¹ ۱۔ تد یشُوع نے اسرائیل دے سارے قبلیاں نوں سِکم وِچ کٹھا کیتا اونے اسرائیل دے وڈھریاں ، اُمرا ، قاضیاں ، تے اختیار رکھن آلیاں نوں صدیا تے او خدا دے حضور وِچ حاضر ہوےٗ۔ ² ۲۔ یشُوع نے سارے لوکاں نوں آکھیا خداوند اسرائیل دا خدا فرماندا اے کہ بڑے ویلے توں جِدوں تہاڈے پُیو دادا جہناں وِچ ابرہام تے نحور دا پُیو تارح وی شامل نیں دریا دے اوس پار رہندے سن تے دوسرے بُتاں نوں پُوجدے سن۔ ³ ۳۔ پر میں تہاڈے پُیو ابرہام نوں دریا دے پار دے ملک توں لے کے کنعان دے سارے ملک وِچ اونوں راہ وکھیا تے اوھدی نسل نوں ودھایا میں اونوں اِضحاق دِتا۔ ⁴ ۴۔ تے اِضحاق نوں یقعوب تے عیسَو دِتے۔ تے میں عیسَو نوں شعِعیر دا کوہستانی ملک دے دِتا پر یعقوب تے اوھدے پُتر مصر ٹر گےٗ۔ ⁵ ۵۔ فیر میں موسیٰ تے ہارون نوں پیجیا تے میں مصر وِچ مصیبتیاں لیا کے مصِریاں نوں ماریا تے میں تہانوں اوتھوں کڈ لیایا۔ ⁶ ۶۔ جِدوں میں تہاڈے پُیو دادے نوں مصِر وِچوں کڈ لیایا تے فیر تُسی سمندر دے کنڈے تیک پونچے تے مصِریاں نے رِتھاں تے سواراں دے نال بحر قلزم تیک اوناں دا پیچھا کیتا۔ ⁷ ۷۔ پراوناں نے خداوند توں مدد لئی فریاد کیتی تے اونے تہاڈے تے مصِریاں دے وِچ ھنیرا کر دِتا۔ او سمندر نوں اوناں دے اُتے چڑھا لیایا تے اوناں نوں غرق کر دِتا تُسی خود آودی اِکھاں نال ویکھیا کہ میں مصِیریاں دے نال کی کیتا، فیر تُسی لمے ویلے تیک بیابان وِچ رہے۔ ⁸ ۸۔ میں تہانوں امُوریاں دے ملک وِچ لے آیا جہڑے یردن دے مشرق وِچ رہندے سن او تہاڈے نال لڑے پر میں تہانوں فتح دِتی۔ میں اوناں نوں تہاڈے اِگوں مُکا دِتا تے تُسی اوناں دے ملک اُ وتے قبضہ کر لیا۔ ⁹ ۹۔ جِدوں موآب دا بادشاہ صفور دا پُتر بلق اسرائیل تے چڑھن لئی تیاریاں کرن لگا تے اونے بعور دے پُتر بلعام نوں صدا کلیا تاں جے او تہاڈے تے لعنت کرن۔ ¹⁰ ۱۰۔ پر میں بلعام دی اِک نہ سُنی ایس لئی او مجبور ہو گیا کہ تہانوں برکت دیوے ۔ ایویں میں تہانوں اوھدے ہتھوں چھڈا لیا۔ ¹¹ ۱۱۔ فیر تُسی یردن پار ہو کے یریحو آےٗ تے یریحو دے شہر دے، امُوری، فرزی، کنعانی ، حِتی، جرجاسی ، حوی تے یبوسی تہاڈے نال لڑے پر میں اوناں نوں تہاڈے ہتھ وِچ کر دِتا۔ ¹² ۱۲۔ میں زنبوریاں نوں تہاڈے اِگوں پیجا دِتا۔ ایہہ تہاڈی تلوار یا کمان دا کمال نیں سی۔ ¹³ ۱۳۔ ایس طرح میں تہانوں او ملک دِتا جہیدے تے تُسی محنت نیں کیتی سی تے ا و شہر دِتے جہناں نوں تُسی نیں بنایا سی۔ تے تُسی اوھدے وِچ رہندے بیےٗ او تے او تاکستا نانں تے زیتون دے باغاں دا پھل کھاندے او جہڑے تُسی نیں لاےٗ سی ۔ ¹⁴ ۱۴۔ ایس لئی تُسی خداوند توں ڈروتے وفاداری دے نال اوھدی عبادت کرو تے اوناں بُتاں نوں سٹ دیو جہناں دی عبادت تہاڈے پُیو دادا دریا دے اوس پار تے مصِر وِچ کر دےسن تے خداوند دی عبادت کرو۔ ¹⁵ ۱۵۔ تے جے خداوند دی عبادت کرنا تہانوں پسند نہ آوے تے اِج دے دن تُسی اونوں چُن لیو جہیدی تُسی عبادت کرنا چاندے او بھایویں اوناں بوتاں نوں جہناں نوں تہاڈے پُیو دادا دریا دے اوس پار عبادت کر دے سن یا اوناں امُوریاں دے بُتاں نوں جہناں دے ملک وِچ تُسی رہندے او۔ پر جیتھوں تیک میرا تے میرے گھرانے دا تعلق اے اسیں تے خداوند دی عبادت کراں گے۔ ¹⁶ ۱۶۔ تد لوکاں نے جواب دِتا کے خدا نہ کرے کہ اسیں دوجے بُتاں نوں پُو جن لئی خداوند نوں چھڈ دیےٗ۔ ¹⁷ ۱۷۔ او خداوند ساڈا خدا ای سی جہڑا سانوں تے ساڈے پُیو دادے نوں اوس غلامی دے ملک یعنی مصِر توں کڈ لیایا تے ساڈیاں اِکھاں نوں وڈے وڈے عجیب و غریب نشان وکھاےٗ۔ ¹⁸ ۱۸۔ تے خداوند نے ساڈے اِگوں امُوریاں نوں تے اوناں ساریاں قوماں نوں کڈ دِتا جہڑیاں اوس ملک وِچ وسدیاں سن۔ اسیں وی خداوند ای دی عبادت کراں گے کیوں جے او ساڈاخدااے۔ ¹⁹ ۱۹۔ یشُوع نے لوکاں نوں آکھیا تہاڈے توں خداوند دی عبادت نیں ہو سکدی او پاک خدا اے او غیرت والا خدا اے او تہاڈی نافرمانی تے تہاڈے گناواں نوں معاف نیں کرے گا۔ ²⁰ ۲۰۔ جے تُسی خداوند نوں چھڈ کے بُتاں دی عبادت کرن لگو گے تے بھایویں خداوند تہاڈا چنگا کردا آیا اے او مُڑ کے تہاڈے اُوتے آفت لیا وےگا تے تہانوں ختم کر دیوے گا۔ ²¹ ۲۱۔ لوکاں نے یشُوع نوں آکھیا نیں اسیں خداوند ای دی عبادت کراں گے ۔ ²² ۲۲۔ تد یشُوع نے آکھا تُسی آپ ای آودے گواہ او کہ تُسی خداوند دی عبادت کرنا پسند کیتی اے۔ اوناں نے آکھیا ہاں اسیں گواہ واں۔ ²³ ۲۳۔ یشُوع نے آکھیا تے فیر تہاڈے وِچ جہڑے بت نے اوناں نوں دور کر دِیو تے آودے دِلاں نوں خداوند اسرائیل دے خدا وِل پھیر لو۔ ²⁴ ۲۴۔ لوکاں نے یشُوع نوں آکھیا اسیں خداوند آودے خدا دی عبادت کراں گے تے اوھدے ای وفادار رواں گے۔ ²⁵ ۲۵۔ اوسے دن یشُوع نے لوکاں دے نال عہد کیتا تے سِکم وِچ اوناں لئی آئین تے قوا نین بناےٗ۔ ²⁶ ۲۶۔ تے یشُوع نے ایہہ گلاں خدا دی شریعت دی کتاب وِچ لکھ لیاں ۔ فیر اونے اِک وڈا پتھر لیاتے اونوں خداوند دے گھر دے کول بلوط دے درخت دے تھلے رکھ دِتا۔ ²⁷ ۲۷۔ تے اوناں ساریاں لوکاں نے آکھیا ویکھ ایہہ پتھر ساڈا گواہ روے گا کیوں جے اونے او ساریاں گلاں سُنیاں نے جہڑیاں خداوند نے ساڈے نال کیتیاں نے۔ جے تُسی خدا دے نال بے وفائی کرو تے ایہہ تہاڈے خلاف گواہی دیوے گا۔ ²⁸ ۲۸۔ تد یشُوع نے لوکاں نوں اوناں نوں اپنی اپنی میراث وِل گھلیا ۔ ²⁹ ۲۹۔ اِناں واقعیاں توں بعد خداوند دا خادم نون دا پُتر یشُوع اک سو دِس وڑھیاں دا ہو کے مِر گیا۔ ³⁰ ۳۰۔ اوناں نے اونوں اوس ملکیت وِچ تمنت سرح دے مقام تے دفن کیتا جہڑا افرائیم دے کوہستانی ملک وِچ کوہِ جعس دے شمال وِچ اے ³¹ ۳۱۔ یشُوع دے جیندے جی تے اوناں وڈھریاں دے جیندے جی جہڑے یشُوع دے بعد جیوندے رہے تے جہڑے اناں ساریاں کماں نوں جانندے سن جہڑے خداوند نے اسرائیلیاں لئی کیتے اسرائیلی خداوند ای دی عبادت کر دے رہے۔ ³² ۳۲۔ تے یوسف دِیاں ہڈیاں جہناں نوں اسرائیلی مصِر توں لے آےٗ سن سِکم وِچ زمین دے اوس ٹوٹے وِچ دفن کیتیاں گیاں جہناں نوں یعقوب نے سِکم دے پُیو حمور دے پُتراں توں چاندی دے سو سِکیاں دے بدلے خریدیا سی۔ ایہہ تھاں یوسف دی نسل دی ملکیت بنی۔ ³³ ۳۳۔ تے ہارون دا پُتر اِلیعزر وی مِر گیا تے اونوں اوھدے پُتر فیحناس دی پہاڑی تے دفن کیتا گیا جہڑی اونوں افرائیم دے کوہستانی ملک وِچ دِتی کئی سی۔