1 La i Kora ro gn'anakilahin'i Jizara anakilahin'i Kehata anakilahin'i Levy,miaraka amin'i Datana voho Abirama anakilahin'i Eliaba,voho Ona anakilahin'i Pelita, havorohotan'i Robena,la nampivory johary sasan-tsasany. 2 Nitsanga hagnohitsy an'i Mosesy rozy,ka nisondry tamin'reo johary hafa baka amin'gny olon' Israely,mpitariky fiangona dimapolo sy roanjato ze mpikamba fata-daza teo amin'gny fiangona. 3 Niaraky nivory rozy hihaona amin'i Mosesy voho Arona. Hoy rozy taminy: " Lasa lavitsy mare nareo! F a voatoka iaby gny fiangona,gnilany amin-drozy, i Yaveh la eo amin-drozy. Magnino ro manondrotsy gny vatanareo eo gny ambin'gny fiangonan'i Yaveh nareo?" 4 Lafa jan'i Mosesy zay,la nampiondriky gny tarehiny ie. 5 Nivola tamin'i Kora voho reo iaby ze nisondry taminy ie hoee: " Hampahaizin'i Yaveh reo ze Gnazy amin'gny maray voho ze voatoka ho Gnahy. Handesiny ho eo agnilany zay olo zay.Gny raiky zay voafily la handesiny hariniky gny vatany. 6 Ataovo zao,Kora voho gny tariny iaby. Alao gny fandaisa-bolo 7 hamaray voho asio bolo sy liti-kazo magnitsy agnatin'zay eo amin'i Yaveh. Gny raiky ze filin'i Yaveh,la voatoka ho an'i Yaveh zay olo zay. Lasa lavitsy mare iha ,ry taranak'i Levy. 8 La hoy ndraiky Mosesy tamin'i Kora hoee: " Mijanjigna hinanizao,nareo taranak'i Levy: 9 kely aminareo va gny nampisarahan-Ndranagnahry anareo tamin'gny fiangonan'Israely,mba handay anareo mariki-gny vatany,mba hanao gny asany ao amin'gny taberinakelin'i Yaveh,sady hijoro eo anoloan'gny fiangona mba hanompo androzy? 10 Nanday anao mariniky Ie,voho reo rahalahinareo iaby,taranak'i Levy,misondry aminao,nefa mbo mila gny fisorona avao koa nareo! 11 Zay no nitambaranareo voho gny tarikinao hagnohitsy an'i Yaveh. Ka nagnino nareo no mitaray mikasiky an'i Arona,zay magnenky an'i Yaveh?" 12 Nikaiky an'i Datana voho Abirama i Mosesy,gnanaky lahin'i Eliaba,fa nivola rozy hoe: "Tsy hiakatsy rahay. 13 Kely aminao va gny raha nagnandesanaoanay niakatsy niboaky gny tany maro ronono voho tantely,mba hamonoa gnanay agny agn'efitsy? Amizao la magniry gny vatanao hagnina eo aminay iha! 14 Ho fagnampiny zay,tsy nanday anay tagny amin'gny tany maro ronono voho tantely Iha,na nagnomea anay reo baiko voho tani-boaloboky ho lova.Amizao va Iha la magniry hahajiky anay amin'ireo fampagnantena tsy misy? Tsy ho aminao agny rahay." 15 Neloky mare i Mosesy noho nivola tamin'i Yaveh hoe: "Ka magneky gny fagnatitsiny.Tsy nangalaky na apondra raiky tamin-drozy zaho,voho tsy nagnisy raty na gny raiky tamin-drozy aza" 16 Sady Mosesy nivola tamin'i Kora hoe: "La tsy maintsy handeha eo amin'i Yaveh iha hamaray voho gny tarikinao iha sy rozy,noho Arona. 17 Samby ia mangalaky gny fandaisa bolony nareo iaby sady magnisy gny ditin-kazo magnitsy ao. Bakeo la engao handay gny fandaisa bolony eo amin'i Yaveh kiraikiraiky iaby,fandaisa bolo roanjanto sy dimampolo, Iha voho Arona,avao koa la aoka handay gny fandaisa bolonareo kiraikiraiky." 18 Nandrehitsy bolo tamin'zany kiraikiraiky gny olo ka la nangalaky gny fandaisa bolony,voho nitsanga teo amin'gny varavaran'gny trano lay fihaogna nisondry tamin'i Mosesy voho Arona. 19 Nampivory reo fivondrona iaby magnohitsy an'i Mosesy voho Arona teo amin'gny varavara tragno-lay fihaogna i Kora,sady niseho tamin'gny fivondrona iaby gny voninahits'i Yaveh. 20 La nivola tamin'i Mosesy voho Arona i Yaveh hoee: 21 " Saraho amin'ty fiangona ity gny vatanareo mbo ahafahako mandrava androzy direkita." 22 Nihohoky i Mosesy voho Arona ka nisafa hoee: " Ndranagnahary gny fagnahin'gny olombelo,laha magnota gny olo raiky,la nheloky amin'gny fiangona iaby va iha? 23 Namaly an'i Mosesy i Yaveh. 24 Hoy ie hoe: " Mivolagna amin'gny fivondrona. Mivolagna hoe: " Mienga amin'gny lain'i Kora,Datana,noho Abirama." 25 La nienga i Mosesy ka nandeha agny Datana voho Abirama;reo oloben' Israely la nangnaraky azy. 26 Nivola tamin'gny fivondrona ie ka nisafa hoe: " Amizao la nienga amin'reo lain'reoraty fagnahy ka aza mikitiky ndar ino ndra ino gnandrozy,tsy noho rava amin'gny alalan-dreo fahadisoana iaby iha." 27 Ka la niala an-drozy tamin'gny zoron'reo lain'i Kora,Datana,voho Abirama gny fivondrona.Niboaky i Datana voho Abirama sady nitsanga teo amin'gny varavagnan'gny lain-drozy,nisondry tamin'reo valiny,gnanaky lahy,voho reo maliniky. 28 Ary nisafa i Mosesy hoee: " Hinanizao ro ahahizanareo fa Yaveh ro nagniraky ahy hanao reo asa iaby reo,fa tsy nanao tamin'gny vetsevetseko avao zaho. 29 Laha maty amin'gny fahafatesa voajanahary manahaky gny raha mitiry vatany regny olo regny,la tsy nandefa gnahy Yaveh. 30 F a laha mamoro fisokafa amin'gny tany ze mitely an-drozy manahaky tsiovy bevata i Yaveh,miaraky amin'reo fianakaviany iaby,sady laha mijotso velo agny amin'gny fiaigna-tsy hita rozy,la ho hainao fa regny olo regny la tsy nidary an'i Yaveh. 31 Laha mbo tsy tampitsy gny fivolagnan'i Mosesy reo safa iaby reo,la nisokatsy teo ambonin'reo johary reo tany. 32 Nanokatsy gny tsioviny gny tany sady nitely an-drozy,reo fianakaviany,sady reo olo iaby zay gnan'i Kora,voho reo fananany iaby. 33 La latsaky velo tagny amin'gny fiaina-tsy hita rozy voho reo iaby tao amin'gny fianakaviany. Nihidy teo agnabon-drozy gny tany,sady tamin'zany ro nahalany an-drozy teo agnivon'gny fivondrona. 34 La nandositsy tamin'reo korakoraky reo Isrealy iaby magnodidy azy.Nikoiky rozy hoee:" Mety hitely antsika avao koa gny tany!" 35 La nagnelatsy gny bolo baka amin'i Yaveh sady nandrapaky reo 250 olo ze nagnome liti-kazo magnitsy 36 La nisafa tamin'i Mosesy ndraiky i Yaveh voho nivola hoee: 37 " Mivolagna amin'i Eleazara gnanaky lahin'i Arona mpisoro sady engao ie hamono gny bolo amin'gny fagnoroa gny diti-kazo magnitsy,fa gny fandaisa bolo la voatoka ho gnahy.La engao ie hampiely gny voam-bolo agny lavitsy. 38 Alao reo fandaisa bolon-drozy ze nimaty nohon'gny fahadisoany engao regny ho atao finga voatefy mba ho fandrakofa gny toera-masy.Nagnome regny teo agnatrehako regny olo regny,ka voatoka ho gnahy regny.Ho famantara gny fisiako amin'reo olon'Israely reo. 39 Nangalaky reo medaly fandaisa bolo i Eleazara mpisoro zay nampiasain'reo olo zay may,sady la nitefe ho fandrakofa ho an'gny toera-masy reo, 40 mba ho fampahatiarova ho an'reo olon'Isrealy,mba tsy hisy vahiny ze tsy taranaky baka amin'i Arona ho avy hagnoro diti-kazo magnitsy agnatrehan'i Yaveh,ka tsy ho tonga manahaky an'i Kora voho gny tarikin-drozy-araky ze fa nagninan'i Yaveh tamin'gny alalan'i Mosesy. 41 Tamin'gny maray maraindray la nitaray tamin'i Mosesy voho Arona gny fivondronan'gny olon'Isrealy iaby. Hoy rozy hoee: " Nivonoenareo gny olon'i Yaveh." 42 Sady niseho zany,lafa nivory hagnohitsy an'i Mosesy voho Arona gny fivondrona iaby,laha nijery tao amin'gny tragno-lay fifakatraran-drozy,sady,ingo,nandrakotsy zany gny hiboky. Niseho gny voninahits'i Yaveh, 43 ary Mosesy voho Arona la nandeha eo agnatrehan'gny tragno-lay fihaogna. 44 La nisafa tamin'i Mosesy i Yaveh. Hoy ie: 45 " Mienga lavitsy tsy ho eo agnatrehan'io fivondrona io mba ahafahako mandrava azy malaky" La nampihohoky gny tarehiny tamin'gny tany i Mosesy voho Arona. 46 Hoy i Mosesy tamin'i Arona: " Alao gny fandaisa bolo,asio bolo bak'amin'gny tany masy,asio ditin-kazo magnitsy ao agnatin'zany,andeso malaky agny amin'gny fivondrona zany,la manaova fanavota ho gnazy reo,fotony avy amin'i Yaveh gny fahatezera Niatomboky gny areti-mandrava." 47 La nanao zay natoron'i Mosesy i Arona. Nilay ho eo agnivon'gny fivondrona ie. Fa niparitaky malaky teo amin'gny olo gny areti-mandrava,nampiliriny gny litin-kazo magnitsy ka nanao fagnavota ho an'gny olo ie. 48 Nitsanga teo agnelagnelan'gny velo voho gny maty i Arona;ka tamin'zany la nijano gny areti-mandrava 49 La 14700 reo ze matin'gny areti-mandrava,ankoatsy reo maty nohon'gny amin'i Kora. 50 Ninpody tagny amin'i Mosesy teo amin'gny varavagnan'gny varavagnan'gny tragno-lay fihaonan'i Arona,la nijano gny areti-mandrava.