Karoa 2

1 Unu dinadiai, Kaisara Augusto ese ena hahegani revareva na ta e siaia lao tanobada taudia iboudiai ladadia bae tore. 2 Lada iabidia gini-gunana e hekarava na Kurenio ese Suria e lohiava negana ai. 3 Una dainai taunimanima iboudiai na ladadia itoredia, totona edia hanua ta ta e lou heni. 4 Una dainai Iosepa danu Galileia, Nasareta hanuana ta amo ela, Iudea, Davida ena hanua ladana Betelehema, badina ia danu Davida ena iduhu bona bese tauna ta. 5 Maria danu ia ida ela ladadia bae tore, ia maohenina bona vada e rogorogo. 6 Bena raruosi unuseni ai nohodiai, ia ena mara dinana e kau. 7 Bena e mara mero ta eabia, natuna roboana, bena dabua amo e tarua bona boromakau edia aniani patana ai e kurea, badina be heitatao rumana lalona na asi gabuna. 8 Mamoe ireguna taudia haida danu una tano ai e nohova, vahu ai bona hanuaboi ai edia seri e igimadiava. 9 Lohiabada ena aneru ta e hedinarai idia ediai, bona Lohiabada hairaina diari diarina ese e gegedia, bena garibada ese e butudia tao. 10 Bena aneru ese e hamaorodia eto, "Asio o gari, hereva namona lau ese na mailaia, taunimanima iboudiai ihamoaledia. 11 Badina be ina harihari Davida ena hanua ai, emui hahemauri tauna vada e vara Keriso Lohiabada bunai! 12 Toana binai umui emui ai: beibi ta ba davaria dabu ai e kumia boromakau edia aniani patana ai hekure." 13 Bena guba anerudia hutuma bada hari aneru ida e hedinarai taku, Dirava e hanamoa eto, 14 "Atai doriva-dorivanai Dirava ba imodaia, bona tanobada ai na maino, ena lalo-namo taudia ese bae abia. 15 Aneru logora ese e rakatanidia guba e lou henia, muridiai Mamoe iregudia taudia sibodia e hereva eto, "Ita na Betelehema aitala, ina eme vara gauna, Lohiabada ese vada e hadibada." 16 Bena ela haraga unuseni ai Maria bona Iosepa e davaridia, bona beibi danu, hekure boromaku edia aniani patana ai. 17 Idia ese e itaia murinai, idia e kamonaia gauna mero sivaraina e gwauraia hedinarai. 18 E kamonaia taudia iboudia ai ese mamoe iregudia taudia e herevalaia gaudia e hoalaia. 19 A Maraia na unu hereva iboudia ai, e haero bona kudounai e lalotao. 20 Bena mamoe iregudia taudia e lou, Dirava e imodaia bona e heatolaia badina be e kamonai bona e ita gaudia na vada e hadibadia hegeregerena. 21 Dina taurahani e lao bubuni ai, e peritomea bena ladana e hatoa Iesu, aneru ese e hatoa sinana do se ruru negana ai. 22 Bena idia ihagoevadia dinadia e ore, Mose ena taravatu hegeregerena ai, idia ese Ierusalema e laohaia Lohiabada vairana ai bae hahedinaraia totona. 23 (Lohiabada ena taravatu ai e torea hegeregerena, "Mamaruanedia roboadia iboudia ai na hehelaga Lohiabada ena"), 24 bona boubou gauna ba henia eto, Lohiabada ena taravatu hegeregerena, "Kerea rua eiava pune natuna rua." 25 A itaia, tau ta Ierusalema ai, ladana na Simeona, ia na kara maoromaoro tauna bona Dirava garina e gariva, Ia ese Isaraela edia tauhalo tauna e nariava, bona Lauma Helaga ese e rohea. 26 Lauma Helaga ese danu e hamaoroa ia na basine mase ela bona Lohiabada ena Keriso do baine itaia. 27 Lauma ai dubu lalonai e vareai bena iahuna ese Iesu, na e mailaia taravatu karana ibadinana totona. 28 Ia ese eabia, e rosia bona Dirava e hanamoa bena ia eto, 29 Harihari emu hesiai tauna a kahugu nege mai mainogu ida, Lohiabada, emu gwauhamata hegeregerenai. 30 Badina be matagu ese emu hahemauri vada eme itaia. 31 Oi ese vada o seua taunimanima iboudiai vairadiai; 32 Diarina binai bese idauidau ihadiarilaidia bona oiemu bese Isaraela ihaheatolaidia. 33 Hari tamana bona sinana na e hoa, unu hereva e kamonai ai. 34 Bena Simeona ese raruosi e hanamodia, bona sinana Maria e hamaoroa eto, "Ina mero na eabia hidi Isaraela taudia hutuma iha-ketodia bona iha-toreisidia ai bainela bona ina na toa taunimanima ese bae gwauatubu - 35 Bona dare ta ese oi lalomu baine daia uru - unu amo hutuma edia lalo-hadai hehunida readia bae hedinarai." 36 Anna danu unuseniai, peroveta hahinena, Fanuel natuna Asere ena iduhu hahinena. Ia na hahine badana, e headava lagani hitu adavana ida e noho hebou, 37 bona e vabu lagani taurahaniahui hani e noho. Ia ese dubu helaga se rakataniava, hesiai e lao heniva e anivaga bona e guriguriva hanuaboi bona dina. 38 Una hora ai ia danu e kau, bena Dirava e hanamoa bona Isaraela ihamaurina e nariava taudia Isaraela ai mero herevana e harorolaidia. 39 Raruosi ese Lohiabada ena taravatu karadia e haguguru vaitani, bena Galileia e lou henia, edia hanua korikori Nasareta ela, 40 bena mero na e bada bona e goada, mai aonegana ida, bona Dirava ena hariharibada na ia latanai. 41 Lagani iboudiai ia iahuna (tamana, sinana) Ierusalema e laova Lagau-Hanai Ariana dainai. 42 Bena ia (Iesu) laganina gwauta-ruana ai, idia na Ierusalema e dara dae una Aria ikarana totona. 43 To Aria dinadia e ore murinai, bena idia vada e lou edia hanua, to Iesu na Ierusalema ai e noho. Tamana sinana na asi dibadia, 44 idia banava eto ia na laolao taudia bogaragidia ai, bena dina ta e raka. Murinai bena e tahua varavara dia bona bamodia dekedia ai. 45 Asi e davaria bena e lou Ierusalema bena ma e tahuava unuseni ai. 46 Dina ihatoina murina ai dubu lalonai e davaria, hahediba taudia bogaragidia ai e helai, edia hereva e kamonai bona e nanadaidia danu. 47 Bena erena e kamonai taudia iboudiai ia ena lalo-parara bona ena haere e hoalai. 48 Raruosi e itaia, e daradara, sinana ese e hereva henia eto, "Natugu e, dahaka dainai ini o karamai toma? A itaia, oi Tamamu bona lau oi a tuhumu tai, tahumu taimu. 49 A ia eto, dahaka dainai o tahugumu? Asi dibamui Tamagu ena ruma na egu noho rumana? 50 A ena hereva e kamonai to lalodia asie parara. 51 Bena e diho idia ida Nasareta ela, bena e kamonai henidia. A sinana ese ini hereva iboudiai e lalo tao. 52 Bena Iesu e badaho, badaho mai aonegana ida Dirava bona taunimanima ese e ura heniava.