¹ Wed yong ni nuk ni'ebeng, ge yel ge midi mi, hok ni a'wa a'loin ma e'gen nang. ² Sebab, i'gin angkol i'gi a'ga gegel, midi de Lahtal gama yo goham a'gai i'ninok taka m'lek de a'kan ham-ham di ad. ³ Waktu de i'ninok noon u'hui, abang dama aman yo a'gai yah kat e ma bo ge gehel i'ni ta mung goham o'kne de klik ul gayaij boge, i'ni di hok lolos nang. ⁴ Deho ne nuk ne'ebeng noon, hok i'gi kui krang mi bah nang midi yo boga o'go ma goham a'gai i'ninok tataka. ⁵ I'gin i'gi a'al terang ge ma'manak pin yong hok kui krang ge nang. ⁶ Gan yo bo, iyeh pi ta nang goham a'gai i'ni e'beng yo'oyon deho made pi gobuk pa tataman. ⁷ I'ninok ta a'kan di ta, de i'ni de mabok yo di a'kandi mabok. ⁸ Deho, pin yong ma'manak il madel ge, made pi u'sadar bad zirah bo'mang iman e kasih, yo ketopong puin selamat u'harap. ⁹ Lahtal ga hok u'huih murka yo gotohok nang. Deho, slamat yo pi gel pe Tuhan Yesus Kristus gomi mi. ¹⁰ Wed a'ber yo tomamang, de pin yong meteh e ta'we pi gab bomi. ¹¹ Gan yo'oyon bo, bet yo go nuk de i'gi temomoy goham a'gai, wed i'geten yong o'yon. ¹² Ninok ni'ebeng noon, ni e'ge huih pe i'gini kreyang yo, ge nonok di i'ni yo Tuhan gomi mi i'gin u'gupuin. ¹³ I'nigin hargai yo a'dodob ma kasih gomi mi. I'nige kreyang yo, ma damai gomi mi, i'ni in mamang. ¹⁴ Ni ngrum godom, ne nuk ne'ebeng noon, i'ni de malas noon yo i'nigin tegor, i'ni gebet go godang, i'ni de bet nang a'gai yo ge moy di sabar ma i'ninok ia'al. ¹⁵ Ge ur iyeh i'ninok de totej yo gogawar nang deho nok poih bo geten ma i'ninok riyal gen. ¹⁶ Bersukacitalah wa po le. ¹⁷ Doa yo a'igeneh wa po le. ¹⁸ Syukur ma'hal yong ia'al, gan yowe Lahtal ge'glul ma Yesus Kristus gomi mi. ¹⁹ Roh yo u'geten nang. ²⁰ Nubuat-nubuat noon yo ge ur gamai nang. ²¹ Deho nagan karnuk yo, uji di nabe nok yo gopuin. ²² Nagan de yah kat ge, yo ge lelet. ²³ De Lahtal ge damai sejahtera angkol, kudus. De roh, jiwa, i'gihbok yo u'griyang de Tuhan Yesus Kristus gemidi ga'ad i'gi hok cacat nang. ²⁴ Gewe o'gokar yo setia, ga pasti godal ²⁵ Nenok ne'ebeng noon, a'ga nigin u'doa di. ²⁶ Nege temein yong ma nege e'beng ia'al u'ge huih dengan cium kudus. ²⁷ Demi Lahtal geneh, na u'ege huih de surat yong i'gi ma ne, ninuk ni e'beng de a'gai yop mi. ²⁸ Pe Lahtal Yesus Kristus ge anugerah yo a'ogo lam go mateh.