Chapter 3

1 Mama God na ungotena dainget tunga humbuha awo kivu,ungotena tohota meni undi bera,eto ungotena re tohota meni undi ra.Awo eto,enda emo ungotena kiae ra,wahi amo embo amo kiae ra. 2 Tunga humbari nau,ungotena eha amo God ta hatira ra.Do aisora amo ae araha ae ra.Ungote kogora,Iesu egerembiha amo ungotena awo ite aisora.Amo do itere amo inono be awo keisora. 3 Embo amina humota eingeto ere ua amo Iesu ainge,sapura tohota amo be ambu aisuja. 4 Amina sapura awo ere ua amo sapura tohota ra. 5 Umo kogoa Bada amo ungote nau sapura awo humbuto pehena,tohota sapura irae ra. 6 Amina Bada ga opambu aisuja amo sapura mane aisuja.Te embo sapura awo mahinge ere ua amo Bada kiae amina ere ua. 7 Nau hatira,mane awo embo nei na ungo tihi jigari sapura aisuja,amina jawotoho ere ua amo jawotoho Mama Iesu ainge ra. 8 Amina sapura ere ua amo ahihi sapura amita meni ra.Amita be amo ihikari te sapura amo ahihi sapura amina ena.Ainge ari awo God na tohota meni Iesu awo ikenu puvuto sapura ungote nau te awo humbuto pehena.Ahihi sapura do aisi ena awo ehi sapura ena. 9 Amina Bada hena eto puvuna amo sapura amo mahinge mane aisuja,amita be amo God ta ahihi jawotoho amo tohota jo ta miha.sapura mahinge mane aisuja amita be,amo God ta meni eto God hena eto puvurari ra. 10 Embere ainge ta,Amo God ta meni dawore eto ahihi sapura ta meni dawore amo araha ta keisoa.Amina jawotoho ari ae amo God ta degi eto puvurae ra,Embo tohota namei tunga humbae ere ua amiga. 11 Ke emo re ihikari te ingari awo ra,tapa totoreto tunga humbara. 12 Ungote mane Cain na ena ainge aisora.Amo ahihi sapura ta meni kito awo tohota naei tenu pehena.Do eto tohota namei tenu pehenu?Amita be amo ari wasiri tohota amo sapura eto namei ta amo jawotoho. 13 Mane mana mana aisova,nau namei kamei,enda emina umo uje ae uru koge. 14 Ungote kogo ra ungotena amo pehari seriketo daroho irari ai mihera,amita be ungotena tunga humbarita mihera.Amina tunga humbarita irae amo pehari ta miha. 15 Amina tohota namei tunga humbae,ujae ere oite amo embo sapura embo nei tehi pehagora awora.Embo ainge amo daraho mane iresuja te pehau irae aisuja. 16 Einge ta ungotena tunga humbari amo kogora.Amita be amo Bada Iesu na ungotena embo pehena,awo eto ungote ungotenau namei kamei embo pehasora. 17 Te,amina donda te hajawaja te rate,namei donda ambu osaga te mihei ere koguha te,namei hondeta aeere ua.Amo Bada ta tunga humbari amo daingeto amiga irou? 18 Nau tunga humbari meni undi,mane ke kahari pere aisova te ke bena wasiri na. 19 Wasiri ta aisoa kito awo be aisuja.Eto ungote nau jo amo amiga iresuja. 20 Ungote nau jenge na awora ae aisuja,amo Mama amo ungote nau jenge amo dembari eto donda tapa amo kiari ra. 21 Tunga humbari ungotenau jenge na engekari ta ikae aisuja amo ungotenau humota ari amo Mama hena peni wahira. 22 Do penunu aisora amo ikasuja,amita be amo tohota ke amo ungote nau jo ta miha awo eto pure do jawotoho eagora tohota tihi ta. 23 Tohota ke re evira,tohota meni Iesu Keriso ta jawo ta humote pai aisora eto namei nei tunga humbasora,Mama ta ke iki mahija aita. 24 Amina tohota ke hotohu jo ta miha kito amo Mama ta jo tara,eto Mama amo tohota jo ta ra.Aenge ue keisora ahihi do ungote nau degi ta.