2
1
Со нуналъёсы Август кивалтӥсьлэн быдэс дуннеысь калыкез гожъян сярысь косонэз потэм.
2
Квинириялэн Сириен кивалтыса улкыкуз, та нырысетӥез калыкез гожъян вылэм.
3
Ваньзы гожтӥськыны мынӥллям, котькудӥз аслаз городаз.
4
Озьы ик Галилеяысь Назарет городысь Иосиф но Иудеяе, Давидлэн Вифлеем шуон городаз мынэм; Малы ке шуоно, со Давидлэн коркасьтыз но выжыысьтыз вылэм.
5
Со гожтӥськыны мынэм Марияен, солы курам нылмуртэн, кудӥз секытэн вылэм.
6
Соос отын луон дыръя, Солы нуны вайыны дыр вуэм.
7
Ваем нырысетӥ Пизэ, тэбетэ бинялтэм Сое но пудолы турын тыронэ понэм, малы ке шуоно, кунокоркаосын соослы инты сюрымтэ.
8
Со шаерын пудо возьмасьёс бусыын вылӥллям, асьсэлэсь уллёзэс возьмало вылэм.
9
Шӧдтэк шорысь соослы Кузё-Инмарлэн ангелэз возьматскем но Инмарлэн пиштӥсь данлыкез соосты мальдытэм (югдытэм). Соос вераны луонтэм кышкаллям.
10
Ангел соослы шуэм: «Эн кышкалэ, мон тӥледлы быдӟым шумпотон ивортӥсько, кудӥз вань адямиос понна луоз.
11
Тӥ понна туннэ Давидлэн городаз Утись вордӥськиз, Со – Христос!
12
Тани тӥледлы тодмет: Пудолы турын тыронысь тэбетэн бинялтэм Нуныез тӥ шедьтоды.
13
Шуак ангелэн ӵош лыдъянтэм трос ин ожгарчиос адскиллям но Инмарез данъяса вазиллям:
14
«Дан Вылысь Инмарлы, музъем вылын тупаса улон, но адямиослы каньыллык но яратон!»
15
Ангелъёс соос дорысь инме кошкем бере, пудо возьмасьёс ог-огзылы шуиллям: «Мыноме Вифлееме но учкоме мар отын луиз, кудӥз сярысь асьмелы Кузё-Инмар ивортӥз».
16
Дыртыса мынӥллям но, соос Марияез, Иосифез но педоослы турын тыронын кыллись Нуныез шедьтӥллям.
17
Адӟем беразы вераллям, мар ивортэмын вал та Нуны сярысь.
18
Кылэм муртъёс пудо возьмасьёслэн верамзылы паймиллям.
19
Нош Мария та кылъёсты ваньзэ аслаз сюлмаз поныса возем.
20
Пудо возьмасьёс мае кылӥллям, мае адӟиллям, верам кылъёсты тодазы вайыса Инмарез данъяса но ушъяса доразы бертӥллям.
21
Тямыс нунал ортчем бере, Нунылы вылын вандӥськон сямез ортчытон дыр вуэм. Солы Иисус ним сётӥллям. Анай пушкын кылдэмлэсь азьвыл ик ангел та нимез вераз вал.
22
Чылкытатскон нуналъёс ортчем бере, Моисейлэн косонэзъя, Сое Иерусалиме Кузё-Инмар азе ваиллям.
23
Кызьы Кузё-Инмарлэн косоназ азьвыл ик гожтэмын: «Анай пушкысь нырысетӥ вордскем котькудӥз пи нуны Кузё-Инмарлы сӥземын мед луоз» шуыса.
24
Кузё-Инмарлэн косоназ верамын на, жертва ваён понна ваёно кык дыдык, яке кык дыдыкпиосты.
25
Соку Иерусалимын Симеон нимо адями улэм. Со шонер улӥсь, Инмарлы оскыса, Израильлэсь буйгатсконзэ витись мурт вылэм. Святой Дух со вылын вылэм.
26
Солы Святой Духэн верамын вал Инмарлэсь Христоссэ адӟытэк, со кулонэз уз адӟы шуыса.
