¹ Sa' ite ani karah saksi da nyangkalilikng ite ulah rahu, kaeh ite ngangat'n samaan beban ge duse da minsakng te' ge talama nige tekun ka parlombaan da gat'n nyadia ka tura ite. ² Katea matu te tatuju ka Yesus, Sang pancipta ge' da nyampurna iman te', da demi sukacita da ngalaka gat'n natap mangkat'n'a rela nanggong Salib ge' mansawat'n'a gat'n ngangkamanya salib dakoh ge' da mati' ini' unyung ka suut'n santa'o tahta Jabata. ³ Ingatnih aok Yesus, da tabah manghadapi pamusuhan umpat'n ayo-sok da baduse biar jiwamu' kati jadi rangut ge putus asa. Jabata dakoh ulah sook Sama' ⁴ Ka sadat'n pajuanganmu' ngalawan duse, imu' ti' nga sampe tuntokng daya'mu'. ⁵ Ge, jailah imu' ngalaka ngarimut nasehat da gat'n mangkat'n ka imu' samu ayo-kangot? " Hei anakko' iya' nganggap inteng didikan Tuhan, ge' iya' misa' inek ate sa' mu' gat'n Na' nagor. ⁶ Sa', Tuhan ngajar sok da gat'n na' nganyayang ge' gat'n mantokng sok da umpu-A samu kangot." ⁷ Imu' arus batahan demi didikan dakoh barang dakoh barati Jabata sadakngkan ni' mamparlakumu ulah sok kangot; agipun, kangot samu jai da kati' parnah gat'n ngadidik sama'a? ⁸ Sa' mu' kati parnah umpu didikan da arus gat'n umpu samaan kangot, imu' talah anak haram, inya anak da sah. ⁹ Salit'n dakoh, ite umpu sama' ka dunia diah da mandidik ite', ge' da ite manghormat; sa' ladakoh, inyakah ite' arus labih agi tunduk adup ka Bapa da ka samo' samaan roh ge da ka samo' idup? ¹⁰ Sabab, sa' sama' ite' da ani ka dunia diah manghajar ite ya' waktu da singkat samu ge' cara da ayo'a nganggap paling bait, Bapa da ani ka saruga manghajar ite' demi da bait adup te' biar te' kaat'n bagian ka sadat'n da kudus-A'. ¹¹ Samaan didikan, da gat'n mangkat'n memang kati awhat'n da anap. Tapi aok'a ngalaka dakoh aok kaat'n buah da taman ge' mangkat'n damesejahtra ka ayo'a da ngalaka gat'n malatih didikan dakoh. Milenih Cara Idupmu' ¹² Sa' dakoh, da nguat barekngmu' da rangut ge' abak tukukngmu' da rangut, ¹³ Umas pagala da tamut ya' kaja'mu' sa' raka'mu' rangut kaja' da lamah kati jadi lumpuh, tapi gat'n ngangkawhat'n. ¹⁴ Nalama'mih dadame nige samaan sok' da nalama' da kudus, tanpa da kudus, kati nyunganpun da kaat'n mile Tuhan. ¹⁵ Da masti supaya iya' ani nyunganpun da ilang anugerah Jabata; da masti uga supaya iya' ani akar peet da numbuh ge' da nimbul masalah sahingga mancemari sok karah. ¹⁶ Ge' da masti supaya iya' ani sok da umas cabul ato kati suci ulah Esau da nyual hak'a da ama' demi nyamangkok pangkuman. ¹⁷ Sa' mu' pane kalo kap ari, pas Esau ngate warisan barakat dakoh, ini' gat'n nolak ge' kati ani agi ka sampatan ya' batobat nyakalipun ini' najo'a nige kamarunyo' pait'n matu. ¹⁸ Sa' mu' kati utukng ka gunung da pane gat'n marap ge' api da ngangkidup ato ka patakng, kakelaman, ge badai. ¹⁹ Imu'pun kati utukng ka sarat'n trompet, ge ka sarat'n da nyansana umas ayo'a dangah mahi nige da ahyo' supaya kalo nyansana dakoh kati gat'n nyansana agi ka ayo'a. ²⁰ Sa' ayo'a kati kaat'n batahan dangah parintah da gat'n mangkat'n, "Bahkan sa' nyungan banatang nyakalipun da marap gunung dakoh maka banatang dakoh arus gat'n mun u' ge' batu sampe kabis." ²¹ Ge', sa' samu dakoh buut ta mile dakoh sampe'-sampe' Musa nyansana, "Iko' bagagar buut." ²² Sa' imu' ngalaka ka gunung sion ge' ka kota Jabata da idup, Yerusalem sarugawi, ge' ka malaikat da kati gat'n ngitong jumlah'a, ²³ Imu' ngalaka utukng ka kumpur jemaat da ahyo da gat'n mantagut'n umpat'n ayo-kangot da ama' Jabata da nga tadaftar kasaruga, ka Jabata, Hakim ka samo samaan sok, ge' ka roh ayo-sok da taman gat'n nyampurna. ²⁴ Imu' nga utukng ka Yesus, Parantara Perjanjian da bahu, ge' ka daya' da gat'n macek, da nyansama labih bait daripada daya' Habel. ²⁵ Damasti supaya iya' imu' nolak Ini' da nyansana. Barang sa' ayo'a da nolak Ini' da mangkat'n sanuut umpat'n bumi sadi kati kaat'n ngarapas adup, maka itepun kati aok kaat'n ngarapas adup umpat'n Ini' da mangkat'n sanuut umpat'n saruga. ²⁶ Idu', sarat'n'-A nguncang bumi, tapi mati' Ini' bajanji, "Sa' nyakali agi iko' kati cuma aok nguncakng bumi, tapi uga saruga." ²⁷ Damuji' "nyakali agi" ni' muji' tentang ngangkuhas hal-hal da kaat'n gat'n ngule, ladakoh samaan da ngalaka gat'n mancipta, biar hal-hal da kati' gat'n ngoyah kaat'n madi tatap. ²⁸ Barang dakoh, ngalaka te' umpu karajaan da kati tergoyahkan, kaeh ite, nyua' rasa syukur te' nige mampersambahkan ibadah da layak ka Jabata, da gat'n nyerta rasa hormat ge' pahnu kagum, ²⁹ Sa' Jabata ite' diuta api da sahu.