¹ ۱۔ پر یوناہ ایس گل توں بُوہت نا خوش تے ناراض ہویا۔ ² ۲۔ اونے خدا توں دُعا کیتی کہ اے خدا جدوں میں آودے گھر وِچ ساں تے کی میں اہی نہیں کیتا سی؟ایس لئی میں ترسیس نوں نسن دی چھیتی کیتی سی میں جاندا ساں کہ تُو مہربانی کرن آلا تے ترس کھان آلا خدا ایں ۔ قہر کرن وِچ ہولا تے مہربانہ کرن وِچ وڈا ایں تُو ایویں دا خدا ایں جہڑا عذاب لیان توں باز رہندا ایں ۔ ³ ۳۔ ہون اے خدا تُو میری جان لے لے کیوں جے ایس جین توں مر جاناں چنگا اے ۔ ⁴ ۴۔ خدا نے فرمایاکی تینوں غصہ کرن دا کوئی حق ہے؟ ⁵ ۵۔ تے یوناہ شہر توں باہر مشرق وِل جا بیٹھا اوتھے آودے لئی چھیر بنا کے اوھدے سائے تھلے بیٹھا تے ویکھن لگا کہ شہر دا کی حال ہوندا اے ۔ ⁶ ۶۔ تد خداوند خدا نے اِک بیل لائی تے اونوں یوناہ اُتے کھلاڑیاتاں جے اوھدے سر اُتے سایہ ہووے تے او تکلیف توں بچیا رووے تے آرام پاوے تے یوناہ ایس بیل توں بڑا خوش ہویا ۔ ⁷ ۷۔ پر دُوجے دِن سرگی ویلے خدا نے اِک کیڑا گھلیاجہنے بیل نوں وڈھ دِتا تے او سُکھ گئی ۔ ⁸ ۸۔ جد سُورج نکلیا تے خدا نے مشرق توں اِک ساڑن آلی ہوا چلائی تے یوناہ دے سر اُتے سورج دی تپیش ہوئی سگوں او بے ہوش ہو گیا تے مرن دی خاہیش کرن لگا او بولیا میرے ایس جین توں مر جانا چنگا ہوندا۔ ⁹ ۹۔ خدا نے یوناہ نوں آکھیا کی تینوں ایس بیل لئی ناراض ہون دا حق اے ؟اونے آکھیا کہ ہاں میں اِناں ناراض آں کہ مرنا چاہندا آں ۔ ¹⁰ ۱۰۔ خدا نے آکھیا تینوں ایس بیل دا اناں خیال اے جہنوں نہ تُو لایا تے نہ ایدے لئی کوئی محنت کیتی ایہہ رات بھر اُگی تے رات بھر سُکھ گئی ۔ ¹¹ ۱۱۔ پر نینوہ وِچ اِک لکھ وی ہزار توں بُوہتے لوک نے جہڑے آودے سجے تے کھبے ہتھ وِچ فرق نہیں کر سکدے ۔ایسے طرح جانور نے تے کی میں ایڈے وڈے شہر لئی فکر نہ کراں۔