¹ laka dakoh, Imam Aihyo muji, "diu'ta taman ladiah?" ² Ge', Stefanus muji', "Ayo-age ge sama'-sama', daangah ta iko'. Jabata da Mahamulia nampak ka ninek moyang ite, Abraham, pas ini' masih madi wak Mesopotamia, sabalum ini' madi wak Haran, ³ ge' muji' ka ini', 'anulah umpat'n tana'mu ge' umpat'n ayo-agemu', lalu utuknglah ka tana' da aok gat'n nujo ka imu'. ⁴ Laka dakoh, Abaraham ngagat'n tana' sok Kasdim ge' madi wak Haran. Ge' umpat'n teet'n, ngalaka sama'a ninggal, Jabata ngadu'a pindah ka tana' diah, tampat mati' imu' madi. ⁵ Sa', Jabata kati mangkat'n warisan ka ini', bahkan satapak tana' pun kati, tapi bajani ya' mangkat'n'a ka Abraham sabage umpu'a ge' katurunan ngalaka ini', maskipun Abraham ti'nga umpu anak. ⁶ Tapi aok'a, Jabata muji' ladiah, kalo katurunan'a aok jadi pandatang wak tana' da asing ge' kalo ayo'a aok gat'n ngakabudak gae gat'n nganiaya salama ampat ratus taun. ⁷ 'Sa' Iko' aok ngukum bangsa da mamparbudak ayo'a, 'wat'n Jabata, 'Ge', ngalaka dakoh ayo'a aok mungkas umpat'n teet'n ge' sambayang ka-Iko' wak tampat diah.' ⁸ Lalu, Jabata mangkat'n ka Abaraham pajanjian baturih maka Abraham jadi sama' Isak ge' baturih saat baumur mani ano ge' Isak sama' Yakub ge' Yakob, ka dua balas sama' laluhur. ⁹ Karna iri ka Yusuf, sama' laluhur ite nyual'a ka Mesir. Tapi aok'a, Jabata Manyertai Yusuf, ¹⁰ ge' nyalamatkan'a umpat'n samaan panderitaan, gae mangkat'a anugerah ge' kabijaksanaan wak tura Firaun, Raja Mesir, da umas'a jadi pamimpin ka samo Mesir ge' saluruh istana'a. ¹¹ Pas waktu'a, bancana saburuk tarjadi wak saluruh Mesir ge' Kanaan, gae manyababkan panderitaan da paling aihyo, ge' sok dama' idu' ite kati bisa kaat'n pangkuman. ¹² Tapi aok'a, pas Yakub dangah kalo ani gandum wak Mesir, ini' ngadu sok dama'a utukng ka teet'n ya' partama kali'a. ¹³ Pas kunjungan da kadua, Yusuf umas adup'a gat'n pane uleh ayo-age'a, ge' kaluarga Yusuf jadi jelas bagi firaun. ¹⁴ Ngalaka dakoh, Yusuf mangirim pusut'n ge' mangundang Yakub, sama'a, ge' samaan ayo-age'a, samaan'a bajumlah 75 jiwa. ¹⁵ Maka, Yakub disah ka Mesir ge' ini' kabis ka teet'n ini' ge' sok dama ite. ¹⁶ Umpat'n teet'n, ayo'a gat'n mindah ka Sikhem ge' gat'n nabarikng wak kuburan da laka Abraham mari nige sajumlah uang umpat'n anak-anak Hemor wak Sikhem. ¹⁷ Tapi aok'a, pas mangkin jiket waktu'a parjanjian dakoh, da laka Jabata ikrarkan ka Abraham, bangsa dakoh batambah ge' gat'n ngalipat gandakan wak Mesir, ¹⁸ Sampe ani raja lait'n bangkit ka samo saluruh Mesir, da kati pane tentang Yusuf. ¹⁹ Raja dakoh mampardaya bangsa ite sahingga makse ayo'a matat'n bayi-bayi ayo'a sahingga ayo'a kati kaat'n batahan idup. ²⁰ Pas masa dakoh, Musa lahir ge' ini' tampa elok wak matu Jabata. Ge', Musa gat'n nyamun wak ramin sama'a salama tiga burat'n. ²¹ Ge', putri Firaun naap'a ge' ngangkaihyo'a