¹ Mumanye murhayerekan'ebijiro byenyu, binja emalanga g'abantu bababone bulala mukabiyerekana, murhakabona oluhembo emwaisho oli mpingu. ² Amango warhula entulo orhabandaga oku mudende nkokw'endyalya zinajira omu masinagogi n'omu miharuro mpu abantu bababone babasime nkubwirir'okuli abo bakamarhire olwabo luhembo. ³ Aliko woyo amango okola wahan'entulo okuboko kw'amalembe kurhamenyaga ech'okuboko kw'amalyo kwajira. ⁴ Ly'entulo yawe ejirika omubwibisho, na isho obona eby'obwisho anaguhemba.

⁵ Amang'okola wahema orhabaga nka ndyalya zisima kuyumanga omu sinagogi n'eburhambi bw'emiharuro, ly'abantu bababona nkubwirire okuli abo bakamarhire. ⁶ Aliko, amang'okola wahema, j'omubusika bwawe ching'olunvi, ohune isho uku bwibisho yenabona ebyobwibisho anaguhemba. ⁷ Omukuhema murhaderhaga binene byabushabusha nka bapagani bamanya mpu kuderha binwa binene kokuyunvibwa. ⁸ Murhabashushaga, bulala y'Isho amenyere ebi mukenere embere mu muheme.

⁹ Mulole gurhe mwakazi hema: Darha werhu oli ompingu, ezino lyawe likuzwe. ¹⁴ Nkamwaka babalir'abantu ebyaha byabo, na y'Isho w'empingu ana babalira nenyu. ¹⁵ Aliko nka murhababalire abantu, y'Isho arhankababalira ebyaha byenyu.

¹⁶ Amango okola wa chishalisa, orha shushaga olubire, nka ndyalya zichiyerekana okuziri kuchishalisa, nkubwirire okuli bahemberwe. ¹⁷ Aliko amango okola wa chishalisa, shig'amafurha omwirhwe ona yoge amalanga. ¹⁸ Yorhabonekaga n'abantu okuli omu kuchishalisa, aliko y'Isho yenabona eby'obwibisho anaguha oluhembo.

¹⁹ Murha chibikirag'enguli okwigulu ahomushwa n'egutu libihya, n'ebishambo birhula byanazimba. ²⁰ S'aliko mubikire omu nguli y'empingu harhaba mushwa n'egutu; n'ebishambo birhagerayo. ²¹ Bulal'ahenguli yawe eri hon'omurhima gwawe nji gwanaba. ²² Erisho l'olwenge lw'omubiri, nk'elisho lyawe liri ligumaguma, omubiri gwawe gwanabon'obuchere. ²³ Aliko nk'elisho lilwere, omubiri gwawe gwanabera omu mwizimya. Bwanaba buchere woyo eyimwizimya, kangana gurhe waba omu mwizimya! ²⁴ Ntaye okolera bami babiri, bulal'anagaya muguma, n'okusim'owindi, changw'anachishwekera kumuguma n'okubonerer'owundi. Murhakagala kukolera Nyamuzinda n'obugale. ²⁵ Che chirhumire mbabwirire, murhagayaga akalamo kenyu mpu bichi nji rhwalya chang'oku mibiri yenyu mpu bichi nji rhwayambala. K'akalamo karhalushir'ebiryo, kan'omubiri gurhalushir'emyambaro? ²⁶ Mulol'enyunyi y'omu chanya zirhahinga, zirhanashalula na ntacho zihir'omu nguli, aliko y'Isho w'empingu yezirisa. Kamurhali babunguke kuzilusha? ²⁷ Inde, mu mwabo omu kuchilwirako akayushul'ekoro liguma oku bule bwage? ²⁸ Bichi byakarhuma mwalubir'enyambalo? Mulole gurh'obwaso bw'amashwa bumera; burhakola burhanaluka. ²⁹ Aliko, mbabwirir'oku Solomono omu bugale bwage boshi arhayambalaga kuguma nabo. ³⁰ Akaba Nyamuzinda ayambikir'emburho z'omwishwa zakaba ziliho zene n'omu sezi zikabulwe omu chibeyi, karhakabayambika kulusha mw'ebantu b'obwemere bugeke. Murhalubaga murhanaderhaga mpu: ³¹ Bichi rhwankalya, bichi rhwankanywa na bichi rhwanka yambala? ³² Bulal'ebi bintu byoshi Abapagani babilonza, y'Isho w'empingu amenyere ebi mulagirireko. ³³ Murhange mushonde obwami n'okuli kwa Nyamuzinda, n'ebi byoshi mwabiyushulirwa. ³⁴ Murhalubag'enyanya y'omu sezi, bulala wol'omusezi lwa chilwako lonine. Buli lusiku lukwanen'ogwage murhamo.