¹ ۱۔ خداوند دا کلام امتی دے پُتر یوناہ اُتے آیا۔ ² ۲۔ کہ تُو وڈے شہر نینوہ نوں جا تے اوھدے خلاف منادی کر کیوں جے اوھدی بدی میرے حضور تیک آن پہنچی اے ۔ ³ ۳۔ پر یوناہ خدا دے حضور توں ترسیس وِل بھجیاتے یافا پہنچیا۔اوتھوں ترسیس نوں جان آلا جہاز ملیا او کرایہ دے کے اوھدے وِچ بیٹھا تاں جے ترسیس نوں جاوے ۔ ⁴ ۴۔ تد خداوند نے سمندر اُتے ایویں دی آندھی بھیجی کہ جہاز دے ٹوٹے ٹوٹے ہون دا خطرہ پے گیا ۔ ⁵ ۵۔ سارے جہاز نوں چلان آلے ڈر گئے تے ہر اِک آودے آودے خداواں نوں صدن لگا تے جہاز نوں ہلکا کرن لئی آودا سارا سامان سمندر وِچ سُٹ دِتا۔پر یوناہ جہاز وِچ سوندا پیا سی۔ ⁶ ۶۔ جہاز دے کپتان نے اوھدے کول جا کے آکھیا تُو کیویں سو سکدا ایں؟جاگ تے آودے خدا نوں یاد کر شاید او داساڈی سُنے تے اسیں نہ مریئے۔ ⁷ ۷۔ تد جہاز نوں چلان آلیاں نے آپس وِچ آکھیا آؤ اسیں پرچیاں پایئےتے پتہ کریئے کہ ایس مصبیت لئی کون ذمہ دار اے اوناں نے پرچیاں پائیاں تے پرچی یوناہ دے ناں دی نکلی ۔ ⁸ ۸۔ اوناں نے اونوں آکھیا کہ سانوں دِس کہ ایس ساری مصیبت لئی کون ذمہ دار اے ؟تُو کی کرنا ایں کیتھوں آیا ایں ؟ تیرا ملک کیتھے اے تے تُو کس قوم دا ایں ؟ ⁹ ۹۔ اونے جواب دِتا میں اِک عبرانی آں تے خداوند خدا دی عبادت کرنا آں جہنے زمین تے سمندر بنائے۔ ¹⁰ ۱۰۔ ایس گل توں او ڈر گئے تے اوھدے کولوں پُچھیا کہ تُو کی کیتا اے ؟او جاندے سن کہ او خدا دے حضور وِچوں نس ریا اے کیوں جے اونے ااپی اوناں نوں دسیا سی ¹¹ ۱۱۔ سمندر وِچ طوفان ودھدا جا ریا سی ایس لئی اوناں نے آکھیا اسیں تیرے نال کی کریئےتاں جے سمندر ساڈے لئی رُک جاوے ؟ ¹² ۱۲۔ اونے جواب دِتا کہ مینوں چُک کے سمندر وِچ سَٹ دیو تے سمندر رُک جاوے گا میں جاندا آں کہ ایہہ وڈا طوفان میری غلطی دی وجہ توں ےہاڈے اُتے آیا اے ۔ ¹³ ۱۳۔ فیر وی جہاز چلان آلے آودی پوری کوشش نال کنڈے وِل کیچھن لھے پر او ایویں نہ کر سکے کیوں جے سمندر پہلے توں وی زیادہ ودھدا جا ریا سی ۔ ¹⁴ ۱۴۔ تد او خدا دے حضور وِچ روئے اے خداوند ایس بندے دی جان لین لئی سانوں لوکاں نوں نہ مار ۔اِک معصوم دی موت دی ذمہ داری ساڈے اُتے نہ لا کیوں جے اے خداوند تینوں جو پسند آیاتُو کیتا۔ ¹⁵ ۱۵۔ تد اوناں نے یوناہ نوں چُک کے سمندر وِچ سُٹ دِتا تے سمندر دِیاں لہراں تھم گیاں ۔ ¹⁶ ۱۶۔ ایس گل توں او لوکی بُوہت ڈر گئے تے اوناں نے خدا دے حضور وِچ قربانی کیتی تے وعدے کیتے۔ ¹⁷ ۱۷۔ پر خدا نے یوناہ نوں نگل جان لئی اِک وڈی مچھی تیار کیتی ہوئی سی تے یوناہ تین دن رات مچھی دے پیٹ وِچ ریا۔