24
1
Арнялэн нырысетӥ нуналаз, вазь ӵукна, соос басьтӥзы дасям ческыт зыно вӧй но сир но шайгу доры вамыштӥзы.
2
Лыктӥзы но адӟизы: шайгуэз пытсам из урдэс палдуртэмын.
3
Пушказ пырыса Иисус Кузё-Инмарлэсь мугорзэ ӧз шедьтэ.
4
Кышномуртъёс паймыса сылыкузы, шӧдтэк шорысь соос азе потӥзы чилясь дӥсьёсын кык воргоронъёс.
5
Но ку соос кышкаменызы ымныръёссэс мыкыртӥзы, воргоронъёс шуизы соослы: малы тӥ улэпсэ кулэмъёс пӧлысь утчаськоды?
6
Татын Со ӧвӧл: Со улӟыса кулэмысь султӥз. Тодады вае, мар Со тӥледлы вераз, куке Галилеяын вал.
7
Со вераз тӥледлы: " Адямилэн Пиез сьӧлыкоослэн еиязы сётэмын луоз, но соос Сое кортӵогалозы, но куиньметӥ нуналэ кулэмысь улӟыса султоз.
8
Соку соос Солэсь верам кылъёссэ тодазы вайизы.
9
Шайгу дорысь бертыса, ваньзэ веразы дас одӥгъёслы но ваньмызлы мукетъёсызлы.
10
Со кышномуртъёслэн нимъёссы: Мария Магдолина, Иоанна, Мария, Иаковлэн анаез; озьы ик соосын мукетъёсыз но вал, кудъёсыз со сярысь Апостолъёслы веразы.
11
Нош Апостолъёс соослэн иворзылы ӧз оске, верамзы пе соослэн малпамын.
12
Озьы ке но Пётр султӥз но бызьыса шайгу доры мынӥз. Пушкысьтыз учкиз но ватон ӵушконъёсты гинэ адӟыса, паймыса дораз бертӥз.
13
Иерусалимысь дас куать стадия кемысь Эммаус гуртэ, со нуналэ ик, кыкез дышетскисьёс мынӥзы,
14
ог огенызы та учыръёс сярысь соос верасько вал,
15
но доразы Ачиз Иисус матэктӥз но соосын артэ(ӵош) мынӥз.
16
Нош синъёссы соослэн пытсамын кадь, соос Сое ӧз но тодмалэ.
17
Иисус соосын вераськыны кутскиз: мар сярысь тӥ сюрес вылын ог огеныды вераськиськоды, но малы тӥ ӝожесь?
18
Соос пӧлысь одӥгез, Клеопа нимоез, Солы пумитаз шуиз: Тон Иерусалиме лыктэмъёс пӧлысь огняд гинэ дыр уд тодӥськы, мар вал та нуналъёсы?
19
Иисус юаз: мар сярысь? Соос Солы веразы: мар луиз Назаретысь Иисусэн, Кудӥз пророк вал, кужмо ужъёсын но кылын но Инмар азьын но вань калык азьын,
20
кызьы Сое милям первосвященникъёсмы но кивалтӥсьёс сётӥзы Сое кулонэ но кортӵогазы.
21
Нош ми оскиськом вал, Со Со ик вань, Кин мозмытоз Израилез. Но тани, туннэ куиньетӥ нуналыз ини, кызьы ваньмыз луиз.
22
Нош куд огез милям кышномуртъёсмы паймытӥзы милемды: соос вазь ӵукна шайгу доры ветлӥзы
23
но Солэсь мугорзэ ӧз шедьтэ, но бертыса, веразы, ангелъёслэсь лыктылэмъёссэс пе адӟимы, кудъёсыз вераллям: Со улэп.
24
Куд огез милямъёс мынӥзы шайгу доры но адӟизы сое ик, мар кышномуртъёс веразы, нош Сое ӧз адӟе.
25
Соку Со шуиз соослы: э, кыӵеесь бен тӥ визьтэмесь, кыӵе сьӧкытэн тӥ оскиськоды, солы, мае пророкъёс вераллязы!
