¹ ۱۔ جیہڑے جیہڑے علاقے بنی اسِرائیل نے کنعان دے مکک وچ میراث دے طور نے پائے جہناں نوں الیعزر کاہن تے نون دے پتر یشُوع تے بنی اسرائیل دے قبائیلی فرقیاں دے سربراواں نے اوناں دے وچ ونڈےاو ایہہ نے۔ ² ۲۔ تے جیویں خداوند نے موسٰی دی معرفت حکم دتا سی اوھدےمطابق اوناں دی میراث اوناں ساڑھے نو قبیلیاں وچ پرچیاں پا کے ونڈ یاں گئیاں ۔ ³ ۳۔ موسٰی نے ڈھائی قبیلیاں نوں میراث یردن دے چڑھدے پاسے وچ دے رکھی سی پر لاویاں نوں دُوجیاں دے وِچ کوئی میراث نیں دیتی سی۔ ⁴ ۴۔ کیوں جے یوسف دی نسل توں دو قبیلے وجود وچ آچکے سن منسی تے افرائیم ۔ لاویاں نوں ملک دا کوئی حصہ نہ ملیا۔ سو اوناں شہراں دے جیہڑے اوناں دے رہن لئی سن تے کجھ چراگاواں جیہڑیاں اوناں دے ڈنگراں تے اجڑاں لئی سن اوہناں دے حصے وچ آ ئیاں ۔ ⁵ ۵۔ لہذا بنی اسِرائیل نے ملک نوں ٹھیک اوسے طرح ونڈ لیا جیویں خداوند نے موسٰی نوں حکم دِتا سی۔ ⁶ ۶۔ تد بنی یہوداہ جلجال وِچ یشُوع نوں ملن آئے تے قنزی یفُنہ دے پتر کالب نے اونوں آکھیا توں جاندا ہویں گا کہ خداوند نے قادس بر نیع وچ مرد خدا موسٰی نوں تیرے تے میرے وارے کی آکھیا سی ؟ ⁷ ۷۔ جدوں خداوند دے بندہ موسٰی نے مینوں قادس بر نیع توں اوس ملک دا حال پتہ کرن لئی گھلیاں سی تد میں چالیاں وریاں دا سی تے میں واپس آ کے اونوں سارا حال دِس دِتا سی ۔ ⁸ ۸۔ پر جیہڑے بھرا میرے نال گئے سن اوناں نے لوکاں دے دِلاں وِچ ڈر پا دتا۔ پر میں خداوند آودے خدادی پوری پیروی کیتی۔ ⁹ ۹۔ لہذا اوسے دِن موسٰی نے قسم کھا کے مینوں آ کھیا جس زمین تے تیرے پیر پیئے نے او ہمیشہ لئی تیری تے تیری اولاد لئی میراث ہووے گی ۔ کیوں جے توُخداوند میرے خدا دی پوری طرح پیروی کیتی اے ۔ ¹⁰ ۱۰۔ تے ہن ویکھ جدوں دی او نے ایہہ گل موسٰی نوںآکھی اودوں توں اوناں پینتالی وریاں تیک جہدے وچ بنی اسرائیل بیا بان وچ رُلدے رے خداوند نے آودے وعدے دے مطابق مینوں جیوندا رکھیا لہذا ہن میں پچاسی وریاں دا واں۔ ¹¹ ۱۱۔ میرے اِج وی اونا ای زور آلا واں جیویں اوس دن ساں جدوں موسٰی نے مینوں گھلیا سی ۔میں اِج وی جنگ دے میدان وچ جا کے لڑن دی اونی ہی طاقت رکھنا واں جہنی اودوں رکھدا سی۔ ¹² ۱۲۔ لہذا ہون ایہہ کوہستانی ملک مینوں دے دے جیویں خداوند نے اوس دِن میرے نال وعدہ کیتا سی ۔تو ُآپ اوس ویلے سنیاں سی کہ اوتھے عناقیم وسدے نے تے اوناں دے شہر وڈے تے اوچیاں کنداں والے نیں۔ پر جے خداوند میرے نال ہووے گا تاں میں اوھدے حکم دے مطابق اوناں نوں کڈ دیوا نگا۔ ¹³ ۱۳۔ تد یشُوع نے یفنہ دے پتر کالب نوں دعا دتی تے اونوں حبرون میراث دے طور تے دے دِتا۔ ¹⁴ ۱۴۔ اودوں توں اِج تیک حبرون قِنزی یفنہ دے پتر کالب دی میراث اے کیوں جے او نے خداوند اِسرائیل دے خدا دی پوری طرح پیروی کیتی سی۔ ¹⁵ ۱۵۔ پہلے حبرون دا ناں قریت اربع سی ایس لئی کہ اربع عناقیاں وِچ وڈا بندہ سمجھیا جاندا سی۔فیر اوس ملک نوں جنگ توں رہائی ملی۔