¹ Lau Paulo, Keriso Iesu ese vada e boirigu ia ena apostolo ai vada e halaogu Dirava ena ura dainai, bona tadikakada Sostene ida, ² Dirava ena dubu Korinto ai, Keriso Iesu ladana ai e hahelagadia taudia, e boiridia bae helaga taudia bona gabu iboudiai Lohiabada Iesu Keriso ladana e hahaneamu taudia, edia Lohiabada bona ita eda. ³ Hariharibada bona maino na emui ai Dirava ita tamada bona Lohiabada Iesu Keriso ena amo. ⁴ Lau na nega iboudiai egu Dirava na hanamoamu umui daimui ai badina be ena hariharibada ehenimui Keriso Iesu lalonai. ⁵ Badina gau iboudiai lalodiai umui na e hatagamui ia lalonai, hereva ai bona aonega ai, ⁶ Keriso igwaurai hedinaraina na oabia daemu bona oha momokaniamu umui bogaragimui ai. ⁷ Una dainai umui na Lauma ena herahia idauidau lalodia amo na so dabumu eda Lohiabada Iesu Keriso ena hedinarai o naria tarika-tarikamu. ⁸ Ia ese danu goada baine henimui ela bona dokona, una dainai umui na asi emui kerere bae gwauraimui Lohiabada Iesu Keriso ena dina ai. ⁹ Dirava na momokani, daika be umui e boirimui ia natuna ida bae hebamo, Iesu Keriso ita eda Lohiabada. ¹⁰ Ina harihari na noimuimu tadikakagu e, ita eda Lohiabada Iesu Keriso ladanai, iboumui ai bagwau hebou, bona padamui ai heiri-heiri basie vara, to baita ahekubou lalo tamonai bona ura tamonai. ¹¹ Badina be vada eme hahedinarai henigu umui daimui ai, tadikakagu e, Kloe ena taunimanima ese umui padamui ai na heiriheiri e varamu. ¹² Hari lau na dibamu, umui haida na ogwaumu, "lau na Paulo ida," eiava "lau na Apolo ida," eiava "lau na Kefa ida," eiava "lau na Keriso ida." ¹³ Be Keriso e hapararaia a? Paulo na dia umui daimui ai e hasatauroa, una ia? eiava umui be Paulo ladanai e habapatiso mui a? ¹⁴ Dirava na hanamoamu lau ese umui ta asi na habapatisomui, Krispo bona Gaio hari, ¹⁵ una dainai ta basieto, umui na lau ladagu ai na bapatisomui. ¹⁶ (Lau ese hari Stefana ena ruma taudia na habapatiso dia. Una latanai, lau na asi dibagu lau be haida na bapatisodia eiava.) ¹⁷ Badina Keriso ese e siaigu na basina hahebapatsio, to sivarai namo baina harorolaia - dia aonega herevadia amo, una dainai Keriso ena satauro siahuna na basine ore. ¹⁸ Badina be satauro herevana na kavakava mase dalanai e rakamu taudia edia ai, a mauri dalanai tarakamu tauda edai, ia na Dirava ena siahu. ¹⁹ Vada e torea, "lau ese aonega taudia edia diba baina hadikadia, bona lau ese diba momo taudia edia laloparara baina hahegonudia." ²⁰ Aonega tauna be edeseni ai? diba momo tauna be edeseni ai? Ina tanobada e herevalaiamu tauna be edeseni ai? Dirava ese ina tanobada aonegana na vada e giroa kavakava aonegana ai vada ela? ²¹ Una negana amo Dirava ena aonega lalonai taunimanima na asi dibana Dirava, badina Dirava na e moale taunimanima na edia kamonai amo e hamauridia haroro kavakava dia lalodia amo. ²² Bona momokani Iudea taudia ese toa e henanadailaiamu bona Helene taudia ese aonega e tahuamu . ²³ To aina Keriso vada e hasatauroa aharorolaiamu, a Iudea taudia edia ai na hegonu bona Helene taudia ediai na kavakava. ²⁴ To e boiridia taudia, Iudea taudia bona Helene taudia, Keriso na Dirava ena siahu bona Dirava ena aonega. ²⁵ Badina be Dirava ena kavakava ese taunimanima edia aonega e hereaiamu, bona Dirava ena manoka-manoka ese taunimanima edia goada e hereaiamu. ²⁶ A Tadikakagu, emui boiboina a laloa, umui momo na asi aonegamui tauani kahanai, momo asi siahumui, bona momo na dia lohia taudia edia amo ovara. ²⁷ To Dirava ese ina tanobada amo kavakava gaudia eabidia hidimu ia ese aonega taudia baine hahemaraidia, bona Dirava ese manoka gaudia e hididiamu goada taudia baine hahemaraidia. ²⁸ Dirava ese henu gaudia bona asie duhaidiamu gaudia ina tanobadai eabidia hidi, bona lasi gaudia, unu amo e mailaidiamu bona gau haidai ai ehalaodiamu, ²⁹ una amo ta basine heagi Dirava vairanai. ³⁰ To badina ia dainai, oi na Keriso Iesu lalonai, daika be ita daidai ehedinarai Dirava ena aonega amo, kara maoromaoro, hahelaga bona hahemauri. ³¹ Una dainai, ini e torea toma, "daika e heagimu na, Lohiabada dainai baine heagi,"