¹ Bebukishe ukulokumfwila ba kateka nabali mu maka, ukubomfwila, abaipekenye pa ncito yonse iiweme, ² ukutaloku kalifyapo uuli onse, ukutalokufwayapo ulubo, no kuba abatakenye, ukulanga ukuicefya kuli bonse. ³ Pantu akale nafwe fwebene twali bambibambi nakambi abatomfwapo. Twatwelwe mukuluba nokucitwa ubusha ku fya lunkumbwa no bwangashi ifipusene pusene. Twaikele mu bubi na kaso. Twali aba bukali nakambi abapatene. ⁴ Lelo ulo ukunakilila kwaku Lesa kalubula wesu no kutemwa akwatila abantu kwabonekele, ⁵ tacalipo niku kubomba kwa bololoke kwesu ukutwacitile, lelo ku luse lwakwe eku atupuswishishe, ukupitila mukusamba kwa kufyalwa bwangu nokuwamishiwa ku mupashi wa mushilo, ⁶ uo Lesa aitulwilile pali fweukupitila muli kalubula Yesu Klistu, ⁷ ukweba ati apo twalungamikwa ku nkumbu shakwe, tungaba impyani abakwete isubilo lya mweo wa muyayaya. ⁸ Inji mbila ilingile ukucetekela. Nkofwaya ukoselele pali mfi fintu, ukweba ati abo abali abacetekele muli Lesa bangalokucenjela pa kuitumpamo abene mu ncito ishiweme. Mfi fintu fiweme nakambi fya ncito ku uli onse ⁹ Lelo kana ukutalikana kwa bungwa no kupende nkulo no bukali no kutintana kwa pa mafunde. ifyo fintu tafyakwatapo bukumo nakambi tafyafwapo kantu nangula kamo. ¹⁰ Kaneni onse uukoleta ukupatukana pali mwe, panuma ya kumu cenjesha imiku ibili, ¹¹ pakwishiba ukweba ati umuntu wa oyo musango alifumine mu nshila ya cine nakambi akobembuka nakambi akoipaisha umwine enka. ¹² Ulo nakutuma Atemas nangula Tukiki kuli mwe, mukendeshe no kwisa kuli nebo ku Nilopoli, eko nkofwaya ukuya kuba pa mwela. ¹³ Mucite fyonse ifi mungacita pakwisa bo ukutuma kalabilila Zenas na Apolo, ukweba ati bebulishapo nangula cimo. ¹⁴ Abantu besu balingile ukuitumpamo abene mu ncito ishiweme ishakwafwako babo abakobulisha, nabo bebapo abatatwalapo fitwalo. ¹⁵ Abo bonse abo tuli nabo ba muposha. Posheniko abo abatutemwa mucitetekelo. Nkumbu shibe nenu bonse.