26
Шат озьы кулэ ӧй вал курадӟыны Христослы но пырыны Аслаз даназ?
27
Но, Моисейысен кутскыса, вань пророкъёсысь Со валэктӥз соослы Со сярысь гожтэмъёссэ вань Писаниеысь.
28
Соос вуизы со гуртэ, кытчы мыно вал. Иисус возьматӥз соослы, Солы пе азьлань мыноно.
29
Нош соос сюлворыса куризы Сое, вераса: кыль миленым, уго ӝыт вуиз ини. Со корка пыриз но соосын кылиз.
30
Куке Иисус соосын ӵош ӝӧк сьӧры пуксиз, басьтӥз нянь, Инмарлы тау шуыса вӧсяськиз, тӥялтӥз но люкылыса соослы сётӥз.
31
Соку соослэн синъёссы усьтӥськизы, но соос Сое тодмазы. Нош Со соослы адӟёнтэм луиз.
32
Соос ог огзылы веразы: шат асьмелэн сюлэмъёсмы ӧз ӝуалэ, куке Со вераськиз миленым мыныкумы но Писаниез валэктылӥз?
33
Соос соку ик султӥзы но Иерусалиме бертӥзы но отысь шедьтӥзы дас одӥг Апостолъёсты но соосын ӵош луисьёсты,
34
кудъёсыз вераллязы, Кузё-Инмар пе зэм ик кулэмысь улӟыса султӥз но Симон доры лыктӥз.
35
Соос но веразы мыныкузы мар луэмез, но кызьы Сое тодмазы нянь тӥялтыкуз.
36
Соос верасько на вал, куке Иисус Ачиз султӥз соос пӧлы но шуиз: - Мир тӥледлы!
37
Соос куалектӥзы но кышказы, малпаса, духэз адӟё шуыса.
38
Нош Со шуиз соослы: малы тӥ сокем куалектӥды, малы сыӵе малпанъёс сюлмады пыре?
39
Учке Мынам киосы но Мынам пыдъёсы шоры - Мон Со. Кутскылэ Мон борды но адӟёды, уго духлэн мугорыз но лыосыз но ӧвӧл, нош Мынам вань.
40
Тае вераса, возьматӥз соослы киоссэ но пыдъёссэ.
41
Соос шум потэменызы нокызьы но уг быгато вал оскыны но паймылӥзы. Соку Со юаз соослэсь: вань-а соослэн кыӵеке коть сиёнзы?
42
Соос сётӥзы Солы пыжем чёрыглэсь люкетсэ но сюсь чечы.
43
Но, басьтыса, соос азьын сииз.
44
Собере Иисус шуиз соослы: Тани, мар сярысь Мон вералляй тӥлед, куке тӥледын вал на, ваньмыз, Мон сярысь Моисейлэн законаз но пророкъёсын но псаломъёсын гожтэмъёс, быдэсмыны кулэ.
45
Соку Иисус усьтӥз соослэсь валанзэс Писаниез тодонын.
46
Шуиз соослы: озьы гожтэмын, озьы курадӟыны кулэ Христослы, но куиньметӥ нуналэ кулэмысь улӟыса султыны,
47
Солэн нимыныз ӧтемын луыны кулэ вань калыкъёс, Иерусалимысен кутскыса, покаятся кариськонэ, сьӧлыкъёслэсь жалян басьтон понна.
48
Тӥ - тае адӟисьёс.
49
Мон келяло тӥледлы Мынам Атаелэсь кылсётэмзэ. Нош тӥ Иерусалим городын кыле, вылӥысь кужымен юнматӥськытчёзяды.
50
Иисус вывел их из города и дошел с ними до самой Вифании. Подняв руки, Он благословил их.
Иисус поттӥз соосты городысь но соосын Вифание лыктӥз. Но киоссэ ӝутыса, ӟечкылаз соосты.
51
Куке ӟечкылаз соосты, палдурскыны кутскиз но инме жутӥськыны.
52
Соос йыбырттӥзы Солы но бадӟым шумпотонэн Иерусалиме бертӥзы.
53
Данъяса но ӟечкыласа Инмарез котьку храмын луылӥзы. Амин