¹ Varavaragu e, lau navasi dekemui neganai, lau na dia hereva namo-hereadia eiava aonega herevadiai a Dirava ena hehuni gaudia na harorolai henimuiva. ² Badina be lalogu vada name hadaia vaitani Lau na gauta asi dibagu umui padamui ai, to Iesu Keriso, bona ena mase satauro ai mo. ³ Lau umui ida neganai na manoka-manoka lalonai, bona gari lalonai, bona heude-heude bada lalonai. ⁴ Lau egu hereva bona harorona dia lalo-ani bona aonega herevadiai, a Lauma bona siahu ihahedinaraina amo, ⁵ unu amo emui abidadama na dia taunimanima ena aonega lalonai, to Dirava ena siahu lalonai. ⁶ Harihari taunimanima badadia bogaragidiai aonegai ta herevamu, to dia ina nega uruna aonegana amo, eiava ini nega lohiadia edia aonega amo, ini na vada e boiomu. ⁷ Unu amo, ita na Dirava ena aonegai gau hehunidia baita herevalaidia, badina Dirava ese nega gunadiai vada eha hegaegaeda Ia hairaina baita davaria. ⁸ Ina nega lohiadia ta ese ina nega asie lalopararalaia, to idia ese bema lalopararalaia neganai, hairai Lohiana na basiema hasatauroa. ⁹ Buka Helaga ai vada e torea, "dahaka mata ese do asie ita, bona taia ese do asie kamonai, bona do asine toreisi taunimanima kudounai, Dirava ese ini gau iboudiai vada e hahegaegae dia Ia e lalokau heniamu taudia ediai." ¹⁰ Badina be Dirava ese vada ehahedinarai henida Lauma ena amo. Badina Lauma na gau iboudiai e tahudiamu, Dirava ena dobu herea gaudia danu. ¹¹ Badina be daika taunimanima bogaragidiai mai dibana tauta lalona gaudia to ia laumana sibona mo mai dibana Ia lalonai be dahaka? Unu hetomana danu, ta asi dibana Dirava lalona gaudia to Dirava Laumana sibona mo ¹² To ita na dia tanobada laumana asita abia, to Dirava ena amo ema Laumana, bona ita danu Dirava ese e henidamu gaudia na baita dibadia guguru. ¹³ Bona ai ese ini gau na a herevalaimu, dia taunimanima edia aonegai ehahedibalai hereva dia amo, to Lauma ese e hahedibalai hereva dia amo, Ia ese Lauma gaudia na baine hahanai dia Lauma lalonai e nohomu taudia ediai. ¹⁴ To tauani kahanai Dirava ena Lauma, ena amo gauta basie abia badina idia ediai na kavakava. Ia ese basine dibadia badina unu na Lauma ai ba dibadia. ¹⁵ To bema Ia na Laumai neganai unu gau iboudiai baine dibadia, a Ia sibona na ta ese basine hadibaia. ¹⁶ "Badina daika Lohiabada lalona mai dibana-daika ese Ia baine hadibadibaia?" To ita na Keriso lalona vada tabia.