¹ Vahona pemii ovapika tcheinha tchaviuka pouhunga, okutchiva okutia nawo vena Tate Kulu umu keulu. ² Kaemii muakulama melikuambelo novipuka viehambo. ³ Mondjanga yatcho likuambelini, ya nakotue, opó Huku etuikule epito lhondaka, opó tupopie ondaka ya Clistu, endji yankhuatefha; ⁴ ya likuambeleni opó ndjipopie lumu nawa tchi eli tchi nge miningi. ⁵ Endemii nounongo komutue waombenha heli ova Clistu potchizho tchemii ningemii ovipuka embi eli ovinhamunhu. ⁶ Oyondaka zheni ngazhile oyombua apehe ngatchi tchatuwa nomungua opó utchizhi ⁷ Tiquiko mekemuivifha ovipuka viatcho avihe embi vianhemba kuami. É omuango wetu omuhandua omupopie umu omuviukifhi engu eli omutezhi wovininga via Tate Kulu. ⁸ Ami mbemutumea pé okutia onue mutchive omukalo vetu nokupoleka oyombungo zheni, ⁹ pamu na Onechimu omuangu omuhandua omufuifhipo. Owo mavekemuivifha atchihe tchi matchikaningua puenu. ¹⁰ Alistaluku epanga lhange olho mokaleya wemupopifha, na Maluku omulamue wa Belenambe ( ku muatambula omaunongo, ngeya konue mutambuleni), ¹¹ ya na Yesu engu eli owehunga. Owolho pé vahita moviyumbo omba veli omapangange okovininga vioumbala wa Huku, ombo owo veli ovapolefhi wombungo yange. ¹² Epafala omundapi wa Yesu Clistu owoyeni wemupopifhapo, ya uka melikuambele onue opó muifhepo mukae mueyula oholo ya Huku. ¹³ Pae ami ndjimbangi yokutia utalavayela unene onue Owokolaundicheya nowo Helapoli. ¹⁴ Luka omendiku omuhandua ya na Demas wemupopifhepo. ¹⁵ Popifheni ovango woko Laundiceia na Nifa ya notchingelecha tchi tchikondjuwo yae. ¹⁶ Omukanda ombo ngo mueutangelua, ya nawo autangelua vali kongelecha yoko Laundiceia, naonue tangemii omukanda woko Laundiceia. ¹⁷ Heleni Aliquipu afuifhepo ovininga embi atambulile ku Tate Kulu okutia afuifhepo. ¹⁸ Okulipopifha kwó okoholo yange muni, Paulu. Nongonukemii omalhenge ange. Ombembua ngaikae naonue