18
1
Хорлэн кивалтӥсезлы. Давидлэн псаломез.
2
Инбам Инмарлэсь данзэ ивортэ, Солэн киужъёсыз сярысь вера инбуко.
3
Нунал нуналлы вера, но уй уйлы тодон-валан усьтэ.
4
Ӧвӧл кылъёс но вераськонъёс, кытын соослэн верамзы уг кылӥськы.
5
Быдэс музъем вылын но дуннелэн пумозяз кылӥське соослэн куаразы но верамзы. Со интыяз шундылы улонни соос вылэ,
6
но со эмеспи кадь потэ, кышноеныз мусояськони валесысьтыз, но бызьысь кадь шум потэ, сюрес вылэ бызьыны потыкуз.
7
Со ӝутске одӥг палаз инбамлэн но сюрэссэ быдэстэ инбамлэн мукет палаз. Нокин но уз ватскы солэн пӧсезлэсь.
8
Кузё-Инмарлэн законэз ӟеч - юнматэ лулэз. Кузё-Инмарлэн усьтэмез шонер - огшоры калыкез визьнодо лэсьтэ.
9
Кузё-Инмарлэн косэмъёсыз шонерлыкоесь - сюлэмез шум потто. Кузё-Инмарлэн заповедез чылкыт - синъесты югыттэ.
10
Кузё-Инмар азьын кепыран чылкыт - озьы со кыле даурысь дауре. Кузё-Инмарлэн судъёсыз зэмлыкоесь - ваньмыз шонересь.
11
Соос зарнилэсь кулэесьгес, трос зарнилэсь но кулэесьгес, чечылэсь но сюсь чечылэсь но коньытгес.
12
Тынад ляльчиед утиське соосын, соосты быдэсъян быдӟым кузьым.
13
Кин быгатэ адӟыны аслэсьтыз сьӧлыкъёссэ? Сюзя монэ мынам лушкемелэсь
14
Тынысьтыд ляльчидэ возьма юри лэсьтон сьӧлыкъёслэсь, соос монэным медам кузёяське. Соку мон дун но чылкыт луо трос йыружъёслэсь.
15
Кузё-Инмаре, мынам кылъёсы но мынам малпанъёсы мед ярамон луозы Тыныд. Тон - мынам изэ но мынам Утисе!