¹ Akhir'a, age-age, bado'alah untuk kai, supaya firman Tuhan abak gaatn nyebar secepat'a ge gaatn mulia. Samu da terjadi ka antara kupm, ² ge supaya kai gatn ngarapas umpatn ayo sok da kejam ge da jahe barang ti samaan sook ani ba iman. ³ Namun, Tuhan koh setia. Inik aok nguat ge ngelindung kupm umpatn da jahat. ⁴ Kai ani keyakinan ka sadatn Tuhan tentang kupm bahwa kupm sadakng ngelaku jai da kai merintah. ⁵ Kira'a Tuhan ngarahkan atemu ka kasih Allah ge ka katabahan Kristus. Kewajiban untuk bakaraje. ⁶ Age-age, mati'k kai ngadu ayo kupm, kasadatn gatn Tuhan ite, Yesus Kristus, supaya imu ngejauh adupmu'k umpatn age-age da idup'a ba malas-malas ge ti sesuai ge ajaran da kupm terima umpatn kai. ⁷ Kupm sadi'k pane langkina kupm harus bateladan ka kai karna kai kati bamalas-malas waktu kai beriuh ge imu. ⁸ Kai uga kati uman pangkuman sook lait'n da kati gatn bayar, sebalik'a , kai barusaha ge karaje karas asat ge ngarum supaya kai kati jadi beban ka asipun ka antaramu. ⁹ Inya karna kai kati ani hak untuk dakoh, tapi untuk mangkatn adup kai jadi contoh ka kupm untuk kupm nurut. ¹⁰ Waktu kai masih samu-samu ge mu'k pun, kai angkatmu'k perintah diah; "Jika sok ti ituh bakaraje, usahlah ni'k uman." ¹¹ Sbab, kai dangah ani beberapa ka antaramu'k da idup bamalas-malas , kati ituh bakaraje , tapi sibuk ge hal-hal da ti'k bagune. ¹² Sok da samu koh kai ngadu ge kai nasehat kasadatn gatn Tuhan Yesus Kristus untuk bakaraje nige tenang ge uman roti adup'a. ¹³ Sadakng kupm, age-ageko, iyaklah lalah umas da bait. ¹⁴ Jika ani sok da ti'k taat jai da kai muji kasadatn surat diah, nandelah sok dakoh ge usah bagaul nige'a supaya ini'k jadi mangun. ¹⁵ Namun, usah perlakukan ini'k ulah musuh, tapi nagorlah samu ayo'k agemu'k. Sarat-sarat pangkhunyi. ¹⁶ Tuhan damai sejahtera kira'a angkatnmu'k kedamaian satiap waktu ge ka sadatn samaan keadaan. Tuhan nyerta kupm samaan. ¹⁷ Iko, Paulus, nulis salam diah nige barek adup'ko sebagai tande asli'a suratko. Lakohlah iko nulis'a. ¹⁸ Anugrah umpatn Tuhan ite, Yesus Kristus, danyerta kupm samaan.