¹ Тогава о фарисея тай о садукея але паш о Исус тай за те изпитвинен Лес, мангле Леске те покажинел ленге знамение таро небес.

² А Ов в отговор пенгяс ленге*: Като ракиол, пенен: О време ка овел шукар, соскето о небес лолиол; ³ а андявин: авдиес о време ка овел канило, соскето о небес лолиол намръщено. (Лицемерци!) Туме жанен те разтълкувинен о муи е небескоро, а о знамения е времескере нанащи! ⁴ Зло тай прелюбодейно роди мангел знамение, но авер знамение нанай те дел пес леске, освен о знамение на (пророк) Йона. Тай мукляс лен, тай гело песке.

⁵ А о ученикя, като накле и отвъдно рик, бистерде те лен маро. ⁶ Тай Исус пенгяс ленге: Внимавинен тай пазинен тумен таро кваси е фарисеиенге тай е садукенге.

⁷ Тай он разисквиненас машкар песте, тай пененас: Давка си, соскето на лилам маро.

⁸ А Исус, като ахалило давка, пенгяс: Маловерци, соске разисквинен машкар туменде, понеже нанай тумен маро? ⁹ Още ли нахалон тай на помнинен о панч маре на петте хиляди жене, тай кити кошя кидингиен? ¹⁰ Нито о ефта маре на четирите хиляди жене тай кити кошницес кидингиен? ¹¹ Сар нахалон, кай ма ашал мареске пенгиом туменге те пазинен тумен таро квасос е фарисеиенге тай е садукенге? ¹² Тогава он ахалиле, кай нана пенгяс ленге те пазинен пес таре марескоро кваси, а таро учение е фарисеиенге тай е садукенге.

¹³ А Исус, като ало ко околноскя на Кесария Филипова, пучляс Пе ученикиен, тай пенгяс: Според о мануша о Човешко Чаво кой си?

¹⁴ А он пенде: Иек пенен, кай си о Йоан Кръстител; авер па - Илия; а авер - Еремия, или иек таро пророкя.

¹⁵ Пенел ленге: А според туменде кой синиом Ме?

¹⁶ Симон Петър в отговор пенгяс: Ту синян о Помазаники*, Чаво е Живде Девлескоро.

¹⁷ Исус в отговор пенгяс леске: Блажено синян, Симоне, чавея Йонов*, соскето плът тай рат нана открингяс туке давка, а Отец Ми, Ковато си андо небеса. ¹⁸ Апа Меда пенав туке, кай ту синян Петър*, тай калке канарате ка съградинав Мери кангери; тай о портес е адоскере нанай те надделинен. ¹⁹ Ка дав тут о ключовя за ко небесно царство; тай со пандес ки пув, ка овел панло андо небеса, а со развържинес ки пув, ка овел развържиме ко небеса. ²⁰ Тогава пенгяс е ученикиенге никаске тена пенен, кай Ов си (Исус) о Помазаники.

²¹ Оттогава Исус почнингяс те известинел Пе ученикиенге, кай требва те жал андо Ерусалим тай бут те страдинел таро старейшинес, главна свещеникя тай о книжникя, тай те овел мудардо, тай ко трето диес те овел възкръсниме. ²² Тогава Петър лилас Лес ригате тай почнингяс те мъмринел Лес, като пенелас: О Дел те смилинел пес туке, Господи; давка нанай те ачол Туса.

²³ А Ов ирисало тай пенгяс на Петър: Махнин тут Мандар, Сатана; ту синян Манге съблазан; соскето на мислинес за Божиите неща, а е манушескере.

²⁴ Тогава Исус пенгяс Пе ученикиенге: Ако мангел декой те авел палал Манде, нека отречинел пес пестар, нека ваздел по кръстос, тай чука нека те следвинел Ман. ²⁵ Соскето, който мангел те спасинел по животос*, ка нашалел лес; а а който нашалел по животос ашал Манге, ка аракел лес. ²⁶ Понеже сави полза е манушеске, ако спечелинел цело светос, а по животос нашалел? Или со ка дел мануш в замяна пе животоске? ²⁷ Соскето о Човешко Чаво ка авел анди слава на Отца Си Пере ангеленца; тай тогава ка въздел саворенге според лескере деловя. ²⁸ Истина пенав туменге: Ате бешен десаве, колато нанай те вкусинен мериба, жи кай на дикен о Човешко Чаво кай авел андо Поро царство.