¹ La ngun li culuno inyi to donge, ilulung lo coo ko ki jivia inyi. ² Naha tinya, o lotu tungani na lo daha ddobbu ko ki wora inyi, o jo, Lahitok, ke li wak isi, I tum isi ki iti nyujo nan

³ Yesu ko fihahino kana nenge, ko tiro inyi, o jo, a wak nan; to nyu. Na ttik ddobbu nenge ko rrijoro. ⁴ Yesu ko jimitan iyo inyi, ke rrihohi iyo tteke tungani, oto ilö kikoi nino, itotorrohi ken nino iyo kakumani, iyal inyi iya na lo cïk Moses, ara itotorr iyo icieng.

⁵ ojo li ti rrutohini Yesu Kapanaum, naha olotu karriengani, otahita inyi, ⁶ ojo, Lahitok, ogeto kattiyoni nitole kang omuai, i vovoda, i boria noo.

⁷ Ojo Yesu iyo inyi, alotu ca nan ati jirr inyi."

⁸ Ifotu karriengani ojo, Lahitok, i da nan a cam o jirr isi i lotu kaji nei: oto to teny tenya jia, kattiyoni nitole ko jiran. ⁹ To nyo a ra nan karriengani, ko asegere kuna la lanyu nan: ko la jo nan iyo ene tungani, i lö, inyi ko loro; na manyu iyo nu, ou, inyi ko lotuno; na manyu iyo kattiyok ku nitole, i ttiyo ene, inyi ko kittiyo.

¹⁰ Ojo Yesu o ning ji, i pany inyi, ko jimitan iyo kalihitak, dede a jo nan diho ite, ida nan la rrumu ene kiruho lo bolo ji, orru, Ida ten to Israel. ¹¹ Naha a jo nan iyo ite ajo, ofuonu ca becek to okangere ko lodoyore, ko ki tongohinoti kov ko Abbraham, ko Aisak, ko Jakob, iyo okabue lo Idi-kai. ¹² Hati te kulo okabue ca i suhari oleng iyo mutohun: na ca lo ngön lulu ko komo lo kala. ¹³ Yesu ko jimitan iyo na karriengani, i lö kikoi nino; naha iya na li ruhore isi, i ngohi i ttiyohino iyo isi ji. Naha kattiyoni nenge ko jiran inyi na ttik.

¹⁴ Ojo Yesu o lotu kaji lo Pitta, o deu inyi iyang lo ngorruani nenge o muai nohun. ¹⁵ Inyi ko tiro kana nenge, na nohun ko ngerihino inyi: inyi ko wojuno, ko ki jola icieng. ¹⁶ Ojo lo goru kurrou, Icieng ko ki yauno iyo inyi becek kuna lo daha mininga: inyi ko ki fuha kuna mininga to tenya nenge, ko ki ti jira kuna lo muai fad: ¹⁷ I ti fut hati ku lo afa lo teny kamuoconi Aisaya, o jö, inyi to ken nenge lo dume kigoro niyang, ko ki ti ngada muaimuai ku niyang.

¹⁸ Na ttik lo deu Yesu ilulung i rit inyi, inyi ko ki cuara cik lo fuoro nu ngati bito. ¹⁹ Lobo kageroni ko lotuno, ko jimitan iyo inyi, Katiyenani, a jivita na isi tteke waji na li loro isi.

²⁰ Yesu ko jimitan iyo inyi, o ngönore lobeyohi ocöc, na manyu kweny kulo kai o ngönore kaji lo kweny; hati kito lo tungani i da o ngönore waji na ngi ti getohi kue.

²¹ Ojö manyu lobo kalihitani nenge iyo inyi, Lahitok, i ngohi rre nan a lö a nuk apa nitole.

²² Oto Yesu ko jimitan iyo inyi, ki jiv nan, i ngerihi hati kaweyak o nuk kaweyak.

²³ Ojo li ti rrutohini inyi katua lo yeya, kalihitak, ku nenge ko ki jiva inyi. ²⁴ Naha, tinya, o deto kuyama la hitok katua lo kut noo, na li pude kivi yeya: hati inyi o getoro. ²⁵ Kalihitak, ku nenge ko fuonuno iyo inyi, ko ki ti kwenyati inyi, o jimi, ki luak ohoi: ki kerroro ca.

²⁶ Inyi ko jimitan iyo icieng, nyo ite i bang ite ko kisidi lokiruk? Naha inyi ko wojuno, ko kitiho kuyama ko kut; o ngönore rriejun

²⁷ oto coo i pany, o jimi Ani ikodit lo tungani ene, na lo ningo kileng kuyama ko kut inyi?"

²⁸ Hati inyi ko ki lora iya nu ngati iyo kov lo Gerrgeseni, tinya i ti rric coo are kuna lo daha mininga inyi, o rrutuni to kwecerehin, i ngereha i möc, o jirr tteke tungani i da o tum rrangaru to na kikoi ²⁹ Naha, tinya, i cirr icieng o jö, Nyo i wak isi ki ttiyo iyo ohoi, Yesu, isi kito lo Lobbanga? I lotu rre isi ki ti cana ohoi ene o rihe ttik?

³⁰ Naha o nyawahi icieng o ngöni ibörohi kuna lo daha ija. ³¹ Inyi na, i lelia kuna mininga iyo inyi, o jimi, ko li ti jöhoro isi ohoi, i ngohi ohoi ki jök iyo kuno iborohi.

³² Inyi ko jimitan iyo icieng, i fuo. Icieng ki büruno ko covoroti iyo iborohi: naha, tinya, kuna iborohi fad ko ki burrangaroti o surutaroti gurra many iyo katua lo kut, ko kerroroti katua lo kivi. ³³ Naha kadeyak ku necieng ko ki firrita, ko ruangaroti to kikohin ku necieng iya sitï, ko forohino sangite fad, ko nyonyi o rrumu lo dohi inyi na li nief mininga. ³⁴ Naha, tinya, na sitï ko fuonuno pili ki rrico ko Yesu: ojo icieng o deu inyi, icieng ko divita inyi ojo o ngerihi ca waji necieng.