Chapter 2

1 Awasedo ge ro ingesa awa be budo gogo adesa ainda be awa amimi goroba ari itari, ingodena awa wasirida demonda mana wosadera. 2 Ami sira awa binga anela mi karigurisira awa ge be adira gido awa embo mei begono era, ge kera ae ise jimboda atadi dipapa era awa mane berari awa kana badera. 3 Eiawa ingode rawodo edo serigae eteri? Emone Bada unemi tuturoda karigurisira, edo ingisera embo mi suwi dorisera. 4 God umo daedo kariwa neide neide mi ge awa sekago sekago ituri puma edo ira, edo Asisi kotopu da ewamei re awodo mi katabedo budo era. 5 Amimi sira awa anela da derido God unemi busuda wasiri budo yima puma aera. 6 Ate emboda sari atira awodo - ro awa sedo embo awa embo esi? Ta umo mamoda mei gido isira. 7 Embo awa anela da tuda isesa edo iso sago gari ane kotopu de mi gogumburisira. 8 Rora berai uso tuda edo uso topo, God rora ro uso itadira awa ruvegae edo dodo jigido atae. 9 Awarate ingodena boroko awa be gido gogo adera. God uso mei Iesu Keriso ami uso ewa gaewa berari awa dodo wowosisira anela maneda tuda embo sapo awodo isira, awa sedo God da kandode ari mi, ari betari eiawa embo berari mi gadera. 10 Uso yei be adira edo umo atira awa embo rora berari awa atira edo umo kena rora berari awa atira amimi kinapeina jiwae be awa kunda pusira uso parara da, ari giti jigari embo ami soregari awa ari sangove arase sedo uso memesi burisira ami. 11 Awa sedo rora etoto euri ingodena kotopu edena, edo embo nenei euri kotopu edera awa ungo berari awa jero da awara. Be amimi siri gido, umo awa mei ae atise uso nano namendi orose. 12 Unemi eiedo sira, "Nanemi ungoda jawo awa naso nano namedi da yei sadena, nanemi imo embo ya sadena dada ari yei ainda edo." 13 Edo sekago sira, "Na umo tumonda adena" edo sekago sira, "Gi, na eira God mi kinapeina ititisira ainde." 14 Awa sedo, kinapeina uso tamonde ororo de kando kataba edo burera awa embo da awa kando kataba era, awa embo iso betari mi betari da goroba awa ari kiambu adira. 15 Eiawa ijegurisira ainda be awa uso betari ingodena uso agipo embobo eorase sedo. 16 Ate na ge be sena, ane anela manede sise saera; ate, Abraham da ve ainde sise sira. 17 Awa sedo arapa isira amimi imo awa uso nano namedide rora berari mi ari, jo ari mi God da buro ari embo nembo nembodiba God da ewa ewagaewa da, edo ami ari busu embo mei da jimbo awa kotebedo doadi sedo. 18 Edo boroko awa unemi embo bawari da durido edera awa kondade adira, ainda b be awa umo, umo usuka awa dawodo bawusira edo memesi burisira.