¹ ۱۔ جلعاد افتاح ہک وڈا سورما سی ۔او جلعاد دا پتر سی اتاں اوہدی ماں اک کسبی سی ۔ ² ۲۔ جلعا د دی ووہٹی تھوں وی اس دے پتر ہو ئے تے جد اوہ وڈے ہو گئے تے اوہناں نے اوس نوں ایہہ کہہ کے کڈھ دتا کہ تینوں ساڈے خاندان وچ کوئی میراث نئیں ملے گی کیوں جو توں اوپری زنانی دا پتر ایں ۔ ³ ۳۔ تد افتاح اپنے بھراواں کولوں نس گیا تے طوب دے دیس وچ جاوسیا جتھے کئی شہدے اوہدے کول جمع ہو گئے تے لٹ مار کرن لگ پئے ۔ ⁴ ۴۔ کجھ چر مگروں بنی عمون نے بنی اسرائیل دے خلاف جنگ چھیڑ دتی ۔ ⁵ ۵۔ تد جلعاد دے بزرگ افتاح نوں موڑ لیاں نوں طوب دے دیس نوں گئے ۔ ⁶ ۶۔ تے آکھن لگے پئی ساڈے نال ٹر کے ساڈا سردار بن جا ،تاں پئی اسی عمون نال لڑ سکیئے ۔ ⁷ ۷۔ افتاح نے اوہناں نوں آکھیا تسیں تے میرے نال ویر پا کے مینوں اپنے پئو دے گھروں کڈ ھ دتاسی ،ہن اجیہی کیہڑی بپتا آ پئی سے پئی میرے کول آ ئے او ؟ ⁸ ۸۔ جلعاد دے بزرگاں تے آکھیا ۔خیر ہن تے اسیں تیرے کولوں مدد چاہندے آں ۔ساڈے نال ٹر پے تا ں پئی اسی بنی عمون نال جنگ کر سکیے اتے توئیں اساڈے جعلاد دے سارے واسیاں دا حاکم ہوویں گا ۔ ⁹ ۹۔ افتاح نے جواب دتا ۔جیکر تسی مینوں بنی عمون نال لڑن لئی لے جا ندے او اتے خداوند اوہناں نوں میرے ہتھاں وچ کر دیندا اے ، کی فیر سچی میں تہاڈا حاکم ہووا ں گا ؟ ¹⁰ ۱۰۔ جلعاد دے وڈیریاں نے جواب وچ آکھیا ،خداوند ساڈا گواہ اے ؛اسیں سچی اوہیو کجھ کراں گے جو توں کہندا ایں ۔ ¹¹ ۱۱۔ سو افتاح جلعاد دے بزرگاں نال گیا تے لوکاں نے اوہنوں اپنا حاکم تے سردار بنا یا تے اوس نے مصفا خداوند دے حضور ااپنیاں سبھے گلاں کہہ سنائیاں ۔ ¹² ۱۲۔ تد افتاح نے بنی عمون دے بادشاہ دے کول ہر کارے گھل کے پچھیا پئی تیرا ساڈاے نال کیہہ ویر اے پئی توں ساڈے دیس اُتے چڑ ھائی کیتی اے ؟ ¹³ ۱۳۔ بنی عمون دے بادشاہ نے افتاح دے ہرکاریاں نوں جواب دتا پئی جد بنی اسرائیل مصر تو نکل آئے سی تد اوہناں نے ارنُونتو لے کے یبوق تے یردن تیک میرا سارا دیس لے لیا سی ۔ہن اوہنوں صلح سلامتی نال پرتا دوو۔ ¹⁴ ۱۴۔ تد افتاح نے عمون دے بادشاہ کول ہر کاریاں نوں ایہہ آکھ کے فیر گھلیا پئی ۔ ¹⁵ ۱۵۔ افتاح انج آکھدا اے پئی بنی اسرائیل نے ناں تے موآب دا تے ناں ای بنی عمون دا دیس کھویا اے ۔ ¹⁶ ۱۶۔ پر جس ویلے بنی اسرائیل مصرتوں نکل آئے سن اتے اوہ اجاڑاں وچوں ہوندے ہوئے بحیرہ قلزم تیک آئے تے قادس وچ آپڑ گئے ۔ ¹⁷ ۱۷۔ تد اسرائیلیاں نے ادوم دے بادشاہ کول ایہہ آکھ کے ہرکارے گھلے پئی ساہنوں اپنے دیس وچوں وی لنگن دی اجازت دے ۔پر ادوم دے بادشاہ نے اوہدی گل نئیں سنی ۔اوہناں نے موآب دے بادشاہ نوں وی ایہو سندیسہ گھلیا تے اوہ ویانکاری ہوگیا ۔سو اسرائیلی قادس وچ ای رہ گئے ۔ ¹⁸ ۱۸۔ ایس دے بعد اوہ اجاڑ وچوں دی لنگدے ہوئے ادوم تے موآب دے دیساں دے دوالے بھوں کے موآب دے دیس دے چڑھدے ولوں آئے تے ارنون دے پار تنبو لالئے ۔اوہ موآب دی زمین وچ نئیں وڑے کیوں جو ارنون اوہدا بنا سی ۔ ¹⁹ ۱۹۔ تد اسرائیلیاں نے اموریاں دے بادشاہ سیحون کول ہرکارے گھلے جیڑا ھصبون وچ راج کرداسی تے اوہنوں آکھیا پئی ساہنوں اپنے دیس وچوں لنگ کے ساڈی اپنی تھاں تے جان دے ۔ ²⁰ ۲۰۔ پر سیحون نے اسرائیل اتے ایناں پھروسا ناں کیتا کہ اوہ اوہناں نوں اپنے دیس وچوں لنگ کے جان دیوے ،سگوں اوہنے اپنے سارے لوکاں نوں جمع کیتا تے یہص دی تھاں تے تنبو لا لئے تے اسرائیلیاں نال جنگ چھیڑ دتی ۔ ²¹ ۲۱۔ تد خداوند اسرائیل دے خدا نے سیحون تے اوہدے سارے لوکاں نوں اسرائیلیاں دے ہتھاں وچ کر دیا تے اوہناں نے اموریاں نوں ہرا کے اوس دیس وچ وسن والے اموریاں دی ساری زمین اتے قبضہ کر لیا ۔ ²² ۲۲۔ جیہڑی زمین ارنون توں لے کے یبوق تے اجاڑ اں تو لے کے یردن دے کنڈیاں تک پھیلی ہوئی سی ۔ ²³ ۲۳۔ تد جلعاد نے اموریاں دے بادشاہ نوں پچھیا ہن جدوں خداوند اسرائیل دے خدا نے اموریاں نوں اپنی قوم اسرائیل دے سامنے باہر کڈ دتا اے تے تینوں اوس دے قبضہ کرن دا کیہہ حق بن دا اے ؟ ²⁴ ۲۴۔ جے تیرا دیوتا کموس تینوں کجھ دے دیوے تے کیہہ توں اوہنوں نئیں لویں گا ؟ انج ای جو کجھ خداوند ساڈا خدا جے ساہنوں دیوے تے کیہہ اسی اوہنوں نہ لئیے؟ ²⁵ ۲۵۔ کیہہ توں موآب دے بادشاہ بلق بن صفور(صفور دے پتر بلق) توں بہتا چنگا ایں؟ ایہہ دس کدی اوہ اسرائیلیاں نال بھڑیاتے کدی لڑیا اے ؟ ²⁶ ۲۶۔ جدوں تِن سو ورہے تیک اسرائیلیاں دا حسبون،عروعیر آلے دوالے دے قصبیاں تے ارنون دے کنڈیاں دے سارے شہراں اتے قبضہ سی تے اوس ویلے توں اوہناں نوں کیوں نئیں چھڈایا ؟ ²⁷ ۲۷۔ میں تے تیرا کجھ نئیں وگاڑیا سگوں توں ای میرے اتے چڑھائی کر کے ظلم کردا پیا ایں ۔