1 Ga mage be iaberamu Keriso gasina se, uhudau bena ni sorukehe se, torubo mage be iabana Horu Aena gasina se, uhudau mati mage, 2 iama bina di uhumageve misa, uhu kobabe ruta, uhuanana mage ruta, Horu Aena uhurahe mati uhu kobabe misa. 3 Ia negu uhuanana nune ruta me kisa. Eduge iama moebia ruta koita nune magegahisa. 4 Ia negu ai uhure urave kima, eduge iama koita be iau urave kisa. 5 Iama Keriso Iesu uhu mage misa, 6 auka ni Rohite eduge auka ni gasina orogonu. 7 Eduge auka besubesu koita be nagate, mati auka vata ada o magi iau vagatane he vara ragohanu. 8 Auka moebia koitavara mati ga ihihi koitavara, Satauro to va tage hoge raganu ni dainehe. 9 E dainehe au mame Rohi Bauge raki mage gahanu. Au ihe ra ihi aena vara mati ihi au bouge adahe. 10 Iesu mageve dainehe noma ni bouge au motegahisa, koita au bouge, vava ge, vata ada o mati vata derikahu koita iava tage. 11 E dainehe koita mei nune nune ramu rosa Iesu Keriso ra ni Rohite, au mageve raha ni Rohi Bauge gasina. 12 Eige, di ogo nanuhea, iama iai mageve ga hihi ruta kisa mati sigo ruta kisa. 13 A ora ni Rohi Bauge raki iai uhurehe memima au mageve dainehe. 14 Iama iaga bouge uhu mage ruta kisa 15 ge iama koita mage goisa, iama Rohi Bauge gare ihisa mati iama vadibu o uhurahe, abaga goisa. 16 Iama Rohi Bauge Hari Mage ve kamui berebe gasina, ge Keriso vani vehe dana rosa daka di mevera beta ahakera. 17 Da hogerage ai gabidadama ve Rohi Bauge dainehe daka hegiri vivi vara iau bouge ruta. 18 Eige iama da ruta hegiri visa. 19 Da gahare iagani vara ni Rohite Iesu uhurahe Timothy besu gisa iai gasina, ge dana hero misa iai mevehe. 20 Au nagate koita bera mati veite, unu ra iai dainehe uhuanana vima. 21 Iauka iau uhuanana me iagoima beta Iesu Keriso gare iagoima. 22 Aka au dibanera, auka di moe nagate Rohi Bauge Hari Mage uhurahe. 23 E dainehe daki besu ganu ai gasina ni meve eragisa. 24 Eduge daka di gabidadama Rohi Bauge uhurahe roma daka vaina orogisa. 25 E dainehe di gahara vera Epaphroditus besugi goiragohisa iai gasina. Auka di bamode, mati Rohi Bauge uhurahe me koita vara, mati auka iai besubesu koita vara. 26 Auka u mage veite mati auka iai dainehe uhuanana vima, badivara iaka dibanara auka komata vima. 27 Auka komata rahoherea vanu ge auki tutube tutube ogeraganu. Eduge Rohi Bauge raki au mage gahanu, mati au avahu eduge da tage, ge da negu uhuanana raho vima. 28 E dainehe iai au eragege iama hegiri visa ge di uhuanana na mage goisa. 29 Iama Epaphroditus Rohi Bauge mageve ruta mage gahisa. Koita ena kiki iama mage gahigeisa. 30 Keriso meve dainehe, tutube hoge raki manu, eduge auka au maguri ve di dainehe maemanu.