3

¹ Соин ик, чиданмы ӧвӧлэн, ми мылкыд каримы, ӟечгес луоз кыльыны Афин городын огнамы,

² но тӥледды юнматыны но буйгатыны осконады, тӥ доры келямы Тимофеез, асьмелэсь братмес, Инмарлэсь тыршисьсэ но Христослэсь Ӟеч Иворзэ ивортонын асьмелэсь юлтошмес,

³ нокин но медам куалекты шуыса та шуг - секытъёсын, уго тӥ асьтэос тодӥськоды, озьы луыны кулэ шуыса.

⁴ Уго ку ми тӥ дорын вал, азьласян верамы вал тӥлед, курадӟёнъёс сярысь, но тӥ тодӥськоды, озьы ик луиз.

⁵ Соин ик мон но, витьытэк, келяй тодыны тӥляд осконды сярысь, ӵемтаськытӥсь тӥледды медам ӵемтаськыты, милям тыршеммы токма медам луы шуыса.

⁶ Нош табере, куке Тимофей лыктӥз ми доры тӥ дорысь но ваиз милем ӟеч ивор тӥляд осконды но яратонды сярысь, вераз милем тӥ пе котьку ӟечен гинэ милемды тодады ваиськоды, но адӟемды потэ милемды, кызьы милям но тӥледды,

⁷ нош ми, котькыӵе куректонъёс но йормонъёс адӟиськом но ке, тӥлесьтыд оскондэс тодыса, буйгатскимы тӥленыд, братъёс.

⁸ Уго табери ми улэпесь, куке тӥ Кузё - Инмарен сылӥськоды.

⁹ Кыӵе тау карон ми быгатӥськомы сётыны Инмарлы тӥ понна, вань шумпотонлы, кудӥныз шум потӥськом тӥ понна милям Инмармы азьын,

¹⁰ уй но нунал мылысь-кыдысь вӧсяськыса, тӥледды адӟыны но ватсаны, мар уг тырмы на тӥляд оскондылы?

¹¹ Нош мед Ачиз Инмар но асьмелэн Атаймы но асьмелэн Иисус Христос Кузёмы возьматоз милемлы тӥ доры сюрэс.

¹² Нош Кузё - Инмар пачыл мед тырмытоз тӥлесьтыд ог-огдэс но вань калыкъёсты яратондэс,

¹³ юнматыны тӥлесьтыд сюлэмъёстэс чылкытын но святостьын Инмар но асьмелэен Атаймы азьын, асьмелэн Иисус Христос Кузёмы Аслаз вань святойёсыныз лыктэмезлэсь азьло. Аминь.