¹ Eawae God mei iesu keriso da getuturo. ² Ge sari embo Isaiah mi gaisira,"oure giwo naso binga karigari embo awa iteno mambutira awara,unemi ingoda emboro sia adira." ³ Ambe joda ge da javi ingro sisira,Bada embo emboro sia ewo edo emboro ewo dagaia are. ⁴ Ambe joda edo John mi embo bapataito ise ge kando katabu isira,bapataito edo jimbo wujegoro kotembedo doarese. ⁵ Judea busu berari ainda nati Jerusalem da embo berari awa uso yei da mambusera etero unemi Jordan umo ainda bapataito isira,edo ungomi jimbo wujegurisera. ⁶ John da ombari awa wo Camel da tu miari edo uso ipuda faia awa wo da andiso mi ari. ⁷ Unemi sedo sisira,embo da naso amboda budira giwo,edo embo ainda goroba awa na derigarira.Na apa nomi ari kukubedo uso tei pogo teugari katogo aera. ⁸ Nanemi ingo awa umo mi bapataito ena ate unemi ingo ane asisi kotopu mi bapataito adira. ⁹ Iji aingode awa Bada,yei Nazareth Galilee busu ainda John mi bapataito isira. ¹⁰ Etiri Iesu umo joda vivitiri utu javisisira,utu benei benei jariguriri gosisera,asisi kotopu mi ribo awodo uso yei wowosisira. ¹¹ Be opu ge sisira,"imo awa naso dubobari mei.Imo gosise na yaviri be edena. ¹² Aida ambo da asisi biae mi ombiri ambe saoto da totorisira. ¹³ Ainda ambo da awa iji foti (40) atisira ainda satan mi bavusira.Ambe wode daedo atiri anera mi bugudo burisera. ¹⁴ John kundo kajetero awa Bada ijegedo Galilee God da ge sise bugusira. ¹⁵ Edo sisira,"iji bugira jo warere gedo God da ge kumbudo ainda tumonda ewo." ¹⁶ Galilee awa bengi da pepeta edo mambuse embo Simon edo uso namendi Andrew de awa ewa beda monga pigitero gosisira,ungo awa wo bari embobo. ¹⁷ Bada mi ungoda yei sisira," puwo na amboambo awo nanemi ano wo berave." ¹⁸ Setiri edo ungo burigibe ungo da monga dodo Bada ambo ambo isera. ¹⁹ Sekago pepeta edo Iesu awa Zebedee da memei etoto James de uso namende John de awa joda monga pirise atisera. ²⁰ Gido jawo setiri ungo da mamo Zebedee ainda dodo umo ambo ambo isera. ²¹ Iji kotopu sabbath ainde,Iesu Synagogue atopaputisira. ²² Uso atopatari da embo ge atae isera.Ainda be awa teta umo geberari sisira ainda bajari. ²³ Synagogue ainda embo da awa asisi biae mi ombiri atima edisira,ami gogo dimbudo sisira,"nango ingae ro orose bugesi? imo nango da atari kumbari aso biae arase bugesita? na imo garira,imo ne embo God kotopu da ra!" ²⁵ Iesu mi asisi biae awa ondedo sisira,"gedodo embo awa dodo ijege!" ²⁶ Etiri asisi biae awa gogo dimbudo ji sise embo awa dodo ijegurisira. ²⁷ Embo berari ge atae isera,edo ungo suka mina sara isera,"emo rorarori? emo atopatari seka goroba deta? asisi bebegae awa uso ge da ingisera!" ²⁸ Uso binga awa berari Galilee ainda awa ingisera. ²⁹ Ainda amboda awa Synagogue dodo ijigedo James de John dega Simon de Andrew deda mando da bugusera. ³⁰ Simon da umboti awa karu pasi do atimaisira gido Iesu setero goisira. ³¹ Setero gido awa bugudo uso ingo da jigiri eririsira. ³² Ainda ongobo awa embo karu de ta,asisi bebegae de ta awa kumbudo Iesu da yei bugusera. ³³ Nati ainda embo berari awa Iesu atisi mando be ainda usisera. ³⁴ Karu de awa etiri ewamei isera,edo asisi bebegae awa ondetiri ijegurisera,ate embo ainda ge mina sae ainda be awa umo embo averi awa ungo gari be awasedo gido. ³⁵ Sipo atae be awa umo erido aike be mambudo umo usuka petedo awa pari sisira. ³⁶ Simon edo embo berari aida atisera awa umo eura isera. ³⁷ Edo tambudo awa uso yei sisera,"embo berari imo eura era." ³⁸ Iesu mi ge mina sisira,"ingode yei neida mambudo,na embo da ge sari dipapa ena ,nane awaembo butana. ³⁹ Awasedo nati Galilee ainda yimapuma ise ge sisira,edo asisi bebegae ondisira. ⁴⁰ Embo da karu ingo tei detegari de amimi uso yei baingo dederi edo ewamei embo benunu sisira,"Bada inemi dipapa edo gido aso na ewamei adena." ⁴¹ Ge awa setiri,Iesu embo awa jo etiri sisira, "imo ewamei adesa dipapa ena." ⁴² Burigibe karu awa umo dotirisira. ⁴³ Bada umo dengoro bagedo awa dotiri mambusira. ⁴⁴ Unemi awa sisira,"embo neida geseose ate imo isuka God da buru ari embo da yeida mambuyo imo gore." ⁴⁵ Ate embo awa mambudo uso be jijipo biae isira awa embo Iesu yei ainda torari okain be isira.Etiri gido umo isuka atisira.Euri embo yei berari da awa God da yei budoisera.