9
1
Хорлэн кивалтӥсезлы. Пиезлэн кулонэз пумысен. Давидлэн псаломез.
2
Кузё-Инмаре, вань сюлмыным данъяло но вань паймымон ужъёсыд сярысь верало.
3
Шум пото но шулдыръясько Тон сярысь, Вылӥысь Инмаре, данъяло Тынэсьтыд нимдэ.
4
Мынам тушмонъёсы берлань чигнакузы, Тынад син азяд ӵемтаськизы но быризы,
5
уго Тон мынысьтым ужме учкид но шонерен лыдъяд. Тон пуксид престол сьӧры, шонерлыко Судья.
6
Тон вождэ поттӥд калыкъёслы, быдтӥд законэз тӥясьёсты но соослэсь нимъёссэс ӵушылӥд пыраклы.
7
Тушмонлэн чик ӧз кыль ини ож тӥрлыкез. Городъёссэс Тон куашкатӥд соослэсь. Соосты тодэ вайон но вунӥз соосын ӵош.
8
Нош Кузё-Инмар улэ пумтэм дауръёс ӵоже. Судэзлы Со дасяз Аслэсьтыз престолзэ.
9
Со дуннеез шонер судить кароз но калыкъёслы шонерлыко суд лэсьтоз.
10
Кузё-Инмар зӥбемъёслы ватсконни луоз, куректон дыръёсы утиськонни луоз.
11
Тон вылэ оскиськозы, нимдэ тодӥсьёсыз, уго Тон Кузё-Инмаре, уд кельты, Тонэ утчасьёсты.
12
Кырӟалэ Сионын улӥсь Кузё-Инмарлы, Солэн ужъёсыз сярысь вералэ калыкъёслы.
13
Со кылэз юа вир кисьтэм понна, тодаз вае но уг вунэт зӥбемъёслэсь ӝуштэмзэс.
14
Жаля монэ, Кузё-Инмаре. Учкы мынэсьтым курадӟёнме, кудиз соослэсь, кин монэ адӟёнпотостэм каре. Тон монэ кулонлэн ӟезьы дорысьтыз палэнэ нуиськод,
15
мон Тонэ мед данъяло шуыса Сион ныллэн ӟезыез дорын. Шум пото, Тон монэ утид шуыса.
16
Калыкъёс гуэ усизы, кудзэ асьсэос ик копазы. Соослэн пыдъёссы сьӧлтаськизы, асьсэлэн ик лушкем пуктэм выазы.
17
Кузё-Инмар тодмо луиз шонер суд лэсьтыкуз - законлы пумитъяськись сюриз аслаз ужъёсызлэн гуаз.
18
Адэ мед кошкозы сьӧлыкоос- вань калыкъёс, Инмарез вунэтэмъёс.
19
Уго начар мурт котьку уг кыль вунэтэмен, пыраклы уз быр осконлыксы начаръёслэн.
20
Султы, Кузё-Инмаре! Адямиос медаз ворме. Калыкъёс Тон азьын судить каремын мед луозы.
21
Кузё-Инмаре, кышкаты соосты. Калыкъёс мед тодозы, соос адямиос гинэ шуыса.
22
Малы тон сылӥськод, Инмаре кыдёкын но ватскиськод куректон дыръёсы?
23
Аслаз вылӥлыкоеныз сьӧлыко адями уйылэ начарез. Соос мед сюрозы асьсэлэн ик лушкем лэсьтэм гуазы.
24
Уго законэз тӥясь ушъяське аслаз лулэзлэн мылпотэменыз но ваньбурлы тырмостэм адями аслыз гинэ благословение утча.
25
Законлы пумитъяськись аслаз вылтӥяськеменыз Кузё-Инмарез кулэтэм каре, вераса: “Со уз юа”. Солэн вань малпанъёсаз одӥг: “Инмар ӧвӧл!”
26
Солэн сюресэз котьку быронэ нуэ. Тынад судъёсыд солэсь кыдёкын, но со вань тушмонъёсыз шоры вылтӥяськыса учке.
27
Со вера аслаз сюлэмаз: “Уг куалекты. Улытчёзям но монэным уродэз уз луы”.
28
Солэн ымысьтыз пото каргамъёс, кескич но пӧян кылъёс. Солэн кыл йылаз курадӟон но бырон.
29
Со пуке ватскыса гурт сьӧрын но лушкем интыосын вие янгыштэмез. Солэн синъёсыз утчало начарез.
30
Со возьма начарез лушкем интыын, кызьы лев куак пӧлын. Ватскем инты дася, начарез кутон понна. Кутэ сое но аслаз сьӧлтэтаз кыске.
31
Ворме, тӥялтэ но начаръёс усьыло солэн кужмо гижыосаз.
32
Со вера аслаз сюлэмаз: “Инмар вунэтӥз, ватӥз Аслэсьтыз ымнырзэ, ноку но уз адӟы ини”.
33
Султы, Кузёе, мынам Инмаре! Ӝут Аслэсьтыд кидэ но эн вунэт ноку ултӥямъёстэ.
34
Малы законэз тӥясь Инмарез кулэтэм каре, вераса аслаз сюлэмаз: “Со уз юа”?
35
Тон адӟиськод сое, малыке шуоно Тон адӟиськод ултӥянъёсты но куректонъёсты, пунэмзэ берыктон понна Аслад киыныд. Тон киулэ асьсэ начар сётэ. Тон сироталэн юрттӥсез.
36
Куашкаты кужымзэ законэз тӥясьлэсь но урод муртлэсь, собере солэсь сьӧлыкъёссэ утчаса но шедьтыны медаз ни лу.
37
Кузё-Инмар - Царь пумтэм дауръёслы! Язычникъёс Солэн музъем вылысьтыз ышозы.
38
Кузё-Инмар! Тон кылӥд начаръёслэсь кулэ каронзэс. Юнматы соослэсь сюлэмзэс.Усьты Аслэсьтыд пельдэ,
39
дур басьтон понна сироталы но ултӥямлы. Соос медам ни кышкалэ калыкъёслэсь музъем вылын.