1 Katealelu lai koto leleve eviale ke vatala dua ai lai kele melialuaga lai ba ke kalevalivelu bele. 2 Memila DILAVAu au Anelu lavigelu ige ea kotove ke loui ata lavigeale koto keu leleve iale koto ke evisi lova soliale keale vateu tuvu agisi venele. 3 Iale lailole kateai ukolikoli agiveve koto kitae ke evisi a soliluaga lailole oleveo kateai vateu tuvu ke lelevai kosive loia biageu memila lailo agiveve nona ke vai lolu. Ige kotove eviale kea lailo haivege lai luleleige koto keu leleve ula. 4 Kea kateisege DILAVAu ke agigei siau vavege ea kele ivai tete hamivale o vikoivale aveve ke aevei. Aveve ni voleta aevelu isi au olale munanau tuvule aveveke igaligaliai lai lo vavelu. 5 DILAVAu vatau doga ale kelega lo koto ko louva vatau doga ke Aneluia ba nalialivelu bele. 6 Isito Bukau kotole ata voleu guliguliai DILAVA laviai avoe loea atau toelaea. Iale vadeuluga a lo huhugei lo dulugeva. 7 A memila ata aevei vuvune vavei makaevege abo Anelu leivige solisito valaeabele ui vatau valevile ko neni nalievelu. 8 Bukau kotou katealu isito ave vali kole ataea vale vile ke nalieve soliva. 9 Katealelu DILAVAu lailo huhugei IESU hanavage vatae loi kaie ui Anelu ke leivige solisito valaeabele ui. Ata bahataea toelalu voeleige valivelu ataea ibila toela va kalevai aveveve kele DILAVAu letatavai au vuvune vai vavulu. 10 DILAVAu valevile bahata aevei nimabigeale kele vateu tuvu vai ukolikoliu umuka vai IESU vavui olale au kele ata moeaga agigei au atagale otovege abo valivelu kele dibage IESU kela aveveabe toelale agigelu. 11 IESU kela ataea aveve toela totoage kea IESU luvita mama igali olilu ige kelega IESU kelai matie solisito abolai loui avoe la kea di kovuvu lala kea. 12 Bukau kotole au kateai loulu isi loui avoe oia o kosive dale a avale ko loui di dovuvu haivei minaea bele lavisive isi ai ivi letatavai a hoeaseavai. 13 Au kateai louito tota loui avoe dale di uvu vai DILAVAle vaeavai isitota loui avoe dale ave DILAVAu ata damuale keali ulu. 14 Au koto louale keu kosealu lai loea vatau ataea ige IESU loale keu vatau ata olisi lai loi vava olisito eta voelealu au voeleale kele seteneu vuvune ke kavalu ige seteneu ba voele siaule lailo agigelivelu bele. 15 IESU lailolai voele solisege seteneu lailo agige lai vole vabuiavai olave ula ava isito IESU loaleu lailolai voeleale kele laiba voele ke vabuiavalivelu bele. 16 Lai luleleige keu loaleu Anelu duluge solilu isito keu ata olisi Eibalahamu atatele loaleu au ata dulugelu. 17 Keu kateai lailoi vava late ai aveve bahatale lailoi kaka isi nana kitae olilu. Kelegau au lailolai uvuai au loviavale kele meliai lailoi toela ibilalu voeleai olale DILAVAu vudile lailoi Dubuu kosive kitae olisi. 18 Seteneu olai IESU seleavage au seleve kele dobai. Isito au kele doba solisito vateu tuvu bahata agisi dibalu. Katealelu lailole seteneu sele kele vateu tuvu agige aule kele lailo dulugei. AMENI.