¹ येशू नासरतको नगरमा हुनुभएको बेलामा, यूहन्‍ना, जसलाई मानिसहरूले बप्‍तिस्‍मा दिने भन्थे, यहूदिया प्रान्‍तको एउटा उजाड-स्थान गए । तिनले त्‍यहाँ आएका मानिसहरूलाई प्रचार गर्दै थिए । तिनले भनिरहे, ² “तिमीहरूले पाप गर्न छोड्‍नैुपर्छ, किनभने स्‍वर्गबाट परमेश्‍वरको राज्‍य चाँडै आउँदैछ, र तिमीहरूले पाप गर्न छोडेनौ भने उहाँले तिमीहरूलाई इन्कार गर्नुहुनेछ ।” ³ यूहन्‍नाले प्रचार गर्न सुरु गर्दा, यशैया अगमवक्‍ताले धेरै अघि जे भनेका थिए त्यो सत्य हुन आयो । तिनले भने, “उजाड-स्थानमा मानिसहरूले कसैले हरेकलाई कराउँदै गरेको सुन्‍छन्, ‘परमप्रभु आउनुहुँदा उहाँलाई ग्रहण गर्न तयार होओ ! उहाँको निम्ति सबै कुरा तयार गर !’” ⁴ यूहन्‍नाले ऊँटको रौंबाट बनेको खस्रो कपडा लगाए । धेरै अघि एलिया अगमवक्‍ताले गरेझैं, तिनले आफ्‍नो कम्मरमा छालाको पेटी लगाए । तिनको खाना उजाड-स्थानमा पाइने फटेङ्‍ग्राहरू र वनमह मात्र थियो । ⁵ यरूशलेम सहरमा बस्‍ने मानिसहरू, यहूदिया जिल्लाको अन्य ठाउँहरूमा बस्‍ने धेरै मानिसहरू, र यर्दन नदी नजिकै बस्‍ने धेरै अरूहरू यूहन्‍नाले प्रचार गरेको सुन्‍न तिनीकहाँ आए । ⁶ तिनीहरूले उनको प्रचार सुनेपछि, तिनीहरूले खुलारुपले आफ्ना पापहरू स्वीकार गरे, र त्‍यसपछि उनले यर्दन नदीमा तिनीहरूलाई बप्‍तिस्‍मा दिए । ⁷ तर धेरै फरिसीहरू र सदुकीहरू पनि यूहन्‍नाबाट बप्‍तिस्‍मा लिनलाई आउँदै गरेको उनले देखे । उनले तिनीहरूलाई भने, “तिमीहरू विषालु सर्पहरूका सन्तान हौ ! पाप गर्नेहरू हरेकलाई एकदिन परमेश्‍वरले दण्ड दिनुहुनेछ भनेर तिमीहरूलाई कसैले पनि चेतावनी दिएन, दिए त ? तिमीहरू उहाँबाट उम्कन पाउँछौ भन्‍ने नसोच !” ⁸ तिमीहरू साँच्‍चै पाप गर्न छोड्‍छौ भने, त्‍यो देखाउनलाई ठिक कामहरू गर । ⁹ म जान्‍दछु कि परमेश्‍वरले अब्राहामका सन्तानहरूसँग रहने प्रतिज्ञा गर्नुभयो । तर आफैंँमा यसो नभन, ‘हामीहरू आफ्‍ना पुर्खा अब्राहामका सन्तानहरू भएका हुनाले, हामीले पाप गरे तापनि परमेश्‍वरले हामीलाई दण्ड दिनुहुने छैन ।’ होइन ! म तिमीहरूलाई भन्छु कि यहाँ भएका यी ढुङ्‍गाहरूलाई उहाँले अब्राहामका सन्तानहरूमा बदल्न सक्‍नुहुन्छ ! ¹⁰ एकजना मानिसले असल फल नदिने फलको एउटा रूखको जराहरू काटेर हटाउन सुरु गरेजस्‍तै परमेश्‍वरले अहिले नै तिमीहरूलाई दण्ड दिन तयार हुनुहुन्छ । यसरी उहाँले हरेक रूखलाई काट्नुहुनेछ र त्यसलाई आगोमा फ्याँक्‍नुहुनेछ ।” ¹¹ मेरो बारेमा, म धेरै महत्‍वपूर्ण होइन, किनभने म तिमीहरूलाई पानीले मात्र बप्‍तिस्‍मा दिन्छु । पाप गरेको निम्‍ति मानिसहरूले पश्‍चाताप गर्छन् भने म त्‍यसो गर्छु । तर कोही एकजना चाँडै नै आउँनुहुनेछ जसले धेरै शक्तिशाली कामहरू गर्नुहुनेछ । उहाँ मभन्दा यति धेरै महान हुनुहुन्छ कि म उहाँका जुत्ताहरू बोक्‍न पनि लायकको छैन । उहाँले तिमीरूुलाई पवित्र आत्मामा र आगोमा बप्‍तिस्‍मा दिनुहुनेछ । ¹² खराब भूसबाट असल अन्‍न छट्‍याउन तयार भएर उहाँले आफ्नो निफन्‍ने नाङ्लो समात्‍दै हुनुहुन्‍छ । उहाँले अन्‍न जम्‍मा गर्नुभएको खलोबाट सबै खराब भुसलाई सफा गर्न उहाँ तयार हुनुहुन्छ । उहाँले धर्मी मानिसहरूलाई घरमा लानुहुनेछ, जसरी एकजना किसानले आफ्नो गहुँलाई आफ्‍नो भण्डारमा राख्‍छ; तर जसरी कसैले कहिल्यै ननिभ्‍ने आगोमा भुसलाई जलाउँछ, त्‍यसरी नै उहाँले दुष्‍ट मानिसहरूलाई जलाउनुहुनेछ । ¹³ त्‍यो समयमा, येशू गालील जिल्लाबाट यूहन्‍ना भएको ठाउँ यर्दन नदीमा जानुभयो । यूहन्‍नाले उहाँलाई बप्‍तिस्‍मा दिन सकून् भनी उहाँले यसो गर्नुभयो । ¹⁴ जब येशूले यूहन्‍नालाई उहाँलाई बप्‍तिस्‍मा दिनु भन्‍नुभयो, यूुहन्‍नाले इन्कार गरे; उनले भने, “तपाईंले मलाई बप्‍तिस्‍मा दिनु आवश्यक छ ! तर तपाईं एक पापी होइन, यसैले तपाईं किन मकहाँ आउनुहुन्छ ?” ¹⁵ तर येशूले तिनलाई भन्‍नुभयो, “मलाई अहिले बप्‍तिस्‍मा देऊ, किनभने यसरी नै हामी दुवैले परमेश्‍वरको हरेक इच्‍छा पुरा गर्ने छौं ।” त्यसपछि यूहन्‍नाले उहाँलाई बप्‍तिस्‍मा दिन सहमत भए । ¹⁶ त्यसपछि, येशू तुरुन्तै पानीबाट माथि आउनुभयो । त्‍यतिबेला आकाश खुलेको जस्‍तो भयो, र एउटा ढुकुरको स्‍वरूपमा परमेश्‍वरको आत्मा तल आउँदै र उहाँमा बस्‍दै गर्नुभएको येशूले देख्‍नुभयो । ¹⁷ अनि परमेश्‍वर स्वर्गबाट बोल्नुभयो र भन्‍नुभयो, “यिनी मेरा छोरा हुन् । म यिनीलाई प्रेम गर्छु, र म यिनीसँग धेरै खुशी छु । ”