¹ Lelo we, labila ifilingene no kukonkobesha kwa chishinka. ² Sambilisha abalalume abakulu ukuba abaweme mitima, abacindikwa, aba mano, abenenene mu cicetekelo, mukutemwa, namu kushipikisha. ³ Sambilisha abanashi abakulu cimo cine ukuba abaweme mu mibo, teba lwambo, nangula abasha ba bwalwa ubwingi, sombi ukuba bakasambilisha ba fiweme, ⁴ nakambi basambilishe abanakashi abaice ukulokutemwa abalume babo no kutemwa abana babo, ⁵ ukuba aba mano, abatambalele, abasunga bwino amayanda yabo, no kuba abacumfwila kubalume babo, ukweba ati icebo caku Lesa cilokutukwapo ⁶ Munshila imo yenka, kokoselesha abalalume abaice ukubomfya amano ayelele. ⁷ Mu nshila shonse, ipele icakubwenako ca ncito ishiweme. Mukusambilisha kobe, ulokulanga ukwishiba, no mucinshi, ⁸ nakambi ne mbila yacishinka iicilile pa kwebaula, ukweba ati onse uukutalika akabe ne nsoni pantu tabakwetepo ifilabilo ifibipile ukulabila pali fwe. ⁹ Sambilisha abasha ukulokumfwila ababasunga muli fyonse, ukubasekesha nakambi ukutalokutalikana nabo. ¹⁰ Ukutalo kubebila, lelo ukulanga ukucetekelo kuweme, ukweba ati munshila yonse balokuleta ubucindami mukusambilisha pafya kwa Lesa kalubula wesu. ¹¹ Pantu inkumbu shaku Lesa shaliboneka pe pusukilo lya bonse. ¹² Shitusambilisha ukukana bu muntapepa no lunkumbwa lwa pano calo, no kwikala mu kuitungulula, abololokele, no kwikala kwa bwina Lesa muli njino nkulo, ¹³ apo tukopembela ukupokelela isubilo lye palo, ukuboneka kwa bucindami bwaku Lesa mukulu na kalubula Yesu Klistu. ¹⁴ Yesu aipele umwine enka pali fwebo pakuti atulubuleko kuli bu mpulamafunde bonse no kuicitila abatambalele umwine abantu baibelele abali ne cilaka ca kucita ifiweme. ¹⁵ Kolabila pali mfi fintu, koselesha abantu ukuficita, nakambi pela ukulungamika mu maka onse. Leka pebapo nangu umo uwakukusula