¹ Nani okutia Huku wemututilifha na Clistu owolemii ovipuka emiã eli oviokeulu ku Clistu akankhama kokulumioko kua Huku. ² Tutemii kovipuka emiã eli oviokeulu heli embinu oviokohi, ³ mokonda muakungula kaya ya omunhu wemii waholekua na Clistu ku Huku . ⁴ Pueinha Clistu eli omunhu opopiwa, pó naonue mamukapopiwa Nae koumbala. ⁵ Pae lekemii oyoholo zheni ozhoyopekalo zhokolukalo mouye ombonu: Ochilo, oyoholo oyombi, ovilungamiika, okulilapo hamulikule, oholo onene, nokuyimbila ovinthululu. ⁶ Oluyuma lua Huku luezhile koyonde wokuhatea mokonda viovipuka viatcho embio avihe. ⁷ Kovipuka embio okonkhu muendea kolukulu pua muanamatea muvio. ⁸ Pae pahe muno olho kulikukulula kovipuka embio avihe: Oluyuma, okututa okuvi, okuleva nomalaka omavi okovinhu viemii. ⁹ Humulikembe poluemii novakuemii mokonda muelikukulula kouzhiu kaya omukulu, nokovininga viatcho. ¹⁰ Muawala ouzhiu oupé ombu wavilulua kokuiva kukuahulifha kotchifhefha tchaingu emutekula. ¹¹ Pae tcho, kakuna ongeleku pamu nochundeu, kakuna okuhita moviyumbo pamu nokuhahita moviyumbo, pamu novituwo viokochita, pamu noupika, pamu noweyovo; pae Clistu wahulua ya ukovanthu vatcho avehe. ¹² Pae liwalekemii ngovahopua va Huku, ovafuifhapo ovahandua owoyonkhenda zhokohi unene, okulipundifha nombili. ¹³ Likuatefheniko poluemii novakuemi, lipandulemii poluemii novakuemii. Umu nganingi otchituhi nomukuavo liyevelemii ngatchi Tate Kulu emuevela. ¹⁴ Kovipuka embio avihe, okó kunotchihando tchi tchituwamiika nawa okufuifhapo. ¹⁵ Ombembua ya Clistu ngaitumine oyombungo zheni; kombembua endjo, okó nkhu muaifhanua kolutu lumu pé ya kaemii muandula. ¹⁶ Ondaka ya Clistu ngaikae nonue okuyula unene. Nounonga watcho auhe longefheni lihelemii poluemii novakuemii noyochalumu, noviyimbo ovio koMphepo. Yimbeni nolupandu ku Huku moyombungo zheni. ¹⁷ Atchihe tchi nge mamuningi kokupopia pamu okovituwo, atchihe tchiningemii mena lha Tate Kulu Yesu, nokupandula Huku Tate mokonda ya Yesu Clistu. ¹⁸ Ovakai ngavahumbe avazhiu vavo, tchi eli otchiwa ku Tate Kulu. ¹⁹ Ovazhiu handemii ovakai vemii, ya hamuvetekula navi. ²⁰ Oyonde ngavahumbe owohé kovipuka viatcho avihe, mokonda tcho otchiwa ku Tate Kulu. ²¹ Onue owohé hamuyumanifha oyonde veni opó havakae notchihó. ²² Ovapika humbemii ovahona vemii kovipuka viatcho avihe, ya okuhumba hakuile pé pua mavemumunu; pae kaemii nombungo endji viaviuka, endji ihumba Tate Kulu. ²³ Tchi ahanda muninge, tchiningeémii lumu otcho koholo yombugo ngaomba mamuningie Tate Kulu hamamunigié ovazhiu. ²⁴ Tcho okutchininga otcho mutchi okutia mamukatambula ku Tate Kulu otchivei tchemii otchoupinga. Tcho oku Yesu Tate Kulu engu mutalavayela. ²⁵ Pae engu makaninga otchivi, makatambula ohali kovivi viae embi aninga, ya Huhu kapungu ovanthu.