¹ Sabab, satiap imam da ayho da gatn milih ka antara talino gatn nujo' ya' jadi wakel talino sadat'n hal-hal da barhubung nige' Jabata, supaya Ini' kaat'n mamparsambah sambahan-sambahan ge' korban-korban gat'n duse-duse. ² Sabab imam da ayho panhu nige' kakurangan, maka ini' uga harus basikap ramah ka ayo'a' da kati' umpu pangatahuan ge' da mudah tasasat. ³ Koh ta sabab'a' , Ini' wajib mamparsambah korban iyak ngapus duse, inya ya' umat sadi', tatapi ya' adup'a' uga. ⁴ Kati' ani imam da ahyo da aba' nangkap kahormatan diah ya' adup'a' sadi', ini' hanya narima'a' waktu ini' gatn Jabata maba' samu hal'a' ge' Harun. ⁵ Ladakoh uga Ksistus kati' ngamulia adup'a' sadi' ya' jadi Imam Ayho, tatapi uleh Ini' da muji ka Ini', " Imulah Anak-Ko. Ano diah Iko ngalaka jadi Samak-Mu'." ⁶ Samu ge' Firman da lait'n uga muji', " Imulah Imam ya' salama-lama'a', manurut paraturan Melkisedek. ⁷ Sadat'n idup-A sebage talino, Yesus mamparsambah doa ge' pamahi nige' kaung'a', ka Ini' da kaat'n nyalamat-A umpat pangkabis. Ge', Ini' gatn dangah karna kasalehan-A. ⁸ Waloupun Yesus anilah Anak, tatapi Ini' balajar ya' taat malalui panderitaan da gatn Ini' ngalami. ⁹ Sak ngalaka gatn nyampurna , Ini' ngajadi sumber kasalamatan da kekal bagi samaan sok da taat ka-Inik, ¹⁰ Ge' ini' laka Jabata maba' sebage Imam Ayho sasue ge' paraturan Melkisedek . Ngalangkah ka Kadewasaan Rohani ¹¹ Ani karah da kaatn gatn muji manganai hal diah. Tapi da susah ya' manjelas'a' karna imu' laka nga jadi sawe ya' ngadah'a'. ¹² Sabab, waloupun mati' diah saharus'a' imu' ngajadi pangajar, tapi nyata'a' imu' masih palalu sook ya' ngajarmu' agi' manganai prinsip-prinsip dampar ka firman Jabata. Imu' masih palalu susu, inya pangkuman da sagek'ng. ¹³ Sabab, sok da idup umpat'n susu anilah sok da katinga bapangalaman sadat'n maham ajaran da taman, ini' masih angot. ¹⁴ Aok ladakoh, pangkuman da sagek'ng anilah ya' ayo sok da ama, dakohlah ayo da malatih undra ayo'a' ya' ngabeda da bait ge' da jahe'.