¹ Nomba, mwe bakwesu, mulokutupepelako, ekweba ati tungabutushako icebo caba Mfumu pakweba ati citondaishiwe, ngefi cili na kuli mwe. ² Epakweba ati tulubulwe ku bantu abatabapo bwino nakambi ababipile, pantu tebonsepo ababa ne citetekelo. ³ Nomba Imfumu ya cishinka, eya kumukoselesha no kumucingilila ku mubifi. ⁴ Tukoshininkisha mu Mfumu pali mwe, ukweba ati, mukacite fyonse nakambi mukatwalilile ukucita ifintu mfi twamukonkobesha. ⁵ Lekeni Imfumu itungulule imitima yenu ku kutemwa kwa ba Lesa no kushipikisha kwa ba Kristu. ⁶ Nomba tukomukonkobesha, mweba kwasu mwishina lya Mfumu ba Yesu Kristu, pakweba ati, mufumeko kumukwanu uuli onse uulumba bwaka apatapo nefi akocita no kutekalapo ukulingana namu ntambi mwapokele ukufuma kuli fwe. ⁷ Pantu mwe mulishi ukweba ati caliba bwino kuli mwe ukutupashyanya, pantu tatwalikwikalapo lukoso ulo twali namwe. ⁸ Tatwalilepo shinkwa wa muntu neli umo ukwambulo kweba ati tulipilepo indalama, lelo twabombele ubushiku na kasuba mukucululuka nelibe, pakweba ati tatubelelepo icipe icifinine pali mwe. ⁹ Twacitile nci tepamulandu wa kweba ati tatwakwatapo nsambu, lelo twacitile mfi pakweba ati tube ica kubwenako kuli mwe, epakweba ati mutupashyanye. ¹⁰ Pantu ulo twali namwe, katumukonkobeshya, "ngo uutakofwayapo ukubomba, no kulya elyapo". ¹¹ Pantu tulomfwa ukwebati bambi muli mwe bendelamo bwaka, abatabiliganapo mu bomba, nomba aba mibili iitekalapo bwaka. ¹² Nomba kulimbo tukokonkobesha nokucisha mu Mfumu ba Yesu Kristu ukwebati balokubomba mucinkutumene no kulokulya shinkwa wabo. ¹³ Nomba mwe mwebakwasu mulemapo ukulokucita bwino. ¹⁴ Emfi nomba ngo onse uutakoumfwilapo icebo cesu ica muli ngo kalata, mwishibeni elo mwilokukumanapo nankwe, ekwebati akomfwe nsoni. ¹⁵ Lelo mu mubonepo kubati mulwani, lelo mu musoke kubati mukwanu. ¹⁶ Nomba lekeni Imfumu ya mutende iine imupe umutende panshita shonse Imfumu ibe namwe mwense. ¹⁷ Nebo, Paulo, nalemba mfi ku minwe yandi, icili ecakwishibilako mu nkalata shonse ishinemba. ¹⁸ Inkumbu sha Mfumu Yesu Kristu shibe namwe mwense. Kacibe fyenkefyo.