¹ Eliakoko waekme, apakilala me apauloem, paso nagonga ke Aravaige ila peilei me pau esenainga ivira eilut iwai ta naevunovuno igingin kiami io. ² Apakilala so iem isou pa emai empot ke mugula kire ire natamtamaol siagare, me ire natamtamaol tikeveve nagol siange. Pa eisae me ire neiwol reva nagol ke naoguainga avo. ³ Me arapuainge sevaio igingin towoi kiami paso ipavotvot iami me ileilei iami pagire ire natamtamaol siangare. ⁴ Iem atiem rung pagami luila ke Arapuainge isou pae iami akevire nagol tarengako me pau isou pae awatae ila volem nagol tarengako iem emvul votvot kami panga ko. ⁵ Paso Arapuainge isou ke ipauloami ke aleiknge nakimnga ke Natavolo me pae Kraist ige patange kita. ⁶ Eliakoko iem emvul votvot pagami, waem natamta, pae napasis ke Arapuainge Jesas Kraist ke iami sevaio apul rimemi pagre waimi seime reurata avo me tinre so tiwatare nagol sokngare atokokes kiem io avo. ⁷ Iami pau anal panga iem lemgol popuare isou page iami awatagolre. Iem emgingin knge mugulangami iwai ire natamta me neiware taio tiroun mule page nakimnga kire ke tinre io avo. ⁸ Iem emtoko sape nanga kire terenge so emkolre avota io tiavo,pa, iem ulaem me votvotiem nourata ekepnga vong me nae,pa iem tiniem so emkeve karnge pagami tia avo. ⁹ Iem emkeve nagol eko iwai so iem sapasapa me emkeve. Avo iem emkimso emkeve vileko ke iwai nounaknga ke iami so aleie me awatagol iem. ¹⁰ Lawe eio iem tarenge tagingin, iem emngongo ulaem pagami vileko, soge navolatia tinia so ikepuare avo, sevaio ikan kute. ¹¹ Iem emlongo vileko so terenge mugula kiami io eio tikevep urata me pau iami terenge pau eio sevaio apasiangange waimi revulnga. ¹² Eliakoko iem emvul votvot me emkeve narelmonga luila ke Arapuainge Jesue Kraist, soge ire natamtamaol eriko sevaio atere tiwai me titoko ereanga page ire eremonounounga. ¹³ Pa waek iami natamta emai sevaio atola ke akeve nagol nalnge kute. ¹⁴ Soge navolatia tinia so iwatae lemngonga luila knge nalaulau eko avo io eio sevaio aleiknge me arenge alup me akep urata avo paso ie mamae. ¹⁵ Iami sevaio aleie so namili kute, me avul ulami page so iami waimi. ¹⁶ Arapuainge io natetawainga tame me isou pa ikeve natetawainga pagami ta nae vunovuno ko me panga nourata gegegia iami akevire. Eiota Arapuange pa tarenge tigingin volem. ¹⁷ Iau Pol me eniko iau lekwa naleiknganga nalaulau iwot kiami. Page iau vagek ngata,iau navore nalaulau eko. Eniko naroro iau navorevore pae. ¹⁸ Pae nakewainga kie Arapuainge Jesus Kraist eio pa igingin kiami neiwol.