¹ Ne nuk ne e'beng nigi Tuhan Yesus gi ih mi u e'ge huih, u e'ge meteng, mode nabe i'gi med a'gai yo i'gi Lahtal gebet bo i'gi ge glul yo i'gi wa mugodal. ² Yo i'gi gel e nang, gohoy gatain ge de nigi u'huih gen a'gai i'gin u'hid yo Yesus Kristus ge kwah bo nigi u'huih. ³ Yong e Lahtal ge gebet erem e'ge dob ge, bo i'gi tbur yo ge lelet. ⁴ Bo i'gi a'ga gelmang, i'gi mu ti'oyon geten de i'gih yo ma kekudusan e kehormatan yo mi, ⁵ iyeh i'gih yo geten ge ur a'gai i'ninok de Lahtal gel nang yo oyon, ⁶ mode i'ni nok nuk di iyeh ge ik e ge om go tin, ak nang bo Lahtal yo we ge u gawar u gikil gitan gomi mi, gan yo we as mi nigi u e'ge huih u e'ge meteng. ⁷ Lahtal ge tokar yo hok dos gahal ge nang, deho mode pa nai mohol bo ga ge tokar. ⁸ Yo ab i'ninok e nuk ga huh meteng yongo gawal nang yo ga hok i'ninok bo gawal nang deho yo ga Lahtal bo ga gawal nang. ⁹ Deho e'ge teomi tetang yo i'ni oloin e genang di nagan hok nang bo i'gin agangkol di Lahtal ga u ge huh a'gai mode i'gi a'ga teomi. ¹⁰ Bo e'ge saudara de Makedonia mi di ho i'ge godal a'gai deho wed ong i'gi wa u'ganok godal. ¹¹ I godal mode i'gi i'irap mih, nagan karnuk yo agangkol a'ga godal, i'gitan yo puin godal, ge ur a'gai nabe ni e'ge huh yo ge glul. ¹² Mode i'gi i'ni ebeng gen m'ra g'dan lam ho o'gin yo munok mupoh, i'ni ebeng ga e'ge ur ho nagan karnuk mu ayeh mang. ¹³ Ne nuk ne ebeng noon, nege uyal ho i'ninok de e'ber a'gai yo i'gin di aga gel, mode i'gi iyeh dukacita i'gineh nang ge ur a'gai i'ninok de pengharapan gonang. ¹⁴ Wed pin de Yesus ge e'ber ge i'yes yo pagel, yo pi persay bo ga geminuk mi Lahtal ga i'ninok de Yesus gomi mi e'ber gama ago nuk. ¹⁵ Ongo Firman Tuhan bo na e'ge huh, pin de a'da pi'es, gen akal Lahtal ge ad u'hid, ho pi i'ninok e'ber a'gai yo getur nang. ¹⁶ Lahtal ga atal surga mi ga her, ukar u'olo malaikat noon ge gamang, Lahtal ge tropei ge amara ge ne i'ninok de Yesus Kristus mi e'ber yo boga etar meteh. ¹⁷ Nok bo pin de a'da pi'es a'da bulya mi, boga togunuk ga'tal bulgen le mid mode pi a'tal bultang mi Lahtal gotohok, bo pi Lahtal go to gunuk. ¹⁸ Gan yo ge bo huh meteng yongo pau te huh.