¹ Murhachiranaga olubanja, yinenyu barhabachir'olubanja. ² Bulala oluwachir'owenyu lunawe nji bakuchira. N'omulengo walengera owenyu ngu nawe nji bakulengeramo. ³ Chagarhuma wabon' echigoga chiri omulisho ly'owenyu, orhanabona echirhi chiri omulisho lyawe? ⁴ changwa gurhe wankabwira mwene wenyu; mpu nkukul' echi chiri omu lisho lyawe, nab'ogwerh' echisinde omu ly'emwawe? ⁵ We ndyalya we, rhang'okule echigoga chili omulisho lyawe, nantyo wanabonana kurhe wakula echili omulisho lya mwene wenyu. ⁶ Murhahaga banyakabwa ebintu bichesezwe, murhanakabulag'amagerha genyu embere g'ebibwana byengulube, zankamalabarha zinahindamuke n'okubahekenya.

⁷ Muheme mu na habwe, mulonze mwabona, mukongorh'olunvi b'abachingulira. ⁸ Bulala ngasi yeshi wa hema ahabwa, ngasi yeshi walonz'abona, banachingulira owakongorh'olunvi. ⁹ Nde omu mwabo wangah'omwana wag'ebale nk'amuhemer'omugati? ¹⁰ Changwa amuhem'efi akamuh'enjoka? ¹¹ Eri, mwabo babi munah'abana benyu ebi kwirire nkagurhe Isho oli omu mpingu arhakah'aba muyemerer'ebintu bikwirire bwenene. ¹² Ngasi choshi mwakasim'abantu babajirire, mubajirire cho n'enyu, bulala liri rhegeko n'abalebi.

¹³ Mugerere omu mulyango gugeke, bulal'omulyango gu galihire eri njir'egalihire ejire omu herero, n'abanene bagerer'omuyo. ¹⁴ Alik'omulyango gugeke, eri njira efunderere ejire omu bulamo, n'abageke bayibona.

¹⁵ Muchilange oku balebi babi. Babahikire n'oborhe nka bwa bibuzi n'obo omu mirhima yabo rhubwa rhw'eluchinga. ¹⁶ Nji mwabamenyer'oku malehe mabo. Abantu banashalul'amalehe makwirire oku mishaki, changw'elehe likwirir'oku makangahu? ¹⁷ Ngasi murhi gukwirire guna burh'amalehe makwirire, aliko omurhi gubi guburh'amalehe mabihire. ¹⁸ Omurhi gukwirire gurhankahek'amalehe mabihire, changw'omurhi mubi gurhahek'amalehe makwirire. ¹⁹ Ngasi murhi gurha burhir'amalehe menja gwa chibwa n'oku kwebwa omu muliro. ²⁰ Nji mwabamenyer'oku malehe mabo. ²¹ Arhali abaderha: Nahano; Nahano, boshi barhakaj'omu bwami bw'empingu, alik'olala ojir'obulonza bwa Darha oli omu mpingu. ²² Olo lusiku, banene nji bambwira: Nahano, Nahano, ka rhurhalebag'oku zino lyawe, ka rhurhalibisyag'abazimu(ebishwasi) oku zino lyawe, karhurhanajirag'ebisomerene binene oku zino lyawe? ²³ Na ntyo njinabwirabo n'obwalagale: Nt'amango nabamenyere, murhengaho, banyankola maligo.

²⁴ Chechirhumire, ngasi yeshi wa yunv'eyi myazi ndi naderha n'okuyikulikira, nja shushanywa n'omuntu w'obwenge wa yumbakaka enju yage oku bale. ²⁵ N'envula yanya, amahohera gayi shurha, empusi yahusa bya chikweba byoshi kwey'onju erhanagwaga, bulala yali yikere bwinj'okubale. ²⁶ Aliko ngasi yeshi oyunv'eyi myazi nderha, arhanayikulikira, njashushanywa n'omuntu w'echihwinja wa yumbakag'enju yage oku mushenyi. ²⁷ N'envula yany'amahohera ga yishurha, empusi ya husa bya chishenya kw'ey'onju yagwa kulala kubonekene.

²⁸ Eri Yesu amal'eyo ngani, echigusho ch'abantu chayemer'enyigirizo zage; ²⁹ bulala alemag'ayigiriza nka murhegesi s'arhali nka mwandisi wabo.