¹ Mati'k, tentang pajutukng'a Tuhan ite, Yesus Kristus, ge waktu ni'k nyatu te'k samu-samu ge Ini, kai mahimu'k, age-age, ² supaya kupm iyak capat bingung kasadatn pamikiranmu'k ato gelisah pas waktu dangah ano Tuhan nga utuk, bait umpatn roh * ato pusutn ato surat da seulah-ulah'a umpatn kai. ³ Iyak mambiar nyungan sookpun nyasatmu'k nige cara jai pun. Sbab, ano dakoh kati akan utukng sampe kemurtatan utukng ge si talino da jahe'k ninganyata, dakohlah si anak kebinasaan. ⁴ da melawan ge ninggi adup'a teradap samaan da gat nyebut allah ato da sook nyambah; ge ini aok nangkap tampat unyung ka Bait Allah ge nganyata adup'a sebage Allah. ⁵ Kati snuut'a kupm bahwa waktu iko maseh kadeketmu'k, iko ngamuji hal diah kaimu'k? ⁶ Mati'k, imu'k pane jai da nahan ini'k sampe utuk saat'a jana, ini aok da gat nyata. ⁷ Sbab, misteri kadurhakaan nga sadakng bakaraje, hanya inik da mati'k nganahana aok tatap sampe ini gat nyigkir. ⁸ Laka dakoh, talino da jahe aok da gat nyata. Namun, Tuhan ao ngamis'a nige singat baba'a ge ngalanyap'a nige pajutukng'a. ⁹ Pajutukng si talino da jahe dakoh aok samu'k ge pakaraje Iblis*, serta nige sagala macam kuasa, tande-tande ajaib, ge mujisat-mujisat palsu; ¹⁰ ge nige samaan muslihat da jahe bagi ayo'a da aok binasa karna ayo'a kati ituh nganyayang kebenaran sehingga gat nyelamat. ¹¹ Oleh karna dakoh, Allah ngirim kesesatan da hebat ka ayo'a da pecaya ka da laceh, ¹² sehingga ayo'a samaan katn gatn hakimi, dakohah ayo'a da kati pacaya ka kebenaran ge sanang nige da jahe. Kupm gat milih untuk gat nyelamat. ¹³ Age-age da gat Tuhan nyayang, kai harus slalu basukur ka Allah untuk kupm. Sbab, Allah nga laka milih kupm sejak dari mula'a untuk gat nyelamat lewat pengudusan nige Roh ge iman ka sadatn kebenaran. ¹⁴ Untuk dakolah Allah mabak kupm lewat Injil* da kai ngabar supaya kupm katn kemuliaan Tuhan kita, Yesus Kristus. ¹⁵ Jadi, age-age, agutnme tagap ge nyintelah ajaran-ajaran da nga laka gat ngajar ka kupm, bait lewat saratn-saratn uga lewat surat kai. ¹⁶ Mati'k, kira'a Tuhan ite, Yesus Kristus ge Allah Bapa te'k, da laka nyayang ite ge mangkatn te'k penghiburan da kekal ge pengharapan da lamus lewat anugrah'a, ¹⁷ nghibur ge nguat ate kupm kasadatn setiap pakaraje ge saratn da bait.