Iko'lah Ini'." ⁷¹ laka dakoh, ayo'a nyansana, "Kasaksian jai agi da ite butuh? Ite laka dangah'a sadi umpat'n baba-A!"