¹ Ra hini nga ni vaka tubuna velenga kamumu ne Isu Kristo tune Deo. ² Manga kunana ngava i tabuli na buk ne profet Asaia i taki,"Masia iau a rudua tara bakovi i muga vomu,ra bakovi iea erei biri pelekado a dalane matou. ³ Tara ni gale i valai na tanga i uka bakovi vona i ta maea,pelekadoa dalane Viridagi,pelekadoa dalana ge bele kamumu. ⁴ Jon i leho ni vahilolo e hurika bakovi a ngatavine na tanga tavula i uka bakovi i taki tala ngavane Deo ne hurika bakovi rigi pulo a vilone ria rigi hilolo nigi puga voroki a sin ne ria. ⁵ Hurika bakovi a ngatavine o Juda iea o Jerusalem ri vano ri masia.Lakea ri puga sin ne ria lakea e Jon i vahilolo ria na naru o Jodan. ⁶ Jon i rodo a varikia ni rata na kulina kamel i kolo pupua a tamudina i kara ni kani a koua turana hani na robo. ⁷ Ia i ta dagi hateka maea,"tara bakovi biri muri valai nau,ni tora vona i dagi hateka na ni tora nau.Iau kama kamumu ni pugea mota ni kolokari a sendal vona. ⁸ Iau a vahilolo matou na naru,ia biri vahilolo matou na ni tora na hanu kiripiripi." ⁹ Pali ia i bele na parava e,Isu i valai o Nasaret pololilo o Galili lakea e Jon i vahiloloa na naru e Jodan. ¹⁰ Tahuna e Isu i hilolo pali,lakea i masia hunu i mataka i puru valai vona a kadirovo a ranga a balu. ¹¹ Tara ni gale i valai na hunu i ta maea,re verea e tugu nau muholi,Iau a ngaru hatekea.Iau a vivi hateka ne vona. ¹² Muri ma i bolea a hanu kiripiripi i lakea na tanga i uka bakovi. ¹³ Ia i made na tang i uka bakovi na parava i ravulu va lakea e satan i valai i tonia.Ia i made turana virika livoa na robo lakea a ensel i valai i koria. ¹⁴ Na tahuna ri rudilia na bavi e Jon na baptais i lobo ni made na bavi,Isu i valai i bele o Galili i takitala velenga kamumu ne Deo. ¹⁵ I ta maea,"a parava i bele ngane,a harikinga ne Deo biri i valai tabukoi,mu pulo a vilone mua mu luhoi torea velenga kamumu." ¹⁶ Tahuna e Isu i laho valai na gagana dari lomu o Galili,i matai a makitari i ala rua,e Saimon rua e Andru.Ru leho ni ru a vuko na naru na rana e hurika bakovi ni lakavu a manu. ¹⁷ Isu i taki maea rua,muru valai muru muri nau,ga tovo marua na naro ni bole bakovi. ¹⁸ I laviriri hateka,ru pea vuko ru ramaia. ¹⁹ Tahuna e Isu i laho basi papote,ia i matai e Jems,tune Sebedi,turane Jon e tarine Jems.Ru rata kamumua a vuko ne tou. ²⁰ Isu i gale rua ru pea e tamane rua e Sebedi turane hurika voravora vona,lakea ru muri vona. ²¹ Ri valai na tanga o Kapenaum na parava na sabat,lakea e Isu i dili na ruma ni turume puruma ne hurika Juda i lakea i tovo ria. ²² Ri turutu vona hini tovo ria i manga tara bakovi erei i tahoka rana,i tovo ria manga viri tahoka rana,kimi manga bakovi ni lohoka na lo. ²³ Muri tara bakovi i made pololilo na ruma ni vasileki ne hurika Juda,i tahoka tara spirit hale pololilo vona lakea i gale tora hateka, ²⁴ I ta maea,migi rata ara vomu,Isu o Nasaret?Ioe o valai ni rata pile mia e?Mi lohoka ioe erei.Ioe e tune Deo i kiripiripi. ²⁵ Isu i gale tora hateka ne virika spirit hale i taki ria,mu nahani ta,mu pea mu pagitala. ²⁶ Ra spirit hale i voroki purua na malala,i pea i pagitala turana ni gale dagi. ²⁷ Hurika bakovi a ngatavine ri matai virika maki nga ri turutu,ri nana mule ria maea,ara makea?Ra makea ngava karaba vona?Virika spirit hale ranga ri longo totoa ngavana ri vano!" ²⁸ Ra ngava nga i pagitala ne virika tanga pololilo o Galili. ²⁹ Muri ri pagitala na ruma ni vasileki ne hurika Juda,ri pagitala na ruma ne Saimon e Andru turane Jems e Jon. ³⁰ Ngane hurika murimuri ri takia e Isu,kinane girihine Saimon i giloa hale liu i mahita. ³¹ Lakea e Isu i valai i nugua limana i tulipesia.I laviriri a gilanga i pea i lobo lakea i rata puru a maki ni kani ne ria. ³² Na parava iea,a haro i puru pali,ri bole valai vona e hurika bakovi a ngatavine ri tahoka gilanga i kupo ri tahoka spirit hale ri valai vona. ³³ Hurika bakovi a ngatavine na tanga dagi ri valai ri vapopo na matana ni hebi na ruma. ³⁴ Isu i vaka mahuri e hurika bakovi a ngatavine i kupo erei ri tahoka gilanga i kupo,i lili tala a spirit hale i pagitala,kimi ngaru ria rigi ta,narana ri lohoka vona. ³⁵ Isu i pesirike na hetelanga pokopoko,a more kimi mavida ma,i lakea vona tara tanga i vasileki vonga. ³⁶ Saimon turane erei ri made turane Isu ri mata kanea. ³⁷ Ri matavisia ri ta maea,hurika bakovi a ngatavine ri vorokanoe." ³⁸ Isu i ta maea,te lakea na tanga tara iau bara taki tala ni tane Deo,na rana i tahoka vuhuna iau a valai koea. ³⁹ Isu i lakea na tabekena hini lobo o Galili i takitala ni tane Deo,pololilo na ruma ni vasileki ne hurika Juda i lili tala virika spirit hale. ⁴⁰ Tara bakovi i tahoka gilanga patala i valai vona,i pasike puru i nana maea ia,pali ri ioe go ngaru,o rata iau ga mata pado. ⁴¹ Turana ni dodo, e Isu i ru langa limanga vona i taki maea ia,iau a ngaru ni ratoe,go mata pado. ⁴² Pali i laviriri kunana gilanga vona patala pea i mata pado ia. ⁴³ Lakea e Isu i ta tora vona i rudua i vano. ⁴⁴ Isu i takia,"nahani takia viri tara vona hini nga i bele vomu,pali o vano o vakasiria a kakaimu na mugamuga o habi a ni habi na kakaimu boro bele mahuri,manga hini e Moses i taki,biri manga ni vakasiri i lakea ne ria." ⁴⁵ Pali ia i pagitala i taki e hurika bakovi a ngatavine na ara maki e Isu i rata vona.Lakea e Isu kimi dili vona tara tanga.Pali i vano i made vona tara tanga dagi i kupo e hurika bakovi a ngatavine na hini lobo ri valai vona.