27
Святой Духэн тыр луыса, мылкыдыз ӝутскыса со храме лыктэм. Иисус Нуныез но анай-атаез Со вылын косонэз быдэстон понна татчы ваиллям.
28
28. Симеон Иисусэз кияз басьтэм, Вылысь Атаез данъям но верам:
29
«Аслад верам кылыдъя, Владыка, ляльчидэ каньыллыкен лэзиськод,
30
Тынэсьтыд мазмытондэ мынам синъёсы адӟизы,
31
Тон сое вань калыкъёслэн син азязы дасяд;
32
Югыт – мукет калыкъёслы югдытскон понна но
дан – Тынад Израиль калыкедлы».
33
Со сярысь верамлы Иосиф но Солэн анаез но паймиллям.
34
Симеон соос понна вӧсяськем. Солэн анаезлы Мариялы, шуэм: «Та Нуны пыр Израильын тросэз погралоз, тросэз ӝутӥськоз, Со котырын трос керетонъёс но луозы.
35
Тынад Аслад но сюлэм пыртӥд пурт потоз, трос сюлэмъёслэн малпанъёссы мед шонералозы шуыса».
36
Татын вылэм на Анна пророк. Асир выжыысь Фануиллэн нылыз. Трос аресъем кышномурт, со сизьым ар гинэ пинал дыръяз кузпалэныз улэм.
37
Ог тямыстон ньыль аресъем палкышно, храмысь кошкылытэк уй но нунал кӧс нунал возьыса но вӧсяськыса Инмар азьын тыршыса улэм.
38
Соку со матэ лыктэм но Кузе – Инмарез данъяса, Иерусалимын мозмытсконэз возьмаса улӥсьёслы, ваньзылы Иисус сярысь вераса улэм.
39
Кузё-Инмарлэн косонъёсызъя мар кулэ вал лэсьтыны, ваньзэ лэсьтэм беразы, соос Галилеяысь Назарет городазы берытскизы.
40
Нуны будэм, лулыныз юнмам, визьмын тыр луэм; Инмарлэн ӟечлыкез (благлдатез) Со вылын улэм.
41
Арлы быдэ Солэн анай – атаез быдӟым нуналэ Иерусалиме ветлӥллям.
42
Солы дас кык арес тырмемез дыръя, кызьы ваньмыз каро вылэм, Арня нуналэ Иерусалиме лыктӥллям.
43
Инмарлы сӥзем нуналъёс ортчем бере, бертыкузы пинал Пи Иисус Иерусалиме кылем, нош Иосиф но Солэн анаез шӧдӥллямтэ.
44
Малпаллям, Со мукетъёсыныз бертэ шуыса. Одӥг нунал сюрессэс ортчем бере Сое ӵыжы – выжыоссы но тодмо адямиоссы пӧлысь утчаны кутскиллям.
45
Но шедьтӥллямтэ, Сое утчаса выльысь Иерусалиме берытскиллям.
46
Куинь нунал ортчыса, Сое храмысь дышетӥсьёс пӧлысь шедьтӥллям, соослэсь юалляськыса но кылзӥськыса Со пуке вылэм.
47
Сое кылзӥсьёс ваньзы Солэн визьлыкезлы но валэктонъёсызлы паймиллям.
48
Отысь Сое адӟыса паймиллям; Анаез шуэм: «Пие, мар милемын Тон лэсьтӥд? Тани Тынад атаед но мон но туж куректыса Тонэ утчамы.»
49
Соослы Со шуэм: «Малы Монэ тӥледлы утчано вал? Тӥ ӧд тодэ шат? Мыным отын луоно, кытын Мынам Атаелэн юртэз?
50
Нош соос Солэсь верам кыльёссэ валаллямтэ.
51
Собере Со ӵош Назаретэ бертэм анай – атаезлэсь кылзӥськыса улэм. Солэн анаез ваньзэ та кылъёсты сюлэмаз возем.
52
Нош Иисус Инмар азьын но адямиос азьын визьлыкен но, арлыдын но яратонэн но ортчыт азинлыко луэм.