¹ Matan vevesai tamalohi Tambu tawera, muende na matatauhia telei na tamalohi, mo lai na andihia matan a tuani na tamalohi ana hinahinau non God, matan sohena Nia abo sile na silesilea mana silesilea ana wora matai hina sasati. ² Nia abo sahasaha wanju telei muende na te rongorongo vosai, Moiso muende na domtau hina sorai korkore, matan Nia hasena mo turu matan muende na te suiha. ³ Matan sohena, Nia le sohena mo mahere matan a sile na silesilea matana nona hina sati, asohen Nia mo sile na silesilea ana wota matai hina sasati nona ivao. ⁴ Motete tamalohi a lai na maloloa rindi nona nia hasena. Ne, God mo tovia, le sohen Aron. ⁵ Ana sala rindi, Kristo mo te hase kalakalaia, mo te hase loia tamalohi Tambu tawera. Ne muende mo sora teleia mo re "niho natuku, brandi Iau Tamam." ⁶ Asohen Mo vitia ana jara tinambu, Mo re " niho tamalohi Tambu matan tauni tari, asohen vavani Melchizedek." ⁷ Ana bongina embena Kristo mo damidami mo barebarete hina uloa mana tinagisina telei God, ale a matavosai avahamaurua tiu na matea, moiso nia mo rongoa matan nona boiboia mana maloloa telei God. ⁸ Hina vono Nia Natuna, mo sundu na ololoa ana sava Morongo varihanji matana. ⁹ Nia mo mahere moiso mo mai vevesai na ololo hinia matan Nia hunjui Maru losu. ¹⁰ God mo saua mo sahe asohena tamalohi Tambu tawera, asohen vavani Melchizedek. ¹¹ Ka noha sorai mo were matan ka vitiviti Iesu ne mo matua matan ka vevenia telei kamim, matan nomim rongorongoa mote randa. ¹² Matan balosuro mo duhu matan kamim no mai tamalohi vanjavanjangi, ne kamim no tomboi te tamalohi a vanjangi kamim hina hunjui sorai non God. Kamim no boi no inu milk ne no te boi na sinaha matua. ¹³ Matan ate hisei mo lai na milk manihi nia mote rongorongovosai hina sorai nai hina mahere, matan nia le vuranji worwor matua. ¹⁴ Ne sinaha matua nia matai tamalohi jea. Matan tamalohi jea na sundusundu, na matamatavosai, moiso na matadurungi na hinau duhu mana hinau sasati.