ulah anak'a sandiri. ²² Maka, Musa gat'n ngadidik ka sadat'n sagala hikmat ayo-sok Mesir ge' ini' bakuasa ka sadat'n parkataan ge' parbuatan'a. ²³ Barang, pas Musa ganap bausia ampat puluh taun, muncul ka sadat'n ate'a ya' mangunjung ayo-age'a, diu'ta katurunan Israel. ²⁴ Ge', pas mile sara' nyiteng umpat'n ayo'a gat'n mamparlaku nige kati adil uleh sok Mesir, Musa utukng mambela sok da gat'n nganiaya dakoh ge' mambalas nige ngamis sok Mesir dakoh. ²⁵ Musa ngira kalo ayo-age'a aok ngerti kalo Jabata mangkat'n ayo'a kasalamatan nabo adup'a, tapi ayo'a kati ngerti. ²⁶ Pas ano jakap'a Musa ka sok Israel da sadakng badaru, ge' ini' barusaha ngadu ayo'a dame, nige muji', 'Hei, inyakah ayo'kup'm ani hubungan ba age, jai saling mangkanap'm?' ²⁷ Sa', sok da mangkanap'm age'a dakoh nyingkir Musa ka suut'n sambil nyansana, 'Asi da ngadumu' bakuasa ge' hakim ka samo kai'? ²⁸ Jai'ta imu'; ngate ngamis ko' ulah imu' ngamis sok Mesir dakoh rami?' ²⁹ Dangah sarat'n sok dakoh, Musa boho adup'a ge' jadi pandatang wak tana Median. Wak teet'n, ini' jadi sama' umpat'n dua ungan anak are-are. ³⁰ Pas laka ganap ampat puluh taun, nyungan malaikat nyua adup'a ka Musa wak padakng balantara gunung Sinai, sadat'n rata' api wak rumpo unak. ³¹ Waktu musa mile'a, ini' heran nige pamile'a dakoh. Ge', waktu ini' ngariket'a ya' namparu'a, utuknglah sarat'n Tuhan, ³² 'Iko'lah Jabata ninek moyang mu', Jabata Abraham, ge' Jabata Ishak, ge' Jabata Yakub.' Musa pun bakutur buut ge' kati pagat'n ya namparu'a. ³³ Laka dakoh, Tuhan nyansana ka ini', 'da muhu sandal umpat'n kajamu' barang tampat wak ume imu' agut'n diu'ta tana suci. ³⁴ Iko' taman-taman ngalaka mile panderitaan umat-Ko' da ani wak Mesir ge' laka dangah ayo'a ge' iko' laka disah ya' nyalamat ayo'a. Ge' mati' kaehlah, Iko' aok mangutusmu' ka Mesir.' ³⁵ Musa, da ngalaka ayo'a nolak nige nyansana, 'Asi ta da ngadumu' bakuasa ge' hakim ka samo kai'?' Ini' diu'ta sok da Jabata utus ya' jadi, bait bakuasa maupun panyalamat, nabo barekng malaikat da nyua adup'a ka ini' wak rumpo unak. ³⁶ Sok diah mimpin ayo'a mungkas, sambil nyua mukjizat ge' tande-tande ajaib wak tana Mesir, ge' wak Laut taransak, ge' wak padakng balantara salama ampat puluh taun. ³⁷ Musa diahlah da nyansana ka bangsa Israel, 'Jabata aok ngabangkit bagimu' nabi ulah iko' umpat'n antara ayo-agemu'.' ³⁸ Ini' diah diu'ta sok da ani wak antara jamaat wak padakng balantara samahu malaikat da nyansana ka ini' wak gunung Sinai, ge' samahu ninek moyang ite, ge' ini' laka narima firman da idup ya' mangkat'n ka ite. ³⁹ Ninek moyang ite nolak ya' taat ka Musa, tapi nyingkirkan'a ge' ngate kambali ka Mesir ka sadat'n ate ayo', ⁴⁰ nige nyansana ka Harun, 'umaskan kai' dewa-dfewa da aok bajalat'n wak depan kai' barang Musa diah, da mamimpin kai' mungkas umpat'n tana