21
1
Хорлэн кивалтӥсезлы. Шунды ӝужаку. Давидлэн псаломез.
2
Инмаре мынам! Инмаре мынам! Малы Тон монэ кельтӥд? Мынам ӝуштыса юрттэт куреме кыдёкын монэ Утиселэсь.
3
Инмаре мынам! Мон курисько нуназе, Тон монэ уд кылӥськы, уйин кесяськисько - Тон мыным уд вазьылӥськы.
4
Нош Тон, Святой, улӥськод Израильлэн данъян кылъёсыз пӧлын.
5
Тыныд оскылӥзы асьмелэн атайёсмы. Оскылӥзы, но Тон соосты утьылӥд.
6
Тынэсьтыд юрттэт курылӥзы но утиськылӥзы. Тыныд оскылӥзы но возьытэ ӧз кыльылэ.
7
Мон адями кадь ӧвӧл, нумыр кадь, калыкъёс ултӥяло но сереместо монэ.
8
Ваньзы, кин монэ адӟе, серекъяло мон шоры но йырынызы шонаса верало:
9
" Со оске пе Кузё-Инмарлы, соку мед мозмытоз но мед утёз сое, со ярамон ке Солы"
10
Тон поттӥд монэ анаелэн пушкысьтыз, оскон сётӥд анаелэн гадь вылаз ик.
11
Тон вылэ мон вордскем дырысеным кельтэмын но анаелэн пушкысеныз ик Тон мынам Инмареным луид.
12
Эн палэнскы мон дорысь, уго курадӟён матын, нош юрттӥсь ӧвӧл.
13
Трос егит ошъёс ветло мон дортӥ, кужмо Васанлэн ошъёсыз котыртӥзы монэ,
14
усьтӥзы мон шоры ымзэс, лев кадь, кудӥз ыргетэ но добычазэ кеся.
15
Мон кичкем ву кадь, мынам вань лыосы пальккиськизы. Мынам сюлмы сюсь кадь луиз но мон пушкын шуназ.
16
Мынам кужмы куасьмиз, сюй горшок кадь. Мынам кылы лякиськиз мынам гульымы борды, но Тон кельтӥд монэ кулон шӧез кадь.
17
Уго пуныос котыртӥзы монэ, лек уллё котыртӥз монэ. Соос пасязы мынысьтым киосме но пыдъёсме.
18
Мынысьтым вань лыосме лыдъяны луысал, нош соос долкаса учко мон шоры.
19
Люкыло мынэсьтым дӥсьёсме куспазы но мынам шобретэлы пус кушто.
20
Нош, Тон, Кузё-Инмаре - мынам кужыме, эн палэнскы мон дорысь! Дырты мыным юрттыны,
21
мозмыт мечлэсь мынэсьтым лулме но возьма монэ пуныослэсь.
22
Левъёслэн ымъёссылэсь но буйволъёслэн сюръёссылэс уть монэ. Кылзы но мозмыты монэ.
23
Вынъёсылы верало Тынад нимыд сярысь, данъяло Тонэ калык люкаськем дыръя.
24
Кузё-Инмарлэсь кышкасьёс, ушъялэ Сое! Иаковлэн вань выжыез, данъялэ Сое! Мед мур сылӥ карозы Израильлэн вань выжыосыз,
25
уго Со курадӟисез ӧз кожы но куректӥсез ӧз вунэты, солэсь ӧз ват Аслэсьтыз ымнырзэ, но кесяськемзэ кылӥз солэсь, куке со Солэсь юрттэт куриз.
26
Тон сярысь мынам ушъянэ трос калык пӧлын. Быдэсъяло аслэсьтым малпанъёсме Кузё-Инмарлэсь кышкасьёс азьын.
27
Мед сиёзы начаръёс, кӧтсы тыр луытчёзь. Мед данъялозы Кузё-Инмарез Сое утчасьёс. Мед улозы тӥляд сюлэмъёсты пумтэм!
28
Тодазы ваёзы но берен лыктозы Кузё-Инмар доры музъемлэн вань сэрегъёсысьтыз, но йыбырттозы Тон азьын язычникъёслэн вань выжыоссы,
29
уго Кузё-Инмарлэн царствоез, но Со - калыкъёс вылын Кузё луэ.
30
Юозы-шулдыръяськозы но йыбырттозы вань узыр музъемъёс, йыбырттозы Со азьын ваньмыз, кин музъеме кошке, кудъёсыз уг быгато возьыны асьсэлэсь улонзэс.
31
Азьланяз мынам выжые служить карозы Солы но котьку Кузё-Инмарлэн нимаськозы:
32
лыктозы но вералозы калыклы, кудъёсыз вордӥськозы, Солэн шонерлыкез сярысь но Кузё-Инмарлэн кылдытэмез сярысь.