¹ Ma na hadibalaimuimu, tadikakagu e, sivarai namona na harorolai henimuiva, oabi daeva, lalonai o gini tutuka-tutukamu, ² Unu amo danu mauri vada oabia, bema ba dogoa tao tarika-tarika sivarai namo na harorolai henimuiva, boma laloa tao basioma abia dae kava. ³ Badina be na henimui gunava na davaria herevana - Keriso e mase na eda kara dika dainai Buka Helaga ai e torea hegeregerena, ⁴ bona vada e guria, bona dina iha-toinai e hatorea isi Buka Helaga ai e torea hegeregerena, ⁵ bona Kefa ena e hedinarai, bona gwauta ruaosi ediai danu. ⁶ Gabe amo e hedinarai tadikakada sinahu-ima mai dikoana ida ediai nega tamona ai. Hutuma na doini e maurimu, a haida na vada e mahuta. ⁷ Gabe amo Iakobo enai e hedinarai, bona apostolo iboudiai edia ai danu. ⁸ Ibouboudiai muridiai, egu ai e hedinarai, e kara evara dika merona ta na heto. ⁹ Badina be apostolo iboudiai ese lau e hereagumu, lau na dia namo apostolo ai bae gwauraigu, badina be Dirava ena ekalesia oreana na dagedage heniava. ¹⁰ To Dirava ena hariharibada amo lau ini name heto, bona ena hariharibada danu se henigu kava, badina be gaukara iboudiai lalodiai vada na hereadia, a dia lau mo, to Dirava ena hariharibada na lau ida. ¹¹ Una dainai lau na haroro, eiava idia e haroro, herevana na tamona aharorolaiamu bona oabia daemu mo. ¹² Bema Keriso na mase amo e hatorea isi e harorolaiamu, ede heto umui haida na otomamu mase taudia na basie toreisi lou? ¹³ To bema mase taudia na basiema toreisi lou, Keriso danu basinema hatorea isi; ¹⁴ bona bema Keriso basinema hatorea isi, emai haroro na asi anina, bona emui abidadama danu asi anina. ¹⁵ Oibe, ai danu vada bema gwauraimai Dirava idiba-koikoina taumai, badine be Dirava ese Keriso e hatorea isi sivaraina a harorolaiava; a gau be mase na asie hatore dia isi. ¹⁶ Bema mase basiema hatore dia isi, Keriso danu basinema hatorea isi; ¹⁷ bona bema Keriso na basinema hatorea isi, emui abidadama na asi anina; umui na doini emui kara dika lalodiai boma noho. ¹⁸ Bona bema Keriso lalonai vada e mase taudia danu bema boio. ¹⁹ Bema ina mauri ai eda helaro Keriso lalonai, taunimanima iboudia ai padadiai ita madi mai bogahisida. ²⁰ To harihari Keriso na mase amo vada e tore isi, mahuta taudia edia tore isi lou roboana. ²¹ Badina be tau ta ena amo mase vada evara, ma tau ta ena amo mase taudia ihatoreisi lou dia vada evara. ²² Badina be iboudiai Adamu dainai vada e mase, Keriso lalonai iboudiai do bae mauri. ²³ A ta ta ena nega ai: Keriso toreisi lou roboana, ena lou mai ai, Keriso ibadinana taudia. ²⁴ Bena dokona baine kau ai, Keriso ese basileia na tamana Dirava baine e henia hanai, una neganai ia ese gaubada iboudiai bona lohia iboundia bona siahu danu baine hadareredia. ²⁵ Badina be ia na do baine lohia ela bona inai na iboudiai na aena henudiai do baine atodia. ²⁶ Gini-gabena ana inai be mase baine haorea. ²⁷ Badina be "ia ese gau iboudiai aena henunai vada eatodia." A hereva e tomu, "ia ese gau iboudiai vada eato." dibada anina be dia gau iboudiai ia henunai vada eatodia Diravana na unu seheato toma. ²⁸ Unu gau iboudiai ia henunai bae heato vaitani negana ai, natuna danu gau iboudiai ia henunai vada eatodia, una dainai Dirava na baine herea baine herea dae. ²⁹ Unu basinema heto, mase daidiai vada e bapatisodia taudia vada ede bema heto? Bema mase taudia basiema hatoredia isi, badina be dahaka idia