¹ Puu uBoasi akhalota pandyango nghwavunchenge uvwa mu Betelehemu akhatama pasi. Akhaseikhe khadebe vuvule akhincha unyalukolo uvambadeisyanie akhata, "Heengho vwinche apa pwu utama, pwu umunu ula akhincha akhatama. ² Pwu u Boasi akhalundania avalongocnhi kumi avambunchenge pwakhata, "Mutame apa." Pwu vakhatama. ³ U Boasi akhambula unyalukolo ula uvambadeisanie akhata, "U Naomi uyu uvei avayile ukhuhuma khukheilunga eikhya mu Moabu, einghuncha eikhyalo luvafu eikheihyale khya lukolo lweito u Elimeleki. ⁴ Pwu une uvufumbwe vwango neisanghile ukhuta neikhuvule ukhuta unghule eikhyalo eikhyo pavulongonchi vwa vanu vango. Pwu eingave uve vunghombola unghombole, ungave savungombola pwu ummbule neinghombole, umbule apa neilumanye pakhuva asikhuli uyunge unyakhunghombola, unalekhe uve une pwu ningombola." Pu navope akhata Ninghombola yune." ⁵ Pwu u Boasi akhata, "Eikheinghono eikhyulava vwinghula eikhyalo mumavokho ngha Naomi, panonghile ukhunghula nayu Luti umunu va mu Moabu, ufweele vanswambe Elimeleki, ukhuta pwulesehencha ulukolo uveiafwile eitavwa vuve vuhale vwa mwene." ⁶ Pwu ula akhata pasaninghombola eikhyalo pakhuva yaninanga uvuhale vwango yune. Pwu nikhukhupa uve unghombole kheive khyakho yuve ulwakhova une neilemilwe." ⁷ Lwale lwiho lwa khatale mu Israeli ukhuko ngana nulutangeilo nukhuvombelanila inonu. Pakhungolosya nghooni, umunu aleikhufula ifilato fya mwene nukhumpa unine; voavaleikhunoncha ewo amamenyu mu Israeli. ⁸ Pwu leino unyalukolo ula ambula u Boasi akhata, "Vweinghulile yuve." Pwu leino akhafula eikhilato khya mwene. ⁹ Pwu u Boasi akhavavula avanu na vavaha vala, "Akhata umwe mwivooni muleivangeili elelo ukhuta neinghombwile kheila kheinu eikheikhale khya Elimeleki nifikhale fya Kilioni nayu Maloni ukhuhuma mmavokho ngha Naomi. ¹⁰ Paninie nangho uLuti udala va Maloni; neipelile idala vango, pwu uvufumbwe vwa khyolosya nukhunkuncha eilitavwa lya vahale vwa lukolo lweito uviafwiile, ukhuta eilitavwa lya mwene leilekhe ukhuyangha panghati pavalukololwe na mumilyango ghya vanu va mwene. Umwe nduvatangheili." ¹¹ Avanu voani avovaale pandyango nghwa vounchenge navavaha, vakhata, Lweli ufwefwe tuleivatangeili. Untwa ampele udala uyou uveiinchile munyumba yakho ave ndu Laheli nu Leya, vaavo ava Vaveili vayeinchengile einyumba ya Islaeli. ¹² Noave weimakhivwanghwe mu Efrata nukhuva munu nyamakha mu Bethelehemu. Einyumba yakho yeihwanane ndeinyumba ya Pelesi, uvei utamali ang'olile uyuta, khukheivumbukho eikhyuyakheiva ikhumpa Untwa mu dala uyou." ¹³ Pwuleino u Boasi akhata u Luti, pwu akhava idala va mwene. Pwu u Boasi akhanghona nave, Untwa akhampa unchingho, pwu akhahola umwana udeimi. ¹⁴ Pwu avadala vala vakhambula uNaomi, "Untwa anghinivwanghwe uveisakhulekhile eilelo kheinchila lukolo uvambadeisyanie. Eitavwa lya mwene uyou leivenchanghe litonchivwa mu Islael. ¹⁵ Pwu umwene ikhukhunkilivuleila uvwami vwakho, noukhukhulolela mbunghongholo vwakho, pakhuva ukamwanavo uvya khunghanile, voope akhunonghile ukhuluteila avana saba, avadeimi vei mwene ang'olile. ¹⁶ Pwu leino uNaomi akhatola umwana, akhambeikha pakheifwa khya mwene akhava ndeli va mwene. ¹⁷ Avana avatamangha mbubadeisyanie vwa dala ula vakhampa eilitavwa vakhata uNaomi." Aholile umwana" Vakhampa eilitavwa vei Obedi. Uvei uyou vei vise va Yese, udadaaye va Davudi. ¹⁸ Eikhi khyale heivumbukhu khya Pelesi; U Pelesi akhahola khwa Hesloni, ¹⁹ U Hesloni akhahola khwa Lam, uLam akhahola khwa Aminadabu, ²⁰ U Aminadbu akahola khwa Nasoni, u Nasoni akhahola khwa Solomoni, ²¹ U Salmon akhahola khwa Boazi, uBoasi akhahola khwa Obed, ²² U Obedi akhahola khwa Jese, uJese akhahola khwa Daudi.