¹ Nomba palwakwisa kwa ku Yesu Imfumu yakuli fwe napa lwakuba nonse na Ye, tukolabila kuli mwe, mwe bakwasu, ² ukwebati mwisubanapo bwangu mukulasa kwa kuli mwe nangula amapenshi, cingaba ku mupashi nangula kwi shiwi, nangula kalata uukoboneka ukubati akofuma kuli fwe, ukufika napali mbulya bushiku bwa ku mfumu mbo bwaishile kunuma. ³ Mwilekapo nangula umo amubeleleke munshila yonse iya kuli mwe. Eco, tacakesepo mpaka ukubwelela kunuma kukese, no muntu uutalikukonkapo amafunde abonekele, umwana wabo mbo. ⁴ Ngu, engulya uukana na ukuisansamika ukucila fyonse fikolabilwa palwa ku Lesa nangula mfilya ifipepwa. Eco, ekale mwitempele lya ku Lesa nokuilinganisha umwine ukuba ati ni Lesa. ⁵ Tamwibukishapo ndulya nali na mwe nkolabila kuli mwe mfi fintu. ⁶ Nomba mwaishiba ifikomukanya, pakwebati akabonekele panshita njilya yenka iyelele. ⁷ Eco ubulanda bwa kutakonkapo amafunde bucili bukobomba, kuli bwaka umo ngo uukomukanya nduno panka akseshiwemo munshila. ⁸ Elo uutakonkapo mafunde akubonekela, uyo oo Imfumu Yesu akwipaya nomupu waku kanwa kakuli Ye no kumuwisha panshi ukupitila mukuboneka kwakwisa kwa kuli Ye. ⁹ Ukwisa kwa kubatabonekapo mafunde kwa kuba ukupitila mu ncito ya ku shetani nefiso fyonse, ifilangililo ne fipesha mano fya bufi, ¹⁰ no mutundu onse uubipile ngo uukosubanya mbo abakoluba, pantu tabapokelepo ukutemwa kwa cine ekwebati benga pusuka. ¹¹ Nipali nciLesa akubatumina ica Mupashi ica kufulunganya pakwebati bakasumine ica bufi, ¹² enco bonse bakusangwa no mulandu mbo abatacetekele mucishinka pantu bo balikuipakisha mu lubembu. ¹³ Lelo ulo lonse tufwile ukumutota Lesa palwa we, mwebakwasu mwebatemwikwa ne Mfumu, eco Lesa alimusalile nge icakulya ca kutampa icakupela ukupitila mukuwaminisha no mupashi na ukucetekela mu cine. ¹⁴ Alikwitile kuli nci ukupitila mwilandwe lya kuli fwe, pakwebati we kambi wingasagana ubucindami bwa ku Yesu Klistu Imfumu ya kuli fwe. ¹⁵ Emfi, mwebakwasu, kamwiminine abakosele kamwikatisha ku ntambi nsho bamusambilisha, ku cebo nangula ku nkalata. ¹⁶ Nomba lekeni Yesu Klistu Imfumu yakulifye yenka na Lesa ba Ta bakulifwe, mbo abatutemenwe nokutupa ukusansamushiwa kwa muyayaya nokwenekela ukuweme ukupitila mu nkumbu. ¹⁷ Sansamusheni no kukoshe mitima mu ncito shonse ishieweme ne cebo.