daidiai e bapatisodiamu? ³⁰ Dahaka dainai, ita na nega idoidiai hahedika lalonai ta nohomu? ³¹ Lau na dina daba-daba iboudiai na masemu! na heagilaimuimu dainai, na hamaoromui momokanimu Tadikakagu, Keriso Iesu eda Lohiabada lalonai. ³² Dahaka gau namona egu ai, taunimanima edia kara hegeregerena, uda boromadia ida na heatu Epeso ai? ³³ Basio hekoi: "hebamo dika taudia ese kara namo taudia e hahekwakwanai dia mu. ³⁴ Ba noga! kara namo enai! basio kara dika. Badina be umui haida na asi dibamui Dirava - na herevamu umui ihahemaraimu totona. ³⁵ To ta baine eto, " Ede bamona ai mase e tore isimu, bona tauanidia ede hetomadia ai ma baema? ³⁶ Kavakava taumu! dahaka o hadoa gauna na basine mauri ela bona baine mase. ³⁷ Bona dahaka o hadoamu, gauna na gabe ai baine vara anina, to uhe mo - readia wit eiava uhe idau na ta. ³⁸ A Dirava ese anina ehenimu ena ura hegeregerena, uhe ta ta anidia korikori e henidiamu. ³⁹ Hidiho iboudiai danu dia hegeregere. ta be taunimanima hidihodia, ma ta be animal hidihodia, bona ta manu hidihodia, bona ta ma gwarume hidihodia. ⁴⁰ Guba tau-anidia bona tanobada tau-anidia danu mimia.a guba gaudia hairaidia be ta, bona tanobada gaudia hairaidia be idau. ⁴¹ Dina hairaina be ta, bona hua hairaina ma ta, bona hisiu hairaina ma ta. bona hisiu ta ta hairaidia danu idau-idau. ⁴² Mase taudia edia toreisi lou na unuheto. Mase ai e hadoamu, mauri hanaihanai ai e hatorea isimu. ⁴³ Hemarai ai e hadoamu; hairai ai e hatorea isimu. Manoka-manoka ai e hadoamu; goada ai e hatorea isimu. ⁴⁴ Tau-anina ai e hadoamu; Lauma ai e hatorea isimu. Badina be tau-anina e miamu; Lauma anina danu e miamu. ⁴⁵ Buka Helaga ai danu e torea, "Tau gini gunana Adamu na Lauma maurina ai e halaoa." Adamu gini gabena be hahemauri Laumana ai vada e halaoa. ⁴⁶ A Lauma anina na se guna to tau-anina, gabe amo Lauma anina. ⁴⁷ Tau gini gunana na tano amo ema, kahu ai e karaia. Tau iharuana na guba amo ema. ⁴⁸ Tanobada taudia be tano amo ema tauna hegeregerena, guba taudia be guba amo ema tauna hegeregerena. ⁴⁹ Tano amo ema tauna oromana vada tabia na heto, guba amo ema tauna oromana do baita abia. ⁵⁰ To varavargu e, lau na tomamu, hidiho bona rara ese Dirava ena basileia basine abia diba. Mase tauna ese danu e masemu gauna ahuna basine abia diba. ⁵¹ Aitaia! hereva hehunina aina hamaorolaimui: ita iboudai na basita mahuta, to iboudai do baine ha-idauda - ⁵² asi kaimana, mata hekunumai tamona ai, kibi gabena ai. Badina be kibi regena ai, mase taudia baine hatoredia isi, basie mase lou, bona ita danu do baine ha-idauda. ⁵³ Badina be ina baine pata gauna ese basine pata gauna baine hahedokilaia, bona ina baine mase gauna ese basine mase gauna baine hahedokilaia. ⁵⁴ Una dainai baine pata gauna na basine pata gauna baine hadokilaia, bona baine mase gauna na basine mase gauna baine hadokilaia negana ai, e torea gauna baine momokani eto, "kwalimu ese mase vada e hadonoa." ⁵⁵ Mase e, emu kwalimu be edeseni ai? Mase e, emu hekori be edeseni ai? ⁵⁶ To mase ena hekori na kara dika, bona kara dika ena siahu na taravatu. ⁵⁷ A Dirava baita hanamoa, ia ese e hakwalimuda eda Lohiabada Iesu Keriso bagunai! ⁵⁸ Una dainai, tadikakagu egu lalokau e, ba gini tutuka, basio marere, Lohiabada ena gaukara lalonai bagoada balaheni nega idoinai, badina be dibamui emui hekwarahi Lohiabada lalonai na asio hekwarahi kavamu.