ہن تے خداوند ای جیہڑا نیا ئے کرن والا اے اج دے دیہاڑے نیائے کرئے گا ۔ ²⁸ ۲۸۔ پر عمون دے بادشاہ نے افتاح دے گھلے ہوئے سنیہے ول کوئی دھیان نہ دتا ۔ ²⁹ ۲۹۔ تد خداوند دا روح افتاح اُتے اتریا تے اوہ جلعاد تے منسی دے وچوں لنگ کے جلعاد دے مصفاہ ولوں لنگدا ہویا بنی عمون ول ودھیا۔ ³⁰ ۳۰۔ تے افتاح نے منت منی تے آکھیا پئی جے توں بنی عمون نوں میرے حوالے کر دیویں ۔ ³¹ ۳۱۔ تاں جد میں بنی عمون نوں ہرا کے واپس جاواں گا تد جیہڑا وی میرے گھر دے بوہے چوں نکل کے مینوں ملن لئی آوے گا اوہ خداوند دا ہووے گا تے اوس نوں میں سوختنی قر بانی وانگ نذر کراں گا ۔ ³² ۳۲۔ تد افتاح بنی عمون نال جنگ کرن لئی نکلیا تے خداوند نے اوہنوں افتاح دے ہتھ وچ کر دتا ۔ ³³ ۳۳۔ اوہ اوہنا ں عمونیاں نوں عروعیر توں لے کے مینت تیک دے ویہ شہراں سگوں ابیل کرامیم تیک مار دا گیا ۔انج بنی اسرائیل بنی عمو ن تے بھاری پے گئے ۔ ³⁴ ۳۴۔ جد افتاح مصفاہ وچ اپنے گھراآیا تے اوہدی اپنی دھی اوہنوںملن واسطے نکلی ۔اوہ دف بجاندی تے نچدی ہوئی آ ئی سی ۔ایہہ اوہد ی کلی دھی سی ۔اوہدی ہور کوئی اولاد نئیں سی ۔ ³⁵ ۳۵۔ جد افتاح نے اوہنوں ویکھیا تے اپنے لیڑے پاڑ سٹے تے روہن لگ پیا تے آکھن لگا میری دھیے مینوں دکھ دین والیاں وچوں ہن اک توں وی ایں کیوں جو میں خداوند نال اک سوں کھا دی اے جنہوں میں توڑ نئیں سکدا ۔ ³⁶ ۳۶۔ اوہنے آکھیا ۔باپو جے توں خداوند دی منت منی سی تے تیرے منہ چوں جیہڑی گل وی نکلی سی اوہنوں پورا کرکیوں جو خداوند نے تیرے ویریاں بنی عمون تو ں تیرا بدلہ لے لیا اے ۔ ³⁷ ۳۷۔ پر میری اک بنتی سن ۔پئی توں مینوں دو مہینے دی مہلت دے دے تاں جو میں پہاڑاں اُتے گھماں پھراں تے اپنی ہانی کڑیاں دے نال اپنے کنوارپنے تے روواں ۔ ³⁸ ۳۸۔ اوس نے آکھیا: توں جاسکدی ایں ۔تد اوس نے اوہنوں دومہینے دی چھٹی دے دتی تے اوہ اپنی سکھیاں دے نال پہاڑاں اُتے چلی گئی تے اپنے کنوار پنے تے روندی رہی ۔ ³⁹ ۳۹۔ دو مہینے بعد اوہ اپنے پیو کول مڑ پرت آئی تے اوہنے (افتاح) نے جو منت منی سی اوہنوں پوریاں کیتا ۔اوہ (کڑی) دنیا تو کنواری ای چلی گئی ۔اوس ویلے تو ں بنی اسرائیل وچ ایہہ رواج اے ۔ ⁴⁰ ۴۰۔ پئی ہر سال اسرائیلیاں دیاں عورتاں چار دن لئی باہر چلیاں جاندیاں نئیں تے جلعاد دی دھی دی یاد وچ ماتم کردیاں نیں۔