¹ Paulo, umusha waku Lesa nakambi umutumwa waku Yesu Klistu pa cicetekelo ca bantu baku Lesa na mano acine aasumunishanya no bwina Lesa, ² ne citetekelo ca mweo wa muyayaya uo Lesa, uutabepa, alaile ulo inshita taingatampa. ³ Pa nshita iilingile afisulwile icebo cakwe ukupitila ukupitila mukushimikila uko nande bampele ukulingana no kukonkobesha kwaku Lesa kalubula wesu. ⁴ Kuli Tito, umwana wa mwalalume wa cishinka mu cicetekelo cesu bonse. Inkumbu no mutende ukufuma kuli bata ba Lesa na Klistu Yesu kalubula wesu. ⁵ Pali nci efi nakushilile mu Creti, ukweba ati ungabika ubwino ifintu ifi tangashila no kushisha abakulu mu musumba onse fyenke finamwebele. ⁶ Umukulu alingile ukuba uutatunganiwapo, umulume wa mukashi umo, uwa baba bacetekela abatabepeshiwapo mukuilekelesha nangula ukutakwata cumfwila. ⁷ Cililingile uubwenenena, uwakutungulula aba nganda yaku Lesa, ukuba uutatunganishiwapo. Talingilepo ukuba uutotobele, uutakalipapo bwangu, uutanwenshapo ubwalwa, tewa lubo, nakambi uutali wa kaso. ⁸ Lelo, alingile ukuba uupokelela abalwendo nakambi uucita ubunakwe kufiweme. alingile ukuba uwa mano, umololokele, uushilile, nakambi uuitungulula. ⁹ Ye alingile ukwikatilila imbila ya cine iyasambilishiwe, ukweba ati alokukoseleshako abanakwe mu kusambilisha ukuweme no kwalulula babo abatalika. ¹⁰ Pantu eko bali abengi abantu ba fitala, bacilabile labile nakambi aba bufi, ukucilamo mbalya aba sembululwa. ¹¹ Cililingile ukubaputwisha. Bakokalifya ulupwa lonse pa kusambilisha ifya kunonkelamo fya nsoni ifibatalingilepo kusambilisha. ¹² Umbi uwa ba kasesema wabo kalabila ati, "Abantu ba ku Creti ba bufi yonse nshita, fiswango fibi, balili aba nan'gani." ¹³ Nku kulabila kwa cine. Eco, mulokubalulula mukufikapo, ukweba ati bangaba abenenene mu cicetekelo, ¹⁴ ukutalokukutikapo ku milumbe ya ba Yuda nangula kukukonkobesha kwa bantu abafutatuka ku cine. ¹⁵ Kuli babo abatambalele, fyonse likoso fitambalele. Lelo kuli babo abacenjeshi nakambi abata cetekelapo, tapapo icingatambalala, pakuti amano namatontonkanyo yabo yalilubana. ¹⁶ Balabila ati balishiba Lesa, lelo balamukana ukupitila mu ficitwa fyabo. Ba mpatila, bacintomfwa, nakambi abatalingilepo kucita incito iili yonse iiweme.