¹ Te wan kin, paluk wi nag a nrom mus itop ngo amurin nag kalek mus, ipi nasemsemuen go takotpkau nagneu, teflan ko lasok emrom Naot, aslak nanromien. ² Afraa Euotia go a fraa Suntuke, raki fi atlak namroan ke skei emrom Naot. ³ Ore go amer pau kik aslak tilmori nen pa welu nafet nmatu nen ru weswes skot kineu reki nasiroen nig nanrognrogon wi, skot Klement go natagmol nakon nag ru weswes skot kineu go nagier ikon itok natus namolien. ⁴ Ko semsem Naot serinrak. Kafo mer ler tili ko semsem. ⁵ Ko pregi nag nmaonmauen nig amus ke fakor ki ser natagmol. Naot itok egmelting. ⁶ ko tu mroput ki tenmatun mau me sernalo lap totur nalotuen skot namurien kerkerai go nafsauian ko nriksei Atua ki sernalo lap nen ku murin. ⁷ Go tmat ni Atua nag itop tolser ntaen kefo lekor nakpomus go namroan nigmus emrom Kristo Yesu. ⁸ Nafsan mlap, nafet paluk sernalo lap nag itilimori, te nag rupak elang, te nag ru wi, te nag ileg, te nag ru lowi ki, te nag ru psawi kin, te nag iwi perkati, te nag rupi tenasmanien, ko mro ki telap nen. ⁹ Nafte nag ru tafnau akam kin, go ku usi, go ku nrongo, go ku leka, emrom kineu, ko pregi Atua ne ntmat kefo skot mus. ¹⁰ A semsem naot itop nlaken malfanen ku mer ler mro ki kineu. Ku pei tok mroput ki kineu mori me ku tu pamor mal nen ku welu mau. ¹¹ Kineu atu pes tili nlaken afarea mau kineu kai be tae teflan ka semsem mal wi go mal sa ¹² Kineu a tae nafte ipi nlaken tu mai farea, kineu me apo tae nafte kin tu mai pi soklep. Iplak napu fserser go plak sernalo fserser kineu a pamor napu takot nen kin tu tae mai pi atlak nafneng ko tu tik ki nafneng, go tefuan kin tu piatlak nafneng ilap ko itik. ¹³ Kineu a tae pring sernalo totur Naot yesu nen kin isinger kineu. ¹⁴ Taos ag ku pregi iwi top nag ku tae siwer skot kineu mal nanrogtesan nigneu. ¹⁵ Akam namer nig Filibai ku tae nag mal pei nanrognrogon wi ni Yesu Kristo, mal wan kineu a tau Masetonia nlaken kin itik ki nat iwel au toklos nanre ni naftuan go nanre ne naleruen me imer tik me akam mas. ¹⁶ G mal nen kineu apatok Tesaloniaka. akam me kuptu ki naweluan mal lap. ¹⁷ Kineu atu lo naftaun nig amus mau me kineu alo nua nawesien wi nig amus nagitok ftom. ¹⁸ Kineu a wes sernalo ilap ki mus, go telap nen akano tili, kineu ru tao sernalo wi lap go malfanen, a wes sernalo nen Ebafrotaio ineu prengi mai go sernalo nen inakpo taos nafunkas go ipi natamofan nen ipreng Atua isemsem slati. ¹⁹ Atua nigneu kefo patlas namituen nig amus totur nafisoklepan nig Yesu Kristo. ²⁰ Namermeran kefi tene Atua Apap mes nen go itu tu kai tu mau tu, Amen. ²¹ A patlas mus ku nom totur Yesu Kristo. Nafet paluk nag tu nom tok esan ru nrom mus. ²² Natamol tap wi lap ni Atua nag au tok esan, au semsem mrosok mus, nag ru tok esum ni Sisar. ²³ Nasauian nig Naot Yesu Kristo ke skot naten nig amus