Mesir, kai' kati pane jai da laka tarjadi ka ini'.' ⁴¹ Pas waktu daoh, ayo'a umas nyabuah patung anak lambu, ge' mangkat'n parsembahan ka bahala dakoh, gae basorak-sorai nige karaje-karaje barekng ayo'a. ⁴² Tapi aok'a, Jabata bapaling umpat'n ayo'a ge' mambiar ayo'a manyambah bala tantara rangit, ulah da gat'n nulis ka sadat'n kitab para nabi, ' Diu'ta imu' minsakng ka-Iko' binatang sambelihan ge' parsembahan salama ampat puluh taun wak padakng balantara, he' umat Israel? ⁴³ Imu' minsakng kemah Molokh ge' binatang dewamu', Refan, patung da imu' umas ya' manyambah'a, ge' Iko' aok matat'nmu' ka sabarang Babel.' ⁴⁴ Ninek moyang ite umpu kemah kasaksian ka padakng balantara, samu da Jabata marintah ayo'a nyansana ka Musa, ya' umas'a sasuai nige gambar da ngalaka ini' mile. ⁴⁵ ngalaka narima kemah dakoh, ninek moyang te' minsakng maruh samahu Yosua, ano parbuatan tana ayo'a umpat'n bangsa-bangsa lait'n, da laka Jabata nyingkir umpat'n tura ninek moyang te, sampe ka zaman Daud. ⁴⁶ Daud kaat'n kasih karunia wak tura Jabata ge' mahi ya' kaat'n tampat pamadi bagi Jabata Yakub. ⁴⁷ Tapi aok'a, Salomo da mantagut'n ramin bagi Ini'. ⁴⁸ Sa', da Maha tinggi kati madi ka sadat'n ramin da gat'n umas uleh barekng talino, ulah da gat'n muji uleh nabi, ⁴⁹ 'Rangit diu'ta takthaKo' ge' buni diu'ta tumpuan kaja-Ko'. Ramin diu'ta da aok imu' mantagut'n bagi-Ko'?' Jabata bafirman, 'Ato, diu'ta tampat paristirahatan-Ko'? ⁵⁰ Inyakah barekng-Ko' da umas samaan'a diah?' ⁵¹ Hei, imu' ayo-sok da karas kapala, nige ate ge' rajak da kati baturih, imu' slalu manantang Roh Kudus , ulah da gat'n bulah uleh ninek moyangmu! ⁵² Nabi-nabi ume da kati gat'n nyiksa uleh ninek moyangmu? Ge', ayo'a ngamis ayo-sok da sabalum'a laka ngumum pajutukng sang Kabanaran, da mati laka jadi adupmu' sadi sabage pangkhianat ge' pangamis. ⁵³ Imu', da laka narima Hukum Taurat ulah laka gat'n nyampe uleh ayo malaikat, tapi imu' kati ngajaga'a!'" Stefanus Gat'n ngamis ⁵⁴ Ano ayo'a dangah hal-hal diah, ate ayo'a tatusuk ge' bagaraget japu ayo'a tradap Stefanus. ⁵⁵ Tapi aok'a, Stefanus da gat'n ngampahnu uleh Roh Kudus mile ka rangit ge' mile kamuliaan Jabata, ge' Yesus agut'n wak suut'n kanan Jabata. ⁵⁶ Stefanus nyansana, "Dangah! Iko' mile rangit tabuka ge' Anak Talino agut'n wak suut'n Jabata." ⁵⁷ Sa', ayo'a kaekng-kaekng nige sarat'n da karas, ge' nutup rajak ayo'a, gae sapakat manyerbu Stefanus. ⁵⁸ Lalu, ayo'a ngarihit'a mungkas umpat'n kota ge' mule munu'a nige batu. Laka dakoh, ayo saksi matu muhu jubah ayo'a wak kaja sok nyungan kangot bagaat'n Saulus. ⁵⁹ Ge', ayo'a malar narajang Stefanus da sadakng baseru ge' nyansana, "Tuhan Yesus, tarimalah rohko'." ⁶⁰ Laka dakoh, ngalaka balutut, ini' baseru nige sarat'n karas, "Tuhan, iya' tanggongkan duse diah ka ayo'a!" Ge', ngalaka nyansana'a ini' pun kabis.