¹ Ami mimutumakana omuango wetu Fembe, omutalavai wongelecha engu eko Chekeleya, ² opo mumutambula ku Tate Kulu, nawa oko vafuifhipo, nokumuvatela kovipuka embi é mahanda konue. Pae é waila omuvate wowengi hinde nami. ³ Popifheni Pilichila na Akila, omapangange owokovinga ku Yesu Clistu, ⁴ omba komunhu wange velinelekala ominhu viawo muni. Ami mbevepandula, ya hami pe kongelecha aihe oyovipunde. Popifheni ongelecha endji ikondjuwo yawo. ⁵ Popifha omuhandua wange Epenetu, omuhopua wopoupe ko Acha ku Clistu. ⁶ Kapoifhe Maliya, engu emutalavayea unene. ⁷ Popifheni Andronico na Djunia, ovango vange nomapangange mokaleya, ovavaleli povalongua, omba nawo nkhu veku Clistu nkhe nkhu hipo. ⁸ Popifheni Ampliatu, omuhandua wange ku Tate Kulu. ⁹ Popifheni Ulumbano, epangalhetu kovininga ku Clistu, nomuhandua wange Echitaqui. ¹⁰ Popifheni Apele, ingu ahilivikua ku Clistu. Popifheni ombenha veli omuhoko wa Alichitombulu. ¹¹ Popifheni omuangu wange Helondiyau. Popifheni ombenha owokomuhoko wa Nalichichu, omba veku Tate Kulu. ¹² Popifheni Tilifena na Tilifocha, omba vatavaya unene ku Tate Kulu. poifheni omuhabdua Pelechite, engu atavaya unene ku Tate Kulu. ¹³ Popifha Lufu, omuhopua ku Tate Kulu naina ya name. ¹⁴ Popifha achiclitu, Filingonte, Herme, Patomba, Herma navangu omba venawo. ¹⁵ popifha Filolongo na Djulia, Neleu nomuangu wae, Olimpa novafuapo avehe omba venawo. ¹⁶ Lipopifheni polueni novakueni nombechinho endji yafuapo. Ovingecha avihe ovia Clistu ovimupopifha. ¹⁷ Pahe, mitatanifha naonue, vango vange okutia mutute kombenha mavaeta otchiliyapukifha notchiliputalefha, omba vaponukifha kuimbinha muangefhua vekaleni kokula. ¹⁸ Mokonda ovanthu ngaombo kavatalavaye Tate Kulu Yesu Clistu, velitavayawo muni. Nomalakawo okunhonhota nokukelenga, owo vakenga oyombungo zhovahima. ¹⁹ Mokonda eheteko lheni olhokutavela lihanga kovengi. Ami ndjihambukua, pae konue, mbahanda muile ovanongo kotchiwa nokuhulifha okuponukifha otchivi. ²⁰ Huku yombembua pomala omafhupi mamiangulula Elhapu kohi zhoyo mphazhi zhae. Otchali tcho Tate Kulu yetu Yesu Clistu ngaikae naonue. ²¹ Timotio epanga lhange lho kovininga, vemu popifha; novango vange Lucio, Jachau na Chochipalatu. ²² Ami Terchu, mihonike omukanda ombu, mimupopifha ku Tate Kulu. ²³ Ngayo, omuenda kuami noko kongelecha aihe, wemupopifha. Elachitu omutanthi womochitati, nomuango Qualutu, wemupopifha. ²⁴ Ombembua ya Tate Kulu yetu Yesu Clistu ngaikae naonue amuhe. Amém! ²⁵ Pahe inguinha atokala kokumukulamifha, okukuatelela konda yange ombua ya nokulonga kua Yesu Clistu, okutezha oviwa okuholeka oluambo nkhe kulukulu, ²⁶ ya pahe tchahololua, tchiwe kovilongo viatcho avihe kovihonikua ovitengapo, okutezha otchizhilika otcha Huku engu hapo, pokutavela okuo ekolelo. ²⁷ Kumu pe omunongo Huku, kukuatele ku Yesu Clistu, oumbala ngaukaeko té kolukulu. Amém!