AARING UU T'RO'ONG YESUS HO'O HEANG 1 We do no diayl nun o yel e o toping du mi hulu med iiene dang. 2 Wede'e abulu-abulu ii a'hol Tuhan ho'o mong wede'e nami na ta'au, dil'uwu puyn ho'o na ta'au du'uyn. 3 Yel du arahama nami uubang do'oyn, "uuntu weseng med te mi tawoyl mong yehe-yehe hi mini tabang ho'o yuwunun arahama, mong wede'e, nami obo hining ey awayn o na ma'ala du'uyn ohowe yuwunun y'ano'o il yaha. 4 Ee du'uyn we no di'aylnun ii kuwu mi weseng dangang we yel du ho'o du'uyn hi aa mong wede'e nami na ta'au du'uyn dang. 5 Iibarrpi lele eyknewe dilele o eyknewe. Piring du dil'u med dilparang o nami no'o dang. 6 Ee du'uyn we ha'ay we pi tara mong wede'e nami beng du'uyn ey, ee du'uyn ma ee pi uuma mahe 7 Nami ba tara mopo dil'u we puyn tara mopo, dee nami ba labowo didi dil'u we mi labowo. 8 Du bo piring du dil lele o eyknewe, ma pi dil uuma ohowe kas haliling puyn. 9 Lahatala Ey piring med o eri'ing, o wayl, mi a'muydang. Dee iiloling du pi Tuhan we mi med ba pi Yesus Kristus du. 10 Ey mini pi barrpi tere'eng alele he ee me aatara mopo he ara hama-ham weseng no'o. 11 Ee du'uyn ee iibarrpi mi iiring mi kua'a no'ohi mi iiring tu'uy. Mong wede'e Ey arlenghe du'uyn. SALAM MED TAYOMPA'A O A'MUYU MI 12 No di'ayl nun ni iibang, "nami ba ati no'o-no'o he o kereyeng ba ara hieni hama mi du, nami iiyopong puyn ma ii Tuhan om mi, ba ii ehapa du iiuada ahol we" 13 yuwunun du atino'o uuada ahol, iiukarang om mi wede'e yuwunun o kereyeng du eyle. Uuntu senang ara uupiri nu nu ey weseng om mi. 14 Ni tu'uy toho, ni di'aylnun nami ba mara'ayn du ehapa o ba moling tu'uy ano'o kua'a o ba om kua'a dang du ano'o kua'a no'ohi pa'abala puyn nami no'o towong ara hama. 15 Edunu no'o no'o ee du'uyn he nami nu oho we yaha puyn uuaboro ereng dee no'o arleng iieni hama dumi. 16 Tomi no'o iiey masang. 17 Sembahyang o'ho yaha 18 Na leleng ayrnu mi Eni ta tra'ayn. Wede'e aring duru we Lahatala Ey om a'lolo, ma iiey weseng mi Yesus Kristus om mi. 19 Roh du a'mindang 20 Ha'ay we o na tahoyr du ano'o na den dang ey. 21 Ee dee na ayrnu du to'o a'le'e we, naba no'o a'puyn dumi 22 Yaha leleng ayrnu elete. 23 Ee du'uyn ee, Lahatala uuntu senang yel du iibarrpi iino'o m'dulung ohowe homi m'dulung ii'l'mana iiboo o uukarang om mi, na den yaha dang, yang pi Tuhan yo uuho'o. 24 Ey ba iilowi du a'wahabala Ey atino'o mi p'nene. 25 Ni di'aylnun, sembahyang niarahama. 26 Salam med no di'ayl barrpi ene, m'dulung om mi 27 Na atitino'o iibang Eni puyn suru oyndo ta'ana med no di'ayl barrpi dopo mi ene me'ehe. 28 Tuhan o uuntu snang Kristus Yesus ara iiarahamahama.