¹ Pae, vhangu vhange, ami tuatuako nokutia, konkhenda ya Huku, pakuleni omalutueni ngotchilikutilo tchomunhu, okufuifhapo kouwa ku Huku, tchi otcheili okulikuambela kueni okuatchatchili. ² Hamututu ngatchi tchituta owouye, yekemñi Huku avhiukifhe tcheinha onue mututa ya novhituwo vieni. ³ Mokonda, kotchali tcheinha mbapewa, ami mimunhele okutia ponue nge hamututu poluemuni unene vhali kutchi ngetchaila; pae, tuta nounongo, okuheteka ekolelo endi Huku emuandjela. ⁴ Mokonda otue olutuluaetu lueliandja, ya hatcho aluhe lutalavhaya pamu. ⁵ Ngatchi naotue, tulipe owengi, otchotuli pe olutulumu mu Clistu ya poluetu muni, tupamu pé noakuetu. ⁶ Otue tuno ounongo welikalela kuendeka kotchali tchi tuapewa. Okutia otchali tchaumu okukala tchikae ngatchi ekolelo lhakala. ⁷ Oktia ounongo ovhininga,talavhaya.Okutia ounongo okulongefha longefha. ⁸ Okutia ounongo owokukuafhako kuatefhako. Okutia ounongo owokuandja oyombongo andja nehambu. Okutia ounongo okutumina tumina noholo,okutia ounongo onkenda ninga onkenda nehambo. ⁹ Otchihando tcheñmi hatchile otcho kueulu ifhenipho otchivhi tezheñmi otchiwa. ¹⁰ Okulihanda okumunikuatcho, likuateñmi pamu polueni. Kokuhumba, lihumbeñmi polueni. ¹¹ Pae koholo, hamuile ovhimonha. takañmifheni kophepo, okutalavhayela Huku. ¹² Kaeñmipo nawa mokonda mukamuaoñmika okutia Huku mekemupopila. Kaeñmi nombili ngale mumoyohali. Likuambeliñmi apehe. ¹³ Kapopieñmi oholo yovhavhiukifhi ya ileñmi efhikilo. ¹⁴ Kevhepeni onkhanu ombua ombenha vhemuninga navhi; vhepeni onkhanu ombua hamukevhepa onkhanu ombi. ¹⁵ Lemueñmi naombenha vhalemua; lileni naombenha mavhalili. ¹⁶ Hulilueñmi naomba vhehulilua. Hututu okuhanda okulipakako, hopeñmi ovhantu ombenha havhilipakeko unene. Hamuile ovhanongo koho enimuni. ¹⁷ Hakuningi umu mamumufhiti otchivhi notchivhi. ¹⁸ Ningeñmi tcheinha eli otchiwa komiho ovhengi. Ningeñmi tcheinha nge mamuzhili opó mukae kombembua novhengi. ¹⁹ Vhahandua, hamulitefha omphata polueñmi muni, yekeñmi Huku aungule mokonda Tchahonikua okutia: Omphata yafua Muami; Ami mikemutchunifhila. owapopia Tate Kulu. ²⁰ Pae otchita tchoe ngaele pua enondjala mupa oyondia. Ngaele pua enonhuta, mupa omande. Mokonda tcho ngotchingi, ovhe mukaóngezha onthalalo momutue wae. ²¹ Nge hakapikululua notchivhi, pikulula otchivhi